រាជធានីភ្នំពេញ ៖ បុរសជនជាតិអីុស្រាអែលម្នាក់ស្លៀកខោពណ៌តេអីុត្រឹមជង្គង់ ពាក់អាវយឺតវៀលក្លៀកពណ៌ក្រហម និងពាក់ម៉ាស់ផងបានធ្លាក់ពីជាន់ទី៥ក្នុងផ្សារទំនើបសុរិយា ស្ថិតក្នុងសង្កាត់ផ្សារថ្មីទី១ ខណ្ឌដូនពេញ កាលពីវេលាម៉ោង៦និង៣០នាទីល្ងាចថ្ងៃទី២០ វិច្ឆិកា បណ្តាលឱ្យស្លាប់ភ្លាមៗនៅនឹងកន្លែងនិងបង្កឱ្យមានការភ្ញាក់ផ្អើលយ៉ាងខ្លាំងហើយត្រូវបានមហាជនសន្និដ្ឋានជំហានដំបូងថាជារឿងឃាតកម្ម ។ មន្ត្រីនគរបាលឱ្យដឹងថា បុរសជនជាតិអីុស្រាអែលដែលជំហានដំបូងសន្និដ្ឋានថាធ្លាក់ពីជាន់ទី៥ក្នុងផ្សារទំនើបសុរិយាមានឈ្មោះTENNE BINJAMIN អាយុ៥៧ឆ្នាំ កាន់លិខិតឆ្លងដែនលេខ១០៩១៩៣៥៣ ផុតកំណត់នៅថ្ងៃទី២៨ កក្កដា ឆ្នាំ២០១៧ ។
ស្ត្រីម្នាក់និយាយដោយសុំមិនបញ្ចញឈ្មោះថា មុនពេលកើតហេតុគាត់បានឃើញបុរសរូបនេះឡើងតាមជណ្តើរយន្តអមដោយស្រ្តីម្នាក់ជាជនជាតិខ្មែរអាយុប្រហែលជាង៣០ឆ្នាំ សម្បុរសណ្តែកបាយ សក់ត្រឹមស្មាស្លៀកខោខូវប៊យពណ៌ខៀវ អាវយឺតដៃវែងពណ៌ខ្មៅទៅដល់ជាន់ទី៥ ហើយពួកគេឈរមើលក្មេងៗជិះស្គី។ បន្តិចក្រោយមក បុរសរូបនេះមកឈរជក់បារីម្នាក់ឯងហើយមិនដឹងជាយ៉ាងមេ៉ចស្រាប់តែឮសំឡេងដូចរបស់អ្វីមួយធ្លាក់ចុះមកជាន់ក្រោម។ ភ្លាមៗនោះ គាត់សម្លឹងមើលទើបដឹងថាបុរសជនជាតិបរទេសដែលឈរជក់បារីនេះបានធ្លាក់ ចំណែកស្ត្រីដែលរួមដំណើរក៏មិនដឹងទៅណាបាត់ដែរ ។ យុវជនម្នាក់អះអាងថា រូបគេបានឃើញបុរសជនបរទេសខាងលើឡើងតាមជណ្តើរយន្តជិតដល់ជាន់ទី៥ក៏ឈោងចាប់រូបផ្កាយដែលតាំងលម្អ ទើបបណ្តាលឱ្យរអិលជើងធ្លាក់ចុះមកជាន់ក្រោមប្រកាច់ស្លាប់តែម្តង ។
មន្ត្រីសាលាខណ្ឌដូនពេញមួួយរូបដែលចូលរួមពិនិត្យសពបុរសជនជាតិអីុស្រាអែលនោះបានលើកឡើងថា គាត់សង្កេតឃើញជារៀងរាល់ថ្ងៃចាប់ពីព្រឹករហូតដល់ពេលបិទ ផ្សារទំនើបសុរិយាតែងតែមានសន្តិសុខឈរយាមប្រចាំការតាមជណ្តើរយន្តជាន់នីមួយៗ លុះពេលហេតុកើតមានមនុស្សធ្លាក់ចុះមកជាន់ក្រោមស្លាប់បែរជាពួកគេថាមិនដឹងទៅវិញ សូម្បីសួរនាំរកកាមេរ៉ាសុវត្ថិភាពក៏ត្រូវគេបដិសេធដែរ បញ្ហាទាំងនេះធ្វើឱ្យមហាជនសង្ស័យថាជារឿងឃាតកម្មសម្លាប់មនុស្សដោយប្រើវិធីច្រានទម្លាក់ពីជាន់ទី៥។ ទោះជាយ៉ាងណាលោកសង្ឃឹមថានគរបាលជំនាញនឹងធ្វើការស្រាវជ្រាវរកមូលហេតុពិតប្រាកដដែលបណ្តាលឱ្យបុរសនេះស្លាប់ នេះបើសិនជាសមត្ថកិច្ចចង់រកមូលហេតុជាក់លាក់នោះ ។
ប៉ុន្តែយោងតាមរបាយការណ៍របស់សមត្ថកិច្ចមូលដ្ឋានសហការជាមួយនគរបាលជំនាញបានសន្និដ្ឋានថា បុរសជនជាតិអីុស្រាអែលឈ្មោះTENNE BINJAMIN បានធ្វើអត្តឃាតដោយលោតពីជាន់ទី៥ក្នុងផ្សារទំនើបសុរិយាបណ្តាលឱ្យបាក់ដើមដៃខាងស្តាំនិងបែកក្បាលធ្ងន់ទើបបណ្តាលឱ្យស្លាប់ភ្លាមៗនៅនឹងកន្លែង ។ក្រោយពីនគរបាលជំនាញពិនិត្យយ៉ាងប្រញាប់ប្រញាល់ខុសពីធម្មតារួច សពបុរសជនជាតិអីុស្រាអែលរូបនេះត្រូវបានគេដឹកតាមរថយន្តយកទៅតម្កល់នៅវត្តស្ទឹងមានជ័យ សង្កាត់ស្ទឹងមានជ័យ ខណ្ឌមានជ័យ ៕
ចែករំលែកព័តមាននេះ