រាជធានីភ្នំពេញ ៖ ជនសង្ស័យ៣នាក់ក្នុងចំណោមបក្សពួក៤នាក់ ត្រូវប៉ូលិសខណ្ឌទួលគោកស្រាវជ្រាវចាប់ខ្លួនបាននៅវេលាម៉ោង១និង៣០នាទីរំលងអធ្រាត្រឈានចូលថ្ងៃទី២៩ ឧសភា ឆ្នាំ២០១២ បន្ទាប់ពីធ្វើសកម្មភាពប្លន់អ្នករត់តាក់ស៊ីកាលពីវេលាម៉ោង១០និង៣០នាទីយប់ថ្ងៃទី២៦ ឧសភា នៅមុខផ្ទះលេខ៥ ផ្លូវលេខ ២៧០Z សង្កាត់បឹងសាឡាង ខណ្ឌទួលគោក យកប្រាក់អស់២០០ដុល្លារ និង៥៨ម៉ឺនរៀល ខ្សែ.កប្លាទីន២ខ្សែមានទម្ងន់១,៣តម្លឹង ចិញ្ចៀនប្លាទីន២វង់ ទូរស័ព្ទ១គ្រឿង ប័ណ្ណសម្គាល់ស្លាកលេខរថយន្តនិងអត្តសញ្ញាណប័ណ្ណ ។
ជនសង្ស័យដែលត្រូវចាប់ខ្លួននេះមាន ១-ឈ្មោះស៊ឹម សុភារ័ត្ន ភេទប្រុស អាយុ១៨ឆ្នាំ ២-ឈ្មោះយ៉េត ស៊ីណា ហៅអូន អាយុ២១ឆ្នាំ និង៣-ឈ្មោះចាន់ សំណាង ហៅជ្រូក អាយុ១៨ឆ្នាំ ។ អ្នកទាំងបីនាក់ មានទីលំនៅតាមផ្លូវលេខ២៣០ សង្កាត់ទឹកល្អក់ទី៣ ខណ្ឌទួលគោក។ ចំណែកជនរងគ្រោះដែលត្រូវចោរប្លន់ឈ្មោះយិន បញ្ញា ភេទប្រុស អាយុ ៣៤ឆ្នាំ ជាអ្នករត់តាក់ស៊ីទូកមាស-ភ្នំពេញ មានទីលំនៅភូមិត្រាំសសរ ឃុំសំរោងលើ ស្រុកបន្ទាយមាស ខេត្តកំពត ។
តាមមន្រ្តីប៉ូលិសឱ្យដឹងថា ជនសង្ស័យមានបក្សពួក៤នាក់ ប្រដាប់ដោយកាំភ្លើងខ្លីមួយដើម បានហៅរថយន្តតាក់ស៊ីទៅកន្លែងស្ងាត់ហើយធ្វើសកម្មភាពភ្ជង់ប្លន់យកប្រាក់និងគ្រឿងអលង្ការតែម្តង ។ នៅថ្ងៃទី២៦ ឧសភា វេលាម៉ោង១០និង៣០នាទីយប់ ក្រុមជនសង្ស័យបានរៀបចំគម្រោងប្លន់ដោយប្រើល្បិចជួលរថយន្តតាក់ស៊ីជិះទៅធ្វើបុណ្យនៅខេត្តកំពតក្នុងតម្លៃ៧០ដុល្លារ ។ នៅយប់នោះ ជនរងគ្រោះនិងប្រពន្ធឈ្មោះពន ស្រីម៉ុម បានមកដឹកជនសង្ស័យនៅតាមផ្លូវលេខ២៣០ សង្កាត់បឹងសាឡាង ខណ្ឌទួលគោក ។ នៅពេលនោះ ជនសង្ស័យម្នាក់ឈប់ចាំទទួលហើយបានឡើងជិះរថយន្តម៉ាកហ៊ីយ៉ាន់ដាយ១៥កៅអីទៅយកបក្សពួកដែលនៅឈប់ចាំតាមផ្លូវលេខ២៧០Z សង្កាត់បឹងសាឡាង ហើយធ្វើសកម្មភាពប្លន់តែម្តង ។
ប្រភពព័ត៌មានឱ្យដឹងទៀតថា នៅក្នុងសកម្មភាពប្លន់នេះ ជនម្នាក់បានប្រើកាំភ្លើងខ្លីភ្ជង់ជនរងគ្រោះនិងប្រពន្ធយកប្រាក់អស់ចំនួន២០០ដុល្លារ និង៥៨ម៉ឺនរៀល ខ្សែ.កប្លាទីន២ខ្សែទម្ងន់១តម្លឹង៣ជី ចិញ្ចៀនប្លាទីន២វង់ ទូរស័ព្ទ មួយគ្រឿង ប័ណ្ណសម្គាល់រថយន្តមួយសន្លឹកនិងអត្តសញ្ញាណប័ណ្ណមួយសន្លឹក ហើយគេចខ្លួនបាត់ ។បន្ទាប់ពីត្រូវចោរប្លន់ ជនរងគ្រោះបានមកដាក់ពាក្យបណ្តឹង ហើយកម្លាំងប៉ូលិសខណ្ឌទួលគោកក៏ស្រាវជ្រាវចាប់បានចំនួន៣នាក់ នៅក្នុងសង្កាត់ទឹកល្អក់ទី៣ ព្រមទាំងដកហូតបានទូរស័ព្ទរបស់ជនរងគ្រោះនិងប័ណ្ណសម្គាល់រថយន្តត្រឡប់មកវិញ ៕
ចែករំលែកព័តមាននេះ