រាជធានីភ្នំពេញ ៖ ប្រភពជិតដិតបំផុតរបស់កោះសន្តិភាព បានផ្តល់ព័ត៌មានជាក់លាក់មួយ ពិតមែនតែក្រៅផ្លូវការ ប៉ុន្តែគួរជឿជាក់អាចទទួលយកបាន នូវបញ្ជីរាយនាមគោរម្យងារ «ឧកញ៉ា» ក្នុងសម័យព្រះរាជាណាចក្រទី២ នៃកម្ពុជាយើង ។ បញ្ជីរាយនាមគោរម្យងារ «ឧកញ៉ា» ដែលកោះសន្តិភាពបានទទួលតាមរយៈការព្យាយាមស្រាវជ្រាវកន្លងមក មានពីលេខរៀងទី១ គិតចាប់ពីថ្ងៃទី១០ កញ្ញា ឆ្នាំ១៩៩៤ ដល់លេខរៀងទី៧០៤ ត្រឹមថ្ងៃទី១៧ កុម្ភៈ ឆ្នាំ២០១៤ ដែលសរុបមានចំនួន៧០៤នាក់ ។
យោងតាមអនុក្រឹត្យលេខ១៥ អនក្រ ចុះថ្ងៃទី៥ មេសា ឆ្នាំ១៩៩៤ ដែលចុះហត្ថលេខាដោយនាយករដ្ឋមន្ត្រីទី១ និងទី២ ត្រង់មាត្រា២ ចែងថា «សប្បុរសជន ដែលបានធ្វើអំណោយជូនរដ្ឋជាថវិកា ឬសម្ភារ មានតម្លៃលើសពី១០មុឺនដុល្លារអាមេរិក (US$100.000) ឡើងទៅ នឹងត្រូវបានជូនមេដាយស្ថាបនាជាតិថ្នាក់លេខ១ និងត្រូវបានរាជរដ្ឋាភិបាលស្នើសុំព្រះរាជយោបល់ដ៏ខ្ពង់ខ្ពស់នៃព្រះករុណាជាអម្ចាស់ជីវិតតម្កល់លើត្បូង ដើម្បីទ្រង់ព្រះរាជទានគោរម្យងារជា «ឧកញ៉ា» ។
ដូច្នេះយោងតាមអនុក្រឹត្យខាងលើេនេះ បញ្ជាក់ច្បាស់ថា អស់លោកដែលបានទទួលនូវគោរម្យងារ «ឧកញ៉ា» សុទ្ធតែបានបរិច្ចាគនូវសម្បត្តិផ្ទាល់ខ្លួនគ្រប់ៗគ្នា ជួយកសាងសង្គមជាតិ ទើបអាចទទួលបាននូវគុណសម្បត្តិដ៏វិសេសនេះ សម្រាប់ជាកិត្តិយសប្រចាំជីវិតក្នុងនាមជាពលរដ្ឋខ្មែរមួយរូបជួយដល់សង្គមជាតិ ។ ពោលគឺគោរម្យងារដ៏ឧត្តុងឧត្តមនេះ មិនមែនបានមកដោយសារបក្ខពួកនិយម ឬគ្រួសារនិយមឡើយ ។
ខាងក្រោមនេះជាបញ្ជីរាយនាម «ឧកញ៉ា» ដែលកោះសន្តិភាពបានស្រាវជ្រាវ និងទទួលបានក្រៅផ្លូវការដែលសន្មត់ថា អាចមិនមានកំហុសឆ្គងធំដុំណាមួយឡើយ ។
គួរកត់សម្គាល់ថា កោះសន្តិភាព ធ្លាប់បានចុះផ្សាយនូវបញ្ជីរាយនាម «ឧកញ៉ា» ម្តងរួចមកហើយ ក្នុងអំឡុងដើមឆ្នាំ២០១៣ ប៉ុន្តែបញ្ជីរាយនាមនោះ មិនទាន់គ្រប់គ្រាន់ឡើយ គឺនៅមានឈ្មោះច្រើនឆ្នាំបន្តទៀត ។ ចំណែកបញ្ជីរាយនាមលើកនេះអាចដកស្រង់បានរហូតមកដល់ដើមឆ្នាំ២០១៤ ដែលមានបរិមាណកើនឡើងរហូតដល់ជាង៧០០នាក់ ។
ចែករំលែកព័តមាននេះ