រាជធានីភ្នំពេញ ៖ នៅទីបំផុតតារាចម្រៀងពូកែរាំប្រចាំផលិតកម្មហង្សមាសនាង ទេព បូព្រឹក្ស បានបង្ហាញពីតម្រុយខ្លះៗមួយចំនួនទៅលើអ្នកដែលបានក្លែងបន្លំបង្កើតជាគណនេយ្យហ្វេសប៊ុកដោយដាក់រូបរបស់នាង ហើយបង្ហោះរូបផ្សេងៗដែលមិនសមរម្យពាក់ព័ន្ធទៅនឹងបញ្ហានយោបាយ ។ ទេព បូព្រឹក្ស បានដាក់ការសង្ស័យនេះចំពោះមនុស្សម្នាក់ដែលធ្លាប់ស្គាល់គ្នា ខណៈពេលដែលនាងកំពុងបន្តស្វែងរកភស្តុតាងបន្ថែមទៀតដើម្បីដាក់បន្ទុកទៅលើជនដែលបានក្លែងបន្លំជារូបនាងបង្កើតហ្វេសប៊ុកក្លែងក្លាយនេះ។
បញ្ហាមួយនេះបានធ្វើឱ្យតារាចម្រៀងវ័យក្មេងរូបស្រស់រូបនេះឈឺក្បាលមិនស្ទើរឡើយ ហើយនាងបានអះអាងថា វាបានប៉ះពាល់យ៉ាងខ្លាំងទៅលើអាជីពសិល្បៈរបស់នាងបច្ចុប្បន្នដែលកំពុងតែដើរទៅតាមផ្លូវដ៏ត្រឹមត្រូវមួយនោះ។ ទេព បូព្រឹក្ស បានព្រមានម្ចាស់គណនេយ្យហ្វេសប៊ុកក្លែងក្លាយនោះឱ្យបញ្ឈប់ទង្វើរបស់ខ្លួនជាបន្ទាន់ក្នុងពេលដែលនាងកំពុងតែស្វែងរកអ្នកជំនាញផ្នែកព័ត៌មានវិទ្យាជួយនៅក្នុងបញ្ហានេះ។ នាងបញ្ជាក់ថា នាងកំពុងតែសង្ស័យទៅលើមនុស្សម្នាក់ដែលធ្លាប់ស្គាល់គ្នាពីមុនមក ប៉ុន្តែនេះគ្រាន់តែជាការសន្និដ្ឋានជំហានដំបូងប៉ុណ្ណោះ ដោយសារពេលនេះនាងមិនទាន់មានភស្តុតាងច្បាស់លាស់នៅឡើយ។
ចែករំលែកព័តមាននេះ