រាជធានីភ្នំពេញ ៖ នៅរាត្រីថ្ងៃទី២៩ មេសា ២០១២ កន្លងទៅ ក្នុងកម្មវិធីហូបបាយជុំគ្នារវាងស្ថានីយទូរទស្សន៍ជាតិកម្ពុជា និងសិល្បករសិល្បការិនី ឬកម្មវិធីជោគជ័យនៃកិច្ចប្រជុំអាស៊ានដែលស្ថានីយទូរទស្សន៍ជាតិបានរៀបចំកម្មវិធីអបអរសាទរនេះឡើង។ គេសង្កេតឃើញនាងសំ ប៉ូលីដា បានបណ្តើរលោក ស្វាយ ស៊ីសុថា ហៅខ្ចាដំរី អតីតគ្រូបង្ហាត់រាំដែលល្បីឈ្មោះក្នុងព្រះរាជាណាចក្រកម្ពុជាយ៉ាងស្រស់ស្រាយគួរជាទីចាប់អារម្មណ៍ ។ អ្នកទាំង២បានឱ្យកោះសន្តិភាពដឹងថា នៅព្រឹកថ្ងៃទី១ ខែឧសភា ឆ្នាំ២០១២ នេះវេលាម៉ោង៨ព្រឹកពួកគេនឹងធ្វើពិធីបំពាក់ចិញ្ចៀនភ្ជាប់ពាក្យ ដែលមានការអញ្ជើញចូលរួមពីសិល្បករសិល្បការិនីជាច្រើនផងដែរ ។
លោកស្វាយ ស៊ីសុថា ហៅខ្ចាដំរី បានឱ្យដឹងថា ចិញ្ចៀនពេជ្រដែលត្រូវបំពាក់ឱ្យ«អូនដា»មានទំហំគ្រាប់ពេជ្រ៨លី១គ្រាប់នៅកណ្តាលអមដោយគ្រាប់ពេជ្រទំហំ៥លីចំនួន៥គ្រាប់ទៀតដាំនៅជុំវិញ ។ ចំពោះថ្លៃមង្គលការអ្នកនាងសំ ប៉ូលីដា បានប្រាប់ថា ខាងប្រុសគេធានារ៉ាប់រងក្នុងពិធីមង្គលការទាំងស្រុង ។ លោកខ្ចាដំរី និយាយថា ម្តាយលោកនិងលោកធ្វើគ្រប់បែបយ៉ាងទាំងអស់ឱ្យតែអូនដានាងសប្បាយចិត្ត។ លោកបញ្ជាក់ថា ស្នេហារបស់លោកនិង សំ ប៉ូលីដា បានចាប់កំណើតឡើងកាលពីចុងឆ្នាំ២០១១ថ្មីៗនេះ ក្រោយពីនាងមានវិបត្តិត្រូវគេធ្វើបាបទាំងចិត្តទាំងកាយ ដែលកាសែតកោះសន្តិភាពធ្លាប់បានចុះផ្សាយកន្លងមកផងដែរ។ លោកស្វាយ ស៊ីសុថា សច្ចាថា នឹងថែរក្សាអូនដា លើកតម្កើងអូនដាឱ្យដូចនារីខ្មែរដទៃទៀត ។ ដោយឡែកអ្នកនាងសំ ប៉ូលីដា វិញធ្លាប់និយាយថា ក្រោយពីមេឃខ្មៅមានភ្លៀងផ្គររន្ទះយ៉ាងខ្លាំងលើរូបនាងកន្លងមកពេលនេះ បានរលាយទៅតាមខ្យល់អស់ហើយ ។ មេឃក៏ប្រែជាស្រឡះល្អសម្រាប់ជីវិតរបស់នាងជាចុងក្រោយដែរ ។
នៅក្រោមក្រសែភ្នែកសិល្បករសិល្បការិនី និងភ្ញៀវកិត្តិយសជាច្រើនបានកោតសរសើរនាងសំប៉ូលីដា និងលោកខ្ចាដំរីថាគូរស្នេហ៍ទាំង២នាក់នេះពិតជាសក្តិសមគ្នាណាស់ ព្រោះវ័យស្របាលនិងគ្នា ហើយគេសង្ឃឹមថា និងរស់នៅផ្អែមល្ហែមស្រឡាញ់គ្នាដល់ចាស់ព្រឹទ្ធចាស់ព្រេងទាំង២នាក់រៀងៗខ្លួន។ លោកស្វាយ ស៊ីសុថា ហៅខ្ចាដំរី និងនាងសំប៉ូលីដា និយាយថា ក្រោយពីពិធីភ្ជាប់ពាក្យព្រឹកថ្ងៃទី១ ឧសភា នេះហើយ ពួកគេទាំង២នាក់បានជ្រើសរើសថ្ងៃកំណត់រៀបមង្គលការនៅថ្ងៃទី១២ មិថុនា ២០១២ ខាងមុខនេះ ។ តារាកំប្លែងនិងច្រៀងរូបនេះបាននិយាយទាំងរីករាយថា «ជីវិតនាងខ្ញុំមានន័យណាស់នៅពេលជួបបងស៊ីសុថា គឺគាត់ផ្តល់ភាពកក់ក្តៅ ក្តីស្រឡាញ់ពេញបេះដូងដល់នាងខ្ញុំ» ៕
ចែករំលែកព័តមាននេះ