រាជធានីភ្នំពេញ ៖ ដោយសារដំណើរការស្ថាបនាផ្លូវ និងដាក់ប្រព័ន្ធលូបង្ហូរទឹកអមសងខាងផ្លូវព្រះមុនីរ៉េត ទៅផ្លូវចំការដូង គិតពីគល់ស្ពានស្ទឹងមានជ័យ ដល់ស្ពានព្រែកជ្រៃ ក្នុងភូមិសាស្ត្រខណ្ឌមានជ័យ និងខណ្ឌដង្កោ ដែលមានការយឺតយ៉ាវ ត្រូវបានអះអាងថា បណ្តាលមកពីអគ្គិសនីកម្ពុជាមិនសហការចុះដកបង្គោលភ្លើងរំកិលចេញពីទីតាំងចាស់ ដើម្បីពង្រីកផ្លូវនិងដាក់ប្រព័ន្ធលូថ្មីឱ្យបានឆាប់រហ័សមុនរដូវវស្សា ។
អ្នករស់នៅអមសងខាងផ្លូវឃើញគេធ្វើផ្លូវយឺតបែបនេះ បានសំណូមពរសុំឱ្យអគ្គិសនីកម្ពុជាចាត់ភ្នាក់ងារចុះដកបង្គោលភ្លើងចេញពីទីតាំងចាស់ឱ្យបានឆាប់ ដើម្បីដំណើរការការដ្ឋានដាក់លូថ្មី និងស្ថាបនាផ្លូវឱ្យបានរួចរាល់មុនរដូវវស្សានេះ ។ ផ្តើមចេញពីបាតុភាពខាងលើនេះ ពេលរដូវភ្លៀងធ្លាក់ម្តងៗ នាពេលកន្លងមកនេះ គេបានឃើញទឹកដក់នៅលើដងផ្លូវ ដោយសារប្រព័ន្ធលូចាស់មានលក្ខណៈតូច និងខូចខាតជាអន្លើៗលែងដំណើរការទៅហើយ ។ ឆ្លើយតបទៅនឹងតម្រូវការជាក់ស្តែង សាលារាជធានីភ្នំពេញ និងមន្ទីរសាធារណការរាជធានី បានបើកដំណើរការការដ្ឋានស្ថាបនាផ្លូវបេតុងថ្មី ដែលមានទទឹងទំហំ២២ម៉ែត្រ និងប្រព័ន្ធលូអមសងខាង ដែលមានមុខកាត់១ម៉ែត្រកន្លះ ។
ប៉ុន្តែគម្រោងអភិវឌ្ឍន៍នោះ មានការយឺតយ៉ាវ ហើយអ្នករស់នៅអមសងខាងផ្លូវ បានសួរនាំទៅក្រុមហ៊ុនដែលកំពុងទទួលភារកិច្ចស្ថាបនាផ្លូវ និងប្រព័ន្ធលូមួយខ្សែខាងលើនេះ បានឆ្លើយថា បណ្តាលមកពីអគ្គិសនីកម្ពុជាមិនសហការដកបង្គោលភ្លើងចេញពីទីតាំងចាស់រំកិលទៅទីតាំងថ្មីឱ្យបានឆាប់រហ័ស ។ បើយកបង្គោលភ្លើងចេញឱ្យផុតពីការដ្ឋានផ្លូវនោះ ក្រុមហ៊ុនដំណើរការស្ថាបនាបានលឿន និងឆាប់ជាមិនខាន ។ ចំពោះបញ្ហាខាងលើនេះ ប្រភពពីសាលារាជធានីភ្នំពេញ បានឱ្យដឹងថា សាលារាជធានីភ្នំពេញ បានជូនដំណឹងទៅអគ្គិសនីកម្ពុជាជិតកន្លះឆ្នាំកន្លងមកហើយ ប៉ុន្តែមិនដឹងថា មូលហេតុអ្វី បានជាអគ្គិសនីកម្ពុជាមិនចុះសហការដកបង្គោលភ្លើងចេញពីតំបន់អភិវឌ្ឍន៍ផ្លូវ និងប្រព័ន្ធដាក់លូថ្មីខាងលើនេះ ។
ពាក់ព័ន្ធបញ្ហាខាងលើនេះ មន្ត្រីជាន់ខ្ពស់មួយរូបនៅអគ្គិសនីកម្ពុជា បានប្រាប់កោះសន្តិភាពថា «អ្នកថាបានតែថា មិនបានពិចារណានូវការពិតទេ» ។ មន្ត្រីដដែលបានបំភ្លឺថា «បង្គោលភ្លើងមានតែ២ដើមទេ ដែលទាមទារឱ្យរដ្ឋអំណាចមូលដ្ឋានជួយសម្រួលរកកន្លែងដាំ ព្រោះកន្លងមកដីឯកជននៅទីនោះ គេមិនឱ្យដាំបង្គោលភ្លើងលើដីគេទេ ។ ចំណែកខ្សែព្រោងព្រាតទីនោះ មិនមែនខ្សែរបស់អគ្គិសនីកម្ពុជាទេ វាជាខ្សែទូរស័ព្ទរបស់ក្រុមហ៊ុនគេ ។ អគ្គិសនីអត់ហ៊ានប៉ះពាល់ខ្សែទូរស័ព្ទទេ ខ្លះទៀតជាខ្សែទូរទស្សន៍» ។ មន្ត្រីជំនាញដដែលប្រាប់កោះសន្តិភាពថា «ជួយប្រាប់ផង កុំឃើញមានខ្សែតាមបង្គោលចេះតែឆ្លើយដាក់ EDC ដាក់កំហុសមកលើ EDC ទាំងផ្ទាំងអីចឹង» ។
ទោះជាយ៉ាងណាក៏ដោយ មន្ត្រីជំនាញដដែលបញ្ជាក់ថា ថ្ងៃច័ន្ទនេះ ខាងEDC នឹងចុះទៅពិនិត្យទៀត សុំឱ្យរដ្ឋអំណាចមូលដ្ឋានតំបន់នោះ ជួយសហការផ្តល់ទីតាំងថ្មី ដើម្បីត្រូវដាក់បង្គោលដែលដកនោះ ព្រមទាំងទៅជួយចង្អុលតបវិញថា មួយណាជារបស់EDC មួយណាមិនមែនជារបស់EDC ដើម្បីកុំឱ្យអ្វីក៏ឆ្លើយដាក់មូលលើ EDC ទៀត ៕
ចែករំលែកព័តមាននេះ