ក្រសួងវប្បធម៌ និងវិចិត្រសិល្ប:បានអះអាងថា អ្នកចម្រៀងអាស៊ាន២៥០នាក់នឹងមកចូលរួមព្រឹត្តិការណ៍ប្រឡងចម្រៀងអន្តរជាតិជាពួកជាលើកទី១ នៅរាជធានីភ្នំពេញ ។ លោក សំ សំអាង ទីប្រឹក្សាក្រសួងវប្បធម៌ និងវិចិត្រសិល្ប:…
ក្រសួងវប្បធម៌ និងវិចិត្រសិល្ប:បានអះអាងថា អ្នកចម្រៀងអាស៊ាន២៥០នាក់នឹងមកចូលរួមព្រឹត្តិការណ៍ប្រឡងចម្រៀងអន្តរជាតិជាពួកជាលើកទី១ នៅរាជធានីភ្នំពេញ ។
លោក សំ សំអាង ទីប្រឹក្សាក្រសួងវប្បធម៌ និងវិចិត្រសិល្ប: បានថ្លែងថា ព្រឹត្តិការណ៍ដ៏មានសារ:សំខាន់នេះរៀបចំក្នុងគោលបំណងលើកស្ទួយវប្បធម៌ ទេសចរណ៍ និងបរិស្ថាន ។
លោកបានបញ្ជាក់ថា «ក្រុមចម្រៀងជាពួកអន្តរជាតិ គឺអញ្ជើញមកពីបណ្តាប្រទេសអាស៊ានចំនួន៧ក្រុម ដែលរួមមានកម្ពុជា២ក្រុម ឥណ្ឌូនេស៊ី២ក្រុម ម៉ាឡេស៊ី២ក្រុម និងថៃ១ក្រុម សរុបប្រមាណ២៥០នាក់» ។
លោកបានបន្តថា កម្មវិធីនេះគ្រោងនឹងបើកនៅល្ងាចថ្ងៃទី២៩ ខែឧសភា ឆ្នាំ២០២៤ នៅសាលមហោស្រពចតុម្មុខ ហើយបិទនៅថ្ងៃទី១ ខែមិថុនា ឆ្នាំ២០២៤ នៅសាលមហោស្រពក្នុងបរិវេណវិទ្យាស្ថានបច្ចេកទេសកម្ពុជា ។
ព្រឹត្តិការណ៍ប្រឡងចម្រៀងជាពួកអន្តរជាតិលើកទី១នេះ ក៏គ្រោងនឹងបន្ថែមនូវ «កម្មវិធីមិត្តភាព» ដែលនឹងរៀបចំធ្វើនៅទីលានវត្តភ្នំ និងផ្សារទំនើប ឬទីកន្លែងណាផ្សេងទៀតសម្រាប់សាធារណជនទូទៅបានទស្សនា ។
សូមបញ្ជាក់ថា ព្រឹត្តិការណ៍នេះ រៀបចំដោយ INTERKULTUR និង All Dreams Cambodia គាំទ្រដោយក្រសួងវប្បធម៌និងវិចិត្រសិល្ប: ក្រសួងទេសចរណ៍ ក្រសួងបរិស្ថាន ក្រសួងព័ត៌មាន និងសាលារាជធានីភ្នំពេញ ៕
ចែករំលែកព័តមាននេះ