រាជធានីភ្នំពេញ ៖ សមត្ថកិច្ចនគរបាលការិយាល័យប្រឆាំងការជួញដូរមនុស្ស និងការពារអនីតិជនរាជធានីភ្នំពេញ បានចាប់ឃាត់ខ្លួនគ្រូបង្រៀនភាសាអង់គ្លេសម្នាក់ពាក់ព័ន្ធថា បានចែកចាយរូបភាពអាសអាភាស និងគំរាមកំហែង ។ គ្រូបង្រៀនដែលសមត្ថកិច្ចចាប់ឃាត់ខ្លួនឈ្មោះ GONZALES FRED ERIC ភេទប្រុស អាយុ៣៣ឆ្នាំ ជាជនជាតិបារាំង ស្នាក់នៅផ្ទះជួលលេខ៤០E1 ផ្លូវលេខ៤២៦ សង្កាត់ទួលទំពូង ខណ្ឌចំការមន ។
អង្គហេតុនៃការឃាត់ខ្លួនគ្រូបង្រៀនជនជាតិបារាំងខាងលើនេះ ត្រូវបានសមត្ថកិច្ចនគរបាលឱ្យដឹងថា នៅថ្ងៃទី២៣ តុលា ២០១២ ការិយាល័យប្រឆាំងការជួញដូរមនុស្ស និងការពារអនីតិជនរាជធានីភ្នំពេញ បានឃាត់ខ្លួនជនជាតិបារាំងម្នាក់ពីបទចែកចាយរូបភាពអាសអាភាស និងគំរាមកំហែងតាមពាក្យបណ្តឹងរបស់ជនរងគ្រោះជាជនជាតិវៀតណាម អាយុ២០ឆ្នាំ ជាស្រីរកស៊ីផ្លូវភេទ ស្នាក់នៅផ្ទះជួលសង្កាត់ច្បារអំពៅ១ ខណ្ឌមានជ័យ ។ ពាក្យបណ្តឹងរបស់ជនរងគ្រោះមានបញ្ជាក់ថា ថ្ងៃមួយជនជាតិបារាំងរូបនេះបាននាំនាងទៅបម្រើកាមតណ្ហាដោយរូបគេបង្ខំថតរូបនាងអាក្រាតតាមទូរស័ព្ទ ។ បន្ទាប់ពីមានរូបថតនោះហើយជនជាតិបារាំងជាគ្រូបង្រៀនភាសាអង់គ្លេសតែងតែទូរស័ព្ទទាក់ទងនាងទៅដេកទៀត តែជនរងគ្រោះមិនព្រមទៅទើបគេគំរាមថា បើមិនទៅដេកជាមួយគេទេ គេនឹងយករូបអាក្រាតរបស់នាងទៅបង្ហាញជាសាធារណៈ ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ