ខេត្តស្ទឹងត្រែង ៖ បុរសម្នាក់ត្រូវបងប្រុសបង្កើតយកកាំបិតត្រួសព្រៃ(កាំបិតផ្គាក់)កាប់ចំថ្គាមស្តាំក្រោមគុម្ពត្រចៀកដេកដួលស្លាប់នៅនឹងកន្លែង កាលពីល្ងាចថ្ងៃទី១០ តុលា ២០១២ នៅភូមិសេសាន ឃុំកំភុន ស្រុកសេសាន បន្ទាប់ពីប្រវាយប្រតប់គ្នាដោយសារតែខឹងប្រពន្ធរអ៊ូរទាំ និងហៅឱ្យទៅផ្ទះ។
ប្រភពព័ត៌មានពីកន្លែងកើតហេតុឱ្យដឹងថា មុនពេលកើតហេតុជនរងគ្រោះបានមកផឹកស៊ីនៅផ្ទះបងប្រុសរបស់ខ្លួនតាំងពីវេលាម៉ោង១០ព្រឹក រហូតដល់ម៉ោង៦ល្ងាច ហើយគេឮសូរសំឡេងប្រកែកគ្នា និងមានការប្រតាយប្រតប់គ្នានៅលើផ្ទះ មួយសន្ទុះក្រោយមកគេឃើញបងប្រុសរបស់ជនរងគ្រោះម្នាក់ទៀតរត់ឡើងទៅលើផ្ទះកើតហេតុ ខណៈកំពុងតែប្រតាយប្រតប់ ស្រាប់តែបាត់សំឡេងរៀងៗខ្លួន ដែលអ្នកជិតខាងនិយាយថា មិនបានចាប់អារម្មណ៍រឿងហេតុនោះឡើយ ព្រោះវាជាទម្លាប់របស់អ្នកផឹកស៊ីទៅហើយ ។
ស្ត្រីឈ្មោះ នួន អាយុ២៨ឆ្នាំ ជាភរិយារបស់ជនរងគ្រោះបាននិយាយថា មុនកើតហេតុគាត់បានទៅប្រាប់ប្តីរបស់ខ្លួននៅផ្ទះបងថ្លៃ(ផ្ទះកើតហេតុ)ថា ឱ្យឈប់ផឹកស៊ីទៅ ព្រោះផឹករាល់ថ្ងៃហើយ រហូតដល់វេលាម៉ោង៦ល្ងាចគាត់(ប្រពន្ធ)បានទៅស្តីបន្ទោសឱ្យប្តីជាថ្មីម្តងទៀត ដោយនិយាយថា«មួយថ្ងៃៗគិតតែផឹក មិនខ្វាយខ្វល់ពីប្រពន្ធកូន មិនគិតរកស៊ីអីទេ ។ ខណៈនោះជនរងគ្រោះក៏ខឹង ហើយទាញកាំបិតនៅក្បែរដៃបម្រុងកាប់ប្រពន្ធរបស់ខ្លួន តែបានបងប្រុសដែលផឹកស៊ីជាមួយឃាត់ រូបគេជាប្រពន្ធក៏រត់ទៅផ្ទះរបស់ខ្លួនវិញ ប្រហែល១៥នាទីសាច់ញាតិមកប្រាប់ថា ប្តីឯងស្លាប់ហើយ ។
លោក ដួង ស៊ីវត្ថា នាយការិយាល័យព្រហ្មទណ្ឌកម្រិតធ្ងន់នៃស្នងការដ្ឋាននគរបាលខេត្តបានឱ្យដឹងថា ជនសង្ស័យមានគ្នា២នាក់ ១-ឈ្មោះ ឡុប ចាន់សាបុត្រ ភេទប្រុស អាយុ៤៨ឆ្នាំ ជាកសិករ (ម្ចាស់ផ្ទះកើតហេតុ) ជាអ្នកប្រតាយប្រតប់ ២-ឈ្មោះ ឡុប ចាន់សុខា ភេទប្រុស អាយុ៤៧ឆ្នាំ ជាកសិករ (អ្នកកាប់) ខណៈពេលមកជួយ និងជនរងគ្រោះឈ្មោះ ឡុប ស៊ីប៊ុនណា អាយុ៣៨ឆ្នាំ ជាកសិករ ទាំង៣នាក់ជាបងប្អូនបង្កើត រស់នៅភូមិសេសាន ឃុំកំភុន ស្រុកសេសាន ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ