រាជធានីភ្នំពេញ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា និងជាអនុប្រធានគណបក្សប្រជាជនកម្ពុជា បានជួបសន្ទនាគ្នាតាមទូរស័ព្ទជាមួយលោក សម រង្ស៊ី ប្រធានគណបក្សសង្គ្រោះជាតិ ដោយការឆ្លើយឆ្លងគ្នាតាមទូរស័ព្ទនេះមានរយៈពេល៤៥នាទី នាព្រឹកថ្ងៃទី០៩ មេសា ២០១៤ ។
នេះបើយោងតាមមន្រ្តីជាន់ខ្ពស់គណបក្សសង្គ្រោះជាតិ លោក អេង ឆៃអ៊ាង ដែលត្រូវបានគេហទំព័រមួយស្រង់ប្រសាសន៏ចេញផ្សាយនៅថ្ងៃពុធនេះ ។ លោក ជាម យៀម មន្រ្តីជាន់ខ្ពស់គណបក្សប្រជាជនកម្ពុជា និងជាប្រធានគណៈកម្មការហិរញ្ញវត្ថុ ធនាគារនិងសវនកម្មនៃរដ្ឋសភានីតិកាលទី៥ មិនអាចទាក់ទងតាមទូរស័ព្ទដើម្បីសុំសេចក្តីអត្ថាធិប្បាយបន្ថែមបានទេ នៅរសៀលថ្ងៃទី០៩ មេសានេះ ដោយទូរស័ព្ទរបស់លោកទទួលការហៅចូលបានហើយ តែពុំមានអ្នកលើកទទួល ។
បើយោងតាមលោក អេង ឆៃអ៊ាង កិច្ចពិភាក្សាគ្នាតាមទូរស័ព្ទរវាងមេដឹកនំាកំពូលនៃគណបក្សទំាងពីរដែលឈ្នះអាសនៈសភានីតិកាលទី៥នាពេលនេះ គឺជាការជួបគ្នាក្រៅផ្លូវការតែប៉ុណ្ណោះ ។ យ៉ាងណាក៏ដោយ លោក អេង ឆៃអ៊ាង បានបញ្ជាក់ដែរថា កិច្ចពិភាក្សាគ្នាតាមទូរស័ព្ទរយៈពេល៤៥នាទីនេះ មេដឹកនំាទំាងពីរបានផ្តោតសំខាន់ទៅលើការបោះឆ្នោតជ្រើសរើសសមាជិកសភា និង ការបោះឆ្នោតជ្រើសរើសសមាជិកក្រុមប្រឹក្សាឃុំ-សង្កាត់មុនអាណត្តិ ។ ការកែទម្រង់គណៈកម្មាធិការជាតិរៀបចំការបោះឆ្នោត និង ការកែទម្រង់ប្រព័ន្ឋផ្សព្វផ្សាយ ។
កាលពីថ្ងៃទី០៧ មេសា ២០១៤ ក្នុងពិធីចែកសញ្ញាបត្រជូនដល់និស្សិតវិទ្យាស្ថានវ៉ាន់ដា គណនេយ្យ សម្តេចនាយករដ្ឋមន្រ្តី ហ៊ុន សែន បានមានប្រសាសន៏ជាសាធារណៈឲ្យដឹងថា ការចរចាតាមបែបទូលាយវាងក្រុមការងារគណបក្សទំាងពីរមើលទៅហាក់ដូចជាជាប់គំាង ប៉ុន្តែការចរចាសម្ងាត់រវាងមេដឹកនំានៃគណបក្សទំាងពីរបានប្រព្រឹត្តទៅដោយរលូន នៅសល់តែចំណុចតូចមួយប៉ុណ្ណោះដែលនឹងត្រូវបន្តពិភាក្សាគ្នា ។
បើតាមសម្តេចតេជោ ហ៊ុន សែន គណបក្សទំាងពីរអាចនឹងស្រុះស្រួលគ្នានៅមុនចូលឆ្នាំប្រពៃណីជាតិខ្មែរខាងមុខនេះ ៕
ចែករំលែកព័តមាននេះ