ខេត្តកោះកុង ៖ នៅវេលាម៉ោងប្រហែល១០ព្រឹកថ្ងៃទី៨ មេសា មានឧទ្ធម្ភាគចក្រមួយគ្រឿង បានមកចុះចតនៅមុខសាលាខេត្តកោះកុង ហើយតែមួយប៉ប្រិចភ្នែកប៉ុណ្ណោះ ក៏ទ្បើងត្រទ្បប់ទៅវិញ ដោយមានរថយន្តមន្ត្រីសមត្ថកិច្ចក្នុងខេត្តមួយគ្រឿងនៅរង់ចាំទទួលមនុស្ស ដែលចុះពីឧទ្ធម្ភាគចក្រនេះ រួចក៏ចេញរថយន្តឆ្ពោះទៅព្រំដែនចាំយាមយ៉ាងលឿន ធ្វើឱ្យមានការភ្ញាក់ផ្អើលជុំវិញការចុះចតរបស់ឧទ្ធម្ភាគចក្រខាងលើនេះ ។
ប៉ុន្តែមានមន្ត្រីគយមួយរូបសុំមិនបញ្ចេញឈ្មោះ បានបង្ហើបឱ្យដឹងថា មនុស្សដែលជិះឧទ្ធម្ភាគចក្រមកនេះ គឺជាកូនលោករដ្ឋលេខាធិការក្រសួងមួយ ហើយគឺជាម្ចាស់រថយន្តទ្បិចស៊ីស៥៧០ ដែលត្រូវបានគយចល័ត រួមនឹងគយកោះកុងព័ទ្ធចាប់កាលពីថ្ងៃទី៥ មេសា ខណៈពេលដែលរថយន្តនេះ បានបើកឆ្លងចូលពីប្រទេសថៃ តាមច្រកទ្វារអន្តរជាតិចាំយាម រួមមកសម្ងំលាក់ខ្លួននៅក្នុងកាស៊ីណូកោះកុងរីសេត ដែលជារថយន្តគេចពន្ធ ។ ប្រភពដដែលបានបញ្ជាក់ថា ខណៈពេលសមត្ថកិច្ចធ្វើការព័ទ្ធចាប់នោះ ពុំមានឃើញម្ចាស់ចេញមុខ ប៉ុន្តែពេលនេះ រថយន្តខាងលើត្រូវបានបង់ពន្ធ ព្រមទាំងពិន័យផងនោះ រួចរាល់អស់ហើយ នៅការិយាល័យបង្ក្រាបបទល្មើសគេចពន្ធនៃអគ្គនាយកដ្ឋានគយ និងរដ្ឋាករកម្ពុជា ដែលចំនួនទឹកប្រាក់សរុបអស់ជាង៤០០លានរៀល ស្មើនឹងជាង១០ម៉ឺនដុល្លារ ហើយម្ចាស់រថយន្តទោះបីមិនចេញមុខឱ្យគេស្គាល់នៅកន្លែងព័ទ្ធចាប់ តែពេលនេះបានចូលខ្លួនទៅបង់ប្រាក់ពន្ធនៅចំពោះមុខសមត្ថកិច្ចគយហើយដែរ ។
ប្រភពពីមន្ត្រីសាលាខេត្ត បន្ទាប់ពីបានឃើញឧទ្ធម្ភាគចក្រចុះចតនៅមុខសាលាខេត្តរបស់ខ្លួន បានពេបជ្រាយស្ទើរគ្រប់គ្នាថា គិតៗទៅអ្នកដែលរកស៊ីគេចពន្ធ គឺសុទ្ធតែជាកូនអ្នកធំ និងអ្នកមានអំណាច មានដល់អាកន្ទុំរុយជិះនៅខំគេចពន្ធទៀត ។ នេះជាភ័ព្វសំណាងណាស់ ដែលក្រុមសមត្ថកិច្ចគយខិតខំស្ទាក់ចាប់បទល្មើសនេះ បានម្តង ចុះរយៈពេលកន្លងមករាប់ខែរាប់ឆ្នាំ រថយន្តគេចពន្ធបែបនេះ ចូលអស់រាប់សិបគ្រឿងទៅហើយ ល្បីពេញខេត្តកោះកុង តើរដ្ឋបានបាត់ប្រាក់ពន្ធអស់ប៉ុន្មាន គឺរាប់លានដុល្លារឯណោះ ។ ប្រភពពីសមត្ថកិច្ចគ្រប់ស្ថាប័ននៅច្រកទ្វារអន្តរជាតិចាំយាម បានឱ្យដឹងថា កន្លងមកច្រកទ្វារអន្តរជាតិចាំយាម ខិតខំទប់ស្កាត់បទល្មើសសព្វសារពើ ជាពិសេសចាប់តាំងពីប្រមុខរាជរដ្ឋាភិបាលមានគោលការណ៍ប្រមូលពន្ធឱ្យបាន១០០% មក ប៉ុន្តែផ្ទុយទៅវិញ អ្នកមានអំណាចខ្លះ មានប្រាក់រឹតតែខំគេចពន្ធ មិនបានចូលរួមជាមួយគោលការណ៍បង់ពន្ធ១០០% តាមគោលការណ៍នេះទ្បើយ ។
ជាក់ស្តែង រថយន្តដែលត្រូវបានសមត្ថកិច្ចគយចាប់កាលពីថ្ងៃទី៥ មេសា ពាក់ស្លាកលេខ រដ្ឋ៧.២.៦៨៦៨ ជាស្លាកលេខរថយន្តរបស់លោកធំម្នាក់ ។ ពិតណាស់ថា បទល្មើសធំៗបែបនេះ មន្ត្រីថ្នាក់ក្រោម ឬពលរដ្ឋសុទ្ធសាធ ដែលមានលុយចាយមិនអស់ក៏មិនហា៊នក្បត់គោលការណ៍ប្រមុខរាជរដ្ឋាភិបាលបែបនេះដែរ ៕
ចែករំលែកព័តមាននេះ