ខេត្តព្រៃវែង ៖ មេតុងទីន២នាក់ប្តីប្រពន្ធត្រូវសមត្ថកិច្ចប៉ូលិសចាប់ខ្លួនពីបទរំលោភលើសេចក្តីទុកចិត្តព្រោះបានបោកប្រាស់ប្រជាពលរដ្ឋជាង១០០នាក់ដែលជាអាជីវករលក់ដូរនៅក្នុងផ្សារអ្នកលឿង ខ្លះជាមន្ត្រីរាជការស៊ីវិល និងជាអ្នកលក់ថ្នាំពេទ្យ មានទឹកប្រាក់ជាង២០០.០០០ដុល្លារ តាមការអះអាងពីកូនតុងទីន ។
លោកវរសេនីយ៍ឯកសេង សុភក្តិ ស្នងការរងខេត្តព្រៃវែងឱ្យដឹងថា ការចាប់ខ្លួនមេតុងទីនទាំង២នាក់ប្តីប្រពន្ធនេះគឺធ្វើឡើងទៅតាមពាក្យបណ្តឹងរបស់ប្រជាពលរដ្ឋដែលចាញ់បោកមេតុងទីន និងអនុវត្តតាមដីការបស់លោកសុខ កល្យាណ ប្រធានសាលាដំបូងខេត្តបង្គាប់ឱ្យចាប់ខ្លួនក្នុងនាមចៅក្រមស៊ើបសួរ ។ ក្រោយពីទទួលបានពាក្យបណ្តឹង និងដីកាបង្គាប់ឱ្យចាប់ខ្លួន កម្លាំងរបស់ការិយាល័យកណ្តាលនគរបាលព្រហ្មទណ្ឌនៃស្នងការដ្ឋាននគរខេត្តសហការជាមួយកម្លាំងរបស់ការិយាល័យកណ្តាលនគរបាលព្រហ្មទណ្ឌនៃស្នងការដ្ឋាននគរបាលរាជធានីភ្នំពេញតាមដាន និងចាប់បានមុខសញ្ញាឈ្មោះវ៉ែន សុវណ្ណ ភេទប្រុស អាយុ៥៥ឆ្នាំ ជាមន្ត្រីយោធាជាប្តី និងឈ្មោះថេង ធាវី ភេទស្រី អាយុ៣២ឆ្នាំ ជាប្រពន្ធ ។ ជនជាប់ចោទទាំង២នាក់ប្តីប្រពន្ធនេះបានស្នាក់នៅបណ្តោះអាសន្នក្នុងភូមិ៣ ឃុំព្រែកខ្សាយ«ខ» ស្រុកពាមរក៍ តែក្រោយពេលប្រមូលកើបលុយពីកូនតុងទីនបានច្រើនម៉ឺនដុល្លារហើយទាំង២នាក់នេះបានរត់គេចខ្លួនទៅនៅឯរាជធានីភ្នំពេញ ។
លោកវរសេនីយ៍ឯកបន្តទៀតថា ការចាប់ខ្លួនមេតុងទីនទាំង២នាក់ប្តីប្រពន្ធនេះគឺចោទពីបទរំលោភលើសេចក្តីទុកចិត្ត ព្រោះកន្លងមកជនទាំង២នាក់នេះបានក្លែងធ្វើជាមេតុងទីន មានតុងទីនលេងប្រមូលយកប្រាក់ក្នុង១ថ្ងៃៗ និងតុងទីនប្រមូលប្រាក់ប្រចាំខែ ហើយមេដេញយកខ្លួនឯងរហូតពុំដែលបានលើកូនម្តងណាឡើយ ។ លោកស្នងការរងបញ្ជាក់ថា នេះជាការអះអាងរបស់កូនតុងទីនដែលបានប្តឹង ។
ទាំងប្រជាពលរដ្ឋដែលជាអាជីវករលក់ដូរខ្នាតតូច ខ្នាតធំ អ្នកលក់ថ្នាំពេទ្យ ពិសេសអ្នកលក់គ្រឿងទេសបន្តិចបន្តួច បានសំណូមពរឱ្យសាលាដំបូងខេត្តជួយរកយុត្តិធម៌ឱ្យពួកគាត់ផង ព្រោះអស់ដើមទុនរកស៊ីហើយម្នាក់ៗជំពាក់គេទៀត ។ ពួកគាត់សម្តែងការហួសចិត្តថា មិនគួរខិតខំបេះពីមាត់ពង្រាត់ពីកដើម្បីសន្សំប្រាក់តាមរយៈការលេងតុងទីន សោះនេះក៏ព្រោះតែឃើញបានការប្រាក់ច្រើន ផ្ទុយទៅវិញប្រាក់ក៏បង់ថង់ក៏ដាច ៕
ចែករំលែកព័តមាននេះ