រាជធានីភ្នំពេញ ៖ បន្ទាប់ពីទើបតែត្រឡប់មកពីសម្ដែងនៅអាមេរិក និងបារាំងវិញ ស្រាប់តែមានពាក្យលេចឮថា តារាចម្រៀងសំនៀងស្រទន់ និងស្រគត់ស្រគំនាង សុគន្ធ នីសា ត្រៀមចេញទៅសម្ដែងនៅអាមេរិកជាថ្មីម្ដងទៀត ។ ពាក្យលេចឮនោះ សុគន្ធ នីសា បដិសេធដោយបញ្ជាក់ថា នាងមិនមានគម្រោងចេញទៅសម្ដែងនៅអាមេរិកឡើយ ។
រាជធានីភ្នំពេញ ៖ បន្ទាប់ពីទើបតែត្រឡប់មកពីសម្ដែងនៅអាមេរិក និងបារាំងវិញ ស្រាប់តែមានពាក្យលេចឮថា តារាចម្រៀងសំនៀងស្រទន់ និងស្រគត់ស្រគំនាង សុគន្ធ នីសា ត្រៀមចេញទៅសម្ដែងនៅអាមេរិកជាថ្មីម្ដងទៀត ។ ពាក្យលេចឮនោះ សុគន្ធ នីសា បដិសេធដោយបញ្ជាក់ថា នាងមិនមានគម្រោងចេញទៅសម្ដែងនៅអាមេរិកឡើយ ។
នៅក្នុងទំព័រហ្វេសប៊ុករបស់ សុគន្ធ នីសា នាពេលថ្មីៗនេះបានសរសេរបកស្រាយជាភាសាអង់គ្លេសផង និងខ្មែរផង ដោយបដិសេធចំពោះការលេចឮនោះ ។ នាងសរសេរថា «សួស្ដីអ្នកទាំងអស់គ្នា នាងខ្ញុំសូមបញ្ជាក់ថា ចាប់តាំងពីបានបញ្ចប់ការសម្ដែងនៅអាមេរិក និងបារាំងនាពេលថ្មីៗនេះមក ខ្ញុំមិនមានគម្រោងទៅសម្ដែងនៅទីនោះដូចដែលពាក្យចចាមអារ៉ាមនិយាយថា នាងខ្ញុំនឹងមានការសម្ដែងនៅទីនោះតាមកាលបរិច្ឆេទណាមួយទេ សូមទស្សនិកជនទាំងអស់កុំយល់ច្រឡំ និងជឿលើពាក្យចចាមអារ៉ាមមិនពិតទាំងនោះ» ។
បើទោះបីជាពាក្យលេចឮនោះមិនមានប្រភពច្បាស់លាស់ក៏ដោយ ប៉ុន្ដែពាក្យដែលចេញពីចង្កោមអ្នកស្និទ្ធស្នាលរបស់តារាចម្រៀង សុគន្ធ នីសា ហាក់សមស្របទៅនឹងសកម្មភាពចុងក្រោយរបស់នាង ខណៈពេលដែលនាងមិនសូវអើពើក្នុងការទាញយកប្រជាប្រិយភាពនៅក្នុងស្រុកឡើយ ដោយនាងស្រវាយកការសម្ដែងនៅក្រៅស្រុកជំនួសវិញ ។ លើសពីនេះ គេសង្ស័យថា មានបុរសអាណិកជនខ្មែរនៅអាមេរិកម្នាក់ព្យាយាមថ្ពក់យកបេះដូងរបស់នាងទៅឃុំគ្រង ។
មួយរយៈចុងក្រោយនេះ សុគន្ធ នីសា ហាក់មានការថមថយប្រជាប្រិយភាព បើទោះបីជាមុននេះនាងប្រញាប់ប្រញាល់ត្រឡប់មកពីសម្ដែងនៅបរទេសដើម្បីថតបទចម្រៀងសម្រាប់បុណ្យចូលឆ្នាំខ្មែរក៏ដោយ ប៉ុន្ដែសន្ទុះនៃការគាំទ្រទៅលើបទចម្រៀងរបស់នាងហាក់មានការថមថយមិនដូចពេលមុនទេ ។
សុគន្ធ នីសា ហាក់មិនសូវជាចាប់អារម្មណ៍ចំពោះបញ្ហានេះឡើយ ដោយនាងនៅតែបន្ដចេញទៅសម្ដែងនៅក្រៅប្រទេស ធ្វើឱ្យអ្នកគាំទ្ររបស់នាងមួយចំនួនខកចិត្ដយ៉ាងខ្លាំង ។ ការសម្រេចចិត្ដយល់ព្រមទទួលយករាល់ការចេញសម្ដែងនៅក្រៅប្រទេសរបស់ សុគន្ធ នីសា ក្នុងពេលនេះ អាចជាមូលហេតុមួយក្នុងកិច្ចខិតខំប្រឹងប្រែងដើម្បីរកប្រាក់បង្គ្រប់ថ្លៃផ្ទះដែលនាងបានទិញ ក្រោយពេលដែលផ្ទះរួមគ្នាជាមួយគូស្នេហ៍ចាស់របស់នាង គឺលោក សុខ ជំនោរ ទើបតែលក់ដាច់កាលពីពេលថ្មីៗនេះ ។
ការស្វែងរកប្រាក់បង្គ្រប់ទិញផ្ទះថ្មី ទំនងមិនមែនជាឧបសគ្គធំសម្រាប់តារាចម្រៀង សុគន្ធ នីសាទេ ព្រោះនៅដើមឆ្នាំនេះនាងបានចេញទៅសម្ដែងនៅសហរដ្ឋអាមេរិករយៈពេល៣ខែ ហើយនាងបានបន្ដច្រៀងនៅក្នុងប្រទេសបារាំង រយៈពេល១ខែកន្លះទៀត ដូច្នេះនាងរកចំណូលបានច្រើនក្រាស់ក្រែលអាចឱ្យនាងបង់រំលស់សម្រាប់ទឹកប្រាក់ដែលនៅសល់នោះបាន ។
រយៈពេល៣ឆ្នាំចុងក្រោយនេះ ខ្សែជីវិតរបស់អ្នកចម្រៀង សុគន្ធ នីសា មានការប្រែប្រួលជាបន្ដបន្ទាប់ ។ គេនៅចាំបានថា កាលពីអំឡុងឆ្នាំ២០១១ នាងបានផ្ដាច់ចំណងស្នេហ៍ដ៏កម្សត់កម្រពីកវី សុខ ជំនោរ បន្ទាប់ពីបានស្រឡាញ់ រួមរស់ជាមួយគ្នាអស់រយៈពេល៨ឆ្នាំ ។ បន្ទាប់មកនៅក្នុងឆ្នាំ២០១២ នាងបានប្តូរទ្រនំច្រៀងពីផលិតកម្មរស្មីហង្សមាសទៅផលិតកម្មថោន ដើម្បីគេចមុខឱ្យផុតពីគូស្នេហ៍ចាស់របស់នាង និងចាប់ឈោងអ្វីដែលថ្មី ។បច្ចុប្បន្ន សុគន្ធ នីសា កំពុងតែប្រឹងប្រែងដើម្បីអនាគតរបស់ខ្លួន ជាពិសេសរក្សា ឬបង្កើនប្រជាប្រិយភាពក្នុងអាជីពចម្រៀង ៕
ចែករំលែកព័តមាននេះ