ខេត្តប៉ៃលិន ៖ នៅក្នុងសាលប្រជុំសាលាខេត្ត កាលពីវេលាម៉ោង៨ព្រឹកថ្ងៃទី១១ មេសា ២០១៤ មានប្រារព្ធពិធីប្រជុំផ្សព្វផ្សាយសារាចរណែនាំស្តីពីពិធីបុណ្យចូលឆ្នាំថ្មីប្រពៃណីជាតិ ដែលនឹងចាប់ផ្តើមពីថ្ងៃទី១៤-១៦ មេសា ២០១៤ ខាងមុខនេះ ក្រោមអធិបតីភាពលោក កើត សុធា អភិបាលរងខេត្ត និងមានការអញ្ជើញចូលរួមពីសំណាក់មន្រ្តីសាលាខេត្ត មន្រ្តីនគរបាល និងកងរាជអាវុធហត្ថស្រុក-ក្រុង និងខេត្ត ព្រមទាំងមន្រ្តីមកពីមន្ទីរជុំវិញខេត្តយ៉ាងច្រើនកុះករ ។
លោកកើត សុធា អភិបាលរងខេត្ត បានក្រើនរំលឹកដល់មន្រ្តីនគរបាល កងរាជអាវុធហត្ថស្រុក ក្រុង និងខេត្តឱ្យដឹងថា នាឱកាសចូលឆ្នាំប្រពៃណីជាតិខ្មែរខាងមុខនេះ ត្រូវឱ្យសមត្ថកិច្ចគ្រប់លំដាប់ថ្នាក់ យកចិត្តទុកដាក់ការពារសុវត្ថិភាពប្រជាពលរដ្ឋទាំងនៅតាមមូលដ្ឋាន ក៏ដូចជានៅតាមដងផ្លូវនានា ដែលពួកគាត់ធ្វើដំណើរទៅលេងកម្សាន្តនៅតាមវត្តអារាម ក៏ដូចជានៅតាមរមណីយដ្ឋាននានានៅក្នុងខេត្តផងដែរ ។
លោកបានបន្តទៀតថា មិនត្រូវឱ្យក្រុមអាជីវករណាម្នាក់ លក់ថង់ច្រកទឹកឱ្យយុវជនគប់ដាក់គ្នាទៅវិញទៅមកនោះឡើយ ដែលជាហេតុនាំឱ្យមានគ្រោះថ្នាក់ចរាចរណ៍កើតឡើងជាយថាហេតុ ហើយម្យ៉ាងវិញទៀតការច្រកទឹកគប់គ្នានេះ អាចបង្កទៅជាសំរាមព្រោងព្រាតនៅតាមដងផ្លូវ ដែលមិនអាចទទួលយកបាន ធ្វើឱ្យបាត់បង់សោភណភាពទីក្រុង ។
ដូច្នេះក្រុមសមត្ថកិច្ចទាំងអស់ នៅពេលប្រទះឃើញក្រុមអាជីវករណាម្នាក់លក់កូនថង់ច្រកទឹកលក់ ត្រូវតែហៅគាត់មកសួរនាំ និងណែនាំឱ្យឈប់លក់បន្តទៀត ។
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ