រាជធានីភ្នំពេញ ៖ ក្នុងនាមជាប្រធានសិល្បករខ្មែរ លោកសុះ ម៉ាច បានធ្វើការអំពាវនាវជាថ្មីម្តងទៀតទៅកាន់សិល្បករខ្មែរទាំងចាស់ទាំងថ្មីឲ្យមានការរួបរួមគ្នាតែមួយនៅក្នុងសមាគមដើម្បីជាប្រយោជន៍ក្នុងការទ្រទ្រង់វិស័យសិល្បៈឲ្យកាន់តែមានការរីកចំរើន និងចូលរួមជាសមាគមតែមួយក្នុងការជួយដល់សិល្បករដែលចាស់ជរា មានជំងឺ និងបាត់បង់សមត្ថភាព។
ថ្លែងប្រាប់កោះសន្តិភាពនៅថ្ងៃទី១៥ សីហា ឆ្នាំ២០១២នេះ លោកសុះ ម៉ាច បានក្រើនរំលឹកជាថ្មីដល់អ្នកសិល្បៈទាំងអស់មេត្តាធ្វើការរួបរួមគ្នា ដើម្បីជួយទ្រទ្រង់ដល់វិស័យសិល្បៈខ្មែរ ហើយបានអំពាវនាវដល់សិល្បករទាំងចាស់ទាំងថ្មីទាំងអស់ដែលមិនទាន់មកចូលរួមនៅក្នុងសមាគមសិល្បករខ្មែរឲ្យរួសរាន់ចូលរួមក្នុងសមាគមតែមួយ ដើម្បីជាប្រយោជន៍លើកស្ទួយសិល្បៈផង និងបានដើរតួជាសប្បុរសធម៌ផងក្នុងការជួយឧបត្ថម្ភដល់សិល្បករចាស់ៗដែលគាត់បាត់បង់សមត្ថភាពក្នុងការសម្តែង។
លោកបញ្ជាក់ថា កន្លងមកសមាគមសិល្បករខ្មែរបានដើរតួនាទីយ៉ាងសំខាន់ក្នុងការលើកស្ទួយដល់វិស័យសិល្បៈ ជាពិសេសនោះសមាគមក៏មានតួនាទីក្នុងការជួយរកថវិកាពីសប្បុរសជនគ្រប់មជ្ឈដ្ឋាន ដើម្បីជួយដល់សិល្បករចាស់ៗដែលគាត់មានជំងឺ។ លោកបន្តថា ជាក់ស្តែងកាលពីពេលថ្មីៗនេះលោកបាននាំយកថវិការបស់សប្បុរសជនទៅប្រគល់ជូនលោកតាប្រាជ្ញ ឈួន ដែលជាអ្នកដេញចាប៉ី ជើងចាស់ដែលកំពុងសម្រាកព្យាបាលជំងឺនៅឯស្រុកកំណើតនៅក្នុងស្រុកទ្រាំង ខេត្តតាកែវ។ ថវិកាដែលនាំយកទៅប្រគល់ជូននោះមានចំនួន១លានរៀលដែលបានមកពីលោកតាន់ បញ្ញាវុធ នាយរងខុទ្ទកាល័យកងអង្គរក្សរបស់សម្តេចតេជោ ហ៊ុន សែន និងថវិកាមួយចំនួនទៀតពីខាងសមាគមសិល្បករខ្មែរជូនដល់លោកជីវ៉ាន់ ស៊ុយ ដែលកំពុងតែមានជំងឺផងដែរ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ