រាជធានីភ្នំពេញ ៖ អាជ្ញាធរខណ្ឌដង្កោដឹកនាំដោយលោក នុត ពុធដារ៉ា ជំនួយការសម្តេចអគ្គមហាសេនាបតីតេជោ ហ៊ុន សែន និងជាអភិបាលខណ្ឌដង្កោបានចុះទៅពិនិត្យពីស្ថានភាពការបូមទឹកដាក់ស្រែប្រជាពលរដ្ឋជាង២០០ហិកតាដែលកំពុងជួបគ្រោះរាំងស្ងួតនៅក្នុងភូមិ ចំនួន៣របស់សង្កាត់ប្រទះឡាង ខណ្ឌដង្កោ ។ សកម្មភាពនោះបានប្រព្រឹត្តទៅកាលពព្រឹកថ្ងៃទី១៧ សីហា នៅស្ថានីយបូមទឹកសម្តេចហ៊ុន សែនទី៣៩ ដែលមានទីតាំងស្ថិតនៅក្នុងភូមិប្រទះឡាង សង្កាត់ប្រទះឡាង ខណ្ឌដង្កោ ដោយមានការអញ្ជើញចូលរួមពីសំណាក់លោក តិមា សោភា លោកប្រាជ្ញ សីហា អភិបាលរងខណ្ឌ ព្រមទាំងអាជ្ញាធរសង្កាត់ និងប្រជាពលរដ្ឋជាច្រើនទៀត ។
លោកឯម ឆែម ចៅសង្កាត់ប្រទះឡាង បានឲ្យដឹងថា ស្រូវសន្ទូងរបស់ប្រជាកសិករក្នុងភូមិចំនួន៣នៅសង្កាត់ប្រទះឡាងជាង២០០ហិកតា គឺភូមិភា ភូមិប្រទះឡាង និងភូមិអង្គដែលមានប្រជាពលរដ្ឋជាង៩០០គ្រួសារកំពុងជួបប្រទះ គ្រោះរាំងស្ងួតបណ្តាលឲ្យក្រៀមស្វិតងាប់ជាបន្តបន្ទាប់ ។ ដោយសារបញ្ហាបែបនេះហើយ ទើបអាជ្ញាធរសង្កាត់ធ្វើរបាយការណ៍ជូនទៅលោកអភិបាលខណ្ឌ ដើម្បីរិះរកវិធីសាស្រ្តសង្គ្រោះស្រូវសន្ទូងរបស់ប្រជាពលរដ្ឋ ។ ម៉្យាងដោយសារនៅតំបន់នោះមានស្ថានីយបូមទឹកសម្តេចហ៊ុន សែនទី៣៩ស្រាប់ ទើបលោកអភិបាលខណ្ឌរាយការណ៍បន្តទៅសាលារាជធានីភ្នំពេញហើយលោកអភិបាលរាជធានី កែប ជុតិមា បានផ្តល់ប្រេងសម្រាប់ចាក់ម៉ាស៊ីនបានដំណើរការបូមចេញពីស្ទឹងព្រែកត្នោតដើម្បីស្រោចស្រពស្រូវសន្ទូងប្រជាពលរដ្ឋឱ្យផុតពីគ្រោះមហន្តរាយ ។
លោកនុត ពុធដារ៉ាអភិបាលខណ្ឌដង្កោបានណែនាំដល់មន្ត្រីអាជ្ញាធរសង្កាត់ ទាំងអស់ត្រូវតែយកចិត្តទុកដាក់ចំពោះស្រូវសន្ទូងរបស់ប្រជាពលរដ្ឋនារដូវវស្សានេះ ដែលកំពុងជួបប្រទះគ្រោះរាំងស្ងួតហើយត្រូវតែរួសរាន់រាយការណ៍ឲ្យបានទាន់ពេលដើម្បីយើងរួមគ្នាជួយសង្គ្រោះ ។ លោក នុត ពុធដារ៉ា បានបន្តទៀតថា ប្រេងដែលចាក់ម៉ាស៊ីនបូមទឹកនេះបានមកពីលោកកែប ជុតិមា អភិបាលរាជធានីភ្នំពេញ ដែលនេះគឺជាការគិតគូរយ៉ាងខ្ពស់ពីសំណាក់ថ្នាក់ដឹកនាំគ្រប់ជាន់ថ្នាក់ចំពោះតម្រូវការចំាបាច់របស់ប្រជាពលរដ្ឋក្នុងការបង្កបង្កើនផលស្រូវដែលមិនចាំបាច់តែមានទឹកភ្លៀងក៏យើងអាចធ្វើស្រែបានដែរ ។
នៅក្នុងឱកាសនោះ លោកអភិបាលខណ្ឌក៏បានណែនាំដល់ប្រជាពលរដ្ឋទាំងអស់ សុំចេះយោគយល់ និងកុំមានវិវាទគ្នាព្រោះតែការដណ្តើមទឹកគ្នាឲ្យសោះមុន និងក្រោយគង់តែបានទឹកទាំងអស់គ្នា ព្រោះម៉ាស៊ីននេះអាចបូមទឹកស្រោចស្រពលើផ្ទៃដីរាប់រយហិកតាឯណោះមិនឲ្យប្រជាពលរដ្ឋខ្វះទឹកនោះឡើយ ៕
ចែករំលែកព័តមាននេះ