រាជធានីភ្នំពេញ ៖ តារាចម្រៀងប្រចាំផលិតកម្មថោន កញ្ញាមាស សុខសោភា បាននិយាយឱ្យដឹងកាលពីពេលថ្មីៗនេះថា នាងត្រៀមចេញវ៉ុលថ្មីមួយដែលច្រៀងដោយរូបនាងម្នាក់ឯង ។ វ៉ុលថ្មីនេះបរិយាយអំពីបញ្ហាសង្គម និងស្នេហាបច្ចុប្បន្នភាព ដែលយុវជន យុវនារីខ្មែរយើងកំពុងជួបប្រទះ ។
កញ្ញាមាស សុខសោភា បញ្ជាក់ថា វ៉ុលថ្មីនោះគឺជាវ៉ុលទី២៦របស់ផលិកម្មថោន និងមាន១០បទ ។ បទដែលរំពឹងថានឹងទទួលការគាំទ្រនោះគឺបទ «បោកអ្នកណាបោកទៅលើកលែងតែអូន» បទ «ពេលគេងលក់ទៅអាចភ្លេចបង» បទ «មានឱកាសអូននឹងទះកំផ្លៀងបង» និងបទ«បងសង្ហាម៉្លេះទេ»។ នាងនិយាយថាបទចម្រៀងក្នុងវ៉ុល២៦នេះ មានចម្រុះទាំងបទមនោសញ្ចេតនា និងបទញាក់កន្ត្រាក់អារម្មណ៍ ដែលផលិតកម្មថោនសម្រិតសម្រាំង និងជ្រើសរើសតម្រូវតាមការពេញនិយមចូលចិត្តរបស់មនុស្សគ្រប់ស្រទាប់ ។
ស្ថិតក្នុងវ័យ២៧ឆ្នាំ កញ្ញាមាស សុខសោភា នៅតែទទួលបានការគាំទ្រច្រើនពីទស្សនិកជន។ នាងធ្លាប់ទទួលការវាយតម្លៃ និងផ្តល់ពិន្ទុជាតារាវ័យក្មេងដែលមានសំឡេងពីរោះជាបន្តបន្ទាប់ ជាក់ស្តែងក្នុងឆ្នាំ២០១២នេះ នាងទទួលបានពានរង្វាន់តារាវ័យក្មេង សំឡេងពីរោះផ្នែកនារី ដែលរៀបចំការវាយតម្លៃដោយក្រុមហ៊ុន Sabay។
ទាក់ទងនឹងការងារក្នុងវិស័យសិល្បៈតារាចម្រៀងរូបនេះនិយាយថា នាងមានការមមាញឹកខ្លាំងណាស់ ស្ទើរតែរកពេលទំនេរគ្មាន ។ ក្រៅពីច្រៀងក្នុងផលិតកម្ម នាងមានកិច្ចសន្យាទទួលច្រៀងនៅតាមបណ្តាខេត្តជាច្រើនកម្មវិធី ។ ទន្ទឹមនោះសមាគមច្រើនផងដែរបានមកអញ្ជើញនាងទៅច្រៀងនៅក្រៅប្រទេស ។ ចំណែកលើឆាកតន្ត្រីទូរទស្សន៍វិញ នាងមិនសូវបានបង្ហាញមុខប៉ុន្មានទេ ព្រោះជាប់កម្មវិធីខាងក្រៅ តែនាងនៅតែឆ្លៀតម្តងម្តាល ដើម្បីជួបអ្នកគាំទ្ររបស់នាង ។
កញ្ញាមាស សុខសោភា អំពាវនាវឱ្យប្រជាពលរដ្ឋជួយគាំទ្រវិស័យសិល្បៈ និងជួយផ្តល់មតិកែលម្អរាល់ការខ្វះខាតទាំងឡាយរបស់សិល្បករសិល្បការិនីខ្មែរ ដើម្បីលើកកម្ពស់វិស័យសិល្បៈវប្បធម៌ខ្មែរយើង ដែលធ្លាប់តែរុងរឿងតាំងពីមុនមក ។ លើសពីនេះនាងស្នើសុំដល់សិល្បករសិល្បការិនីគ្រប់រូបឱ្យថែរក្សាតម្លៃនៃសិល្បៈវប្បធម៌ខ្មែរឱ្យបានគង់វង្ស រួមទាំងពូនជ្រុំវិស័យនេះឱ្យកាន់តែរីកចម្រើនបន្ថែមទៀត ៕
ចែករំលែកព័តមាននេះ