ខេត្តកំពង់ចាម ៖ ជើងខ្លាំងប្រចាំនៅភូមិ៣៥ ឃុំបុសខ្នុរ ស្រុកចំការលើ ត្រូវគេស្គាល់ឈ្មោះ ហុង ជាក្រុមក្មេងទំនើង ស្ថិតនៅក្នុងបញ្ជីខ្មៅរបស់សមត្ថកិច្ច បានរត់គេចខ្លួនបាត់ចេញពីផ្ទះ បន្ទាប់ពីបានឲ្យដាវសាមូរ៉ៃទៅមិត្តភក្តិកាប់ទៅលើជនរងគ្រោះម្នាក់ឈ្មោះ វី ម៉េងហ័រ ភេទបុ្រស អាយុ១៨ឆ្នាំ នៅភូមិថ្លុកក្រវ៉ាន់ ឃុំស្រុកជាមួយគ្នា ត្រូវ១ដាវចំក្បាលខាងស្តាំដេរ១២ថ្នេរ ។
ហេតុការណ៍អំពើហិង្សានេះបានកើតឡើងកាលពីវេលាម៉ោងប្រហែល៤និង៣០នាទីរសៀលថ្ងៃទី២២ មេសា នៅចំណុចខ្លោងទ្វារសាលាបឋមសិក្សាបុសខ្នុរ ហើយជនរងគ្រោះត្រូវបានបញ្ជូនទៅសង្រ្គោះនៅគ្លីនិក១១៥ ក្រុងកំពង់ចាម ចំណែកអ្នកកាប់និងម្ចាស់ដាវ ដាក់មេប្រូចរត់គេចខ្លួនបាត់ ។
ជនរងគ្រោះឈ្មោះ ម៉េងហ័រ ប្រាប់ឲ្យដឹងថា ក្នុងឱកាសបុណ្យចូលឆ្នាំប្រពៃណីជាតិ រូបគេបានធ្វើដំណើរចេញពីកន្លែងធ្វើចំការដំឡូង១កន្លែង ស្ថិតនៅស្រុកអន្លង់វែង ខេត្តឧត្តរមានជ័យមកលេងស្រុកកំណើតវិញនៅភូមិថ្លុកក្រវ៉ាន់ ឃុំបុសខ្នុរ ស្រុកចំការលើ ជាមួយនឹងម្តាយព្រមទាំងក្រុមសាច់ញាតិជាច្រើននាក់ ។ ប្រភពបន្តថា នៅរសៀលថ្ងៃទី២២ មេសា រូបគេបានមកជួបមិត្តភក្តិឈ្មោះ អ៊ូ ធ្លាប់រៀនជាមួយគ្នាថ្នាក់ទី៧ នៅច្រកមុខសាលាបឋមសិក្សាបុសខ្នុរ ឃុំបុសខ្នុរ ដោយមានគ្នា៩នាក់អង្គុយជជែកគ្នាលេង។ លុះនិយាយគ្នាប្រហែលជា១ម៉ោង មិត្តភក្តិប្រុស៣នាក់បានទៅនិយាយជាមួយនឹងសង្សាររបស់គេនៅក្បែរនោះដែរ ។
ប្រភពឱ្យដឹងទៀតថា បន្តិចក្រោយមកស្រាប់តែឈ្មោះហុង ជិះម៉ូតូចេញពីភូមិ៣៥មកដល់និយាយថា រូបគេមកពីជក់ថ្នាំញៀននិងបំរុងកាប់គេម្នាក់ រួចបានប្រគល់ដាវសាមូរ៉ៃមកឲ្យឈ្មោះ អ៊ូ កាប់មកត្រូវក្បាលរបស់គេ(ម៉េងហ័រ ) មួយដាវដាច់ស្បែកក្បាលដល់លលាដ៏ ហើយភ្លាមៗត្រូវម្តាយនាំទៅឲ្យគ្រូពេទ្យក្នុងភូមិសាមគ្គីដេររបួសចំនួន១២ថ្នេររួចបញ្ជូនបន្តទៅសង្រ្គោះនៅគ្លីនិក១១៥ ក្រុងកំពង់ចាមតែម្តង ៕
ចែករំលែកព័តមាននេះ