ប្រតិបត្តិកទេសចរណ៍ជនជាតិរុស្ស៊ីមួយក្រុម បានមកដល់ខេត្តសៀមរាប កាលពីល្ងាចថ្ងៃទី៤ ខែមិថុនា ឆ្នាំ២០២៦ក្រោមការស្វាគមន៍ដោយក្រសួងទេសចរណ៍ ដើម្បីបើកផ្លូវឲ្យពួកគេមកធ្វើការសិក្សាក្នុងគោលដៅយកសកត្តានុពលទេសចរណ៍នៅខេត្តសៀមរាប ទៅធ្វើការផ្សព្វផ្សាយ ទាក់ទាញភ្ញៀវទេសចររុស្ស៊ីឱ្យមកលេងខេត្តសៀមរាបឱ្យបានកាន់តែច្រើន។
លោក នាង ម៉ៅ រដ្ឋលេខាធិការក្រសួងទេសចរណ៍មានប្រសាសន៍ថា ការមកដល់របស់ក្រុមប្រតិបត្តិករនេះជាសញ្ញាវិជ្ជមានមួយ សម្រាប់វិស័យទេសចរណ៍កម្ពុជា និងបង្ហាញពីការកើនឡើងនៃទំនុកចិត្តរបស់ភ្ញៀវទេសចរអន្តរជាតិមកលើកម្ពុជា ខណៈដែលរាជរដ្ឋាភិបាលកម្ពុជា កំពុងយកចិត្តទុកដាក់យ៉ាងខ្លាំងលើការអភិវឌ្ឍវិស័យទេសចរណ៍ ប្រកបដោយគុណភាព សុវត្ថិភាព និងភាពកក់ក្តៅសម្រាប់ភ្ញៀវទេសចរអន្តរជាតិ។
លោកបានសម្តែងការគាំទ្រ ចំពោះកិច្ចសហការរវាងវិស័យឯកជន ក្នុងការផ្សព្វផ្សាយកម្ពុជា ទៅកាន់ទីផ្សារទេសចរណ៍រុស្ស៊ី និងអន្តរជាតិ ដោយចាត់ទុកថា នេះជាជំហានដ៏សំខាន់មួយ ក្នុងការទាក់ទាញភ្ញៀវទេសចរដែលមានសមត្ថភាពចំណាយខ្ពស់ និងជួយជំរុញកំណើនសេដ្ឋកិច្ចជាតិ។
នាឱកាសនោះ លោក វ្លាឌីមៀ ប៉ាឡេនស៊ីសា ( Vladimir Palancica ) អគ្គនាយកក្រុមហ៊ុន Lotus Group ដែលមានបទពិសោធន៍ជាច្រើនឆ្នាំក្នុងវិស័យទេសចរណ៍អន្តរជាតិ បានលើកឡើងថា កម្ពុជាមានសក្តានុពលខ្លាំងក្នុងការទាក់ទាញភ្ញៀវទេសចររុស្ស៊ី ដោយសារមានធនធានទេសចរណ៍ដ៏សម្បូរបែប រួមមានប្រាសាទបុរាណដ៏អស្ចារ្យ តំបន់ឆ្នេរសមុទ្រស្រស់ស្អាត បរិយាកាសសុខសាន្ត សុវត្ថិភាព និងប្រជាជនដែលមានភាពរួសរាយរាក់ទាក់ ដែលមិនចាញ់ប្រទេសដទៃក្នុងតំបន់អាស៊ីអាគ្នេយ៍ឡើយ ។
លោកបានបន្តថា ភ្ញៀវទេសចររុស្ស៊ីត្រូវបានចាត់ទុកថា ជាក្រុមទេសចរដែលមានសមត្ថភាពចំណាយខ្ពស់ និងចូលចិត្តសេវាកម្មប្រកបដោយគុណភាពខ្ពស់ ដូចជាទេសចរណ៍សុខភាព ស្ប៉ា រមណីយដ្ឋានឆ្នេរសមុទ្រ ការស្នាក់នៅរយៈពេលវែង និងការធ្វើដំណើរបែបឯកជន និងសេវាទេសចរណ៍លំដាប់ខ្ពស់ ។
លោកបានបន្តថា ភ្ញៀវទេសចររុស្ស៊ីអាចស្នាក់នៅជាមធ្យម ពី៥ ទៅ៧ថ្ងៃ ហើយមួយចំនួនអាចស្នាក់នៅរហូតដល់១ខែទៅ២ខែ ដែលអាចជួយជំរុញប្រាក់ចំណូលចូលក្នុងវិស័យសណ្ឋាគារ ភោជនីយដ្ឋាន ការដឹកជញ្ជូនសិប្បកម្មក្នុងស្រុក និងអាជីវកម្មទេសចរណ៍ផ្សេងៗជាច្រើន។
៣ខែដើមឆ្នាំ២០២៦នេះ កម្ពុជាទាក់ទាញភ្ញៀវទេសចររុស្ស៊ីសរុបប្រមាណជាជិត១៣.០០០នាក់ដែរ ប៉ុន្តែវាធ្លាក់ចុះប្រមាណជា៥៧ភាគរយ បើធៀបនឹងរយៈពេលដដែលកាលពីឆ្នាំ២០២៥ ។
ចែករំលែកព័តមាននេះ