រាជធានីភ្នំពេញ ៖ ស្ថិតក្នុងវ័យ២៣ឆ្នាំ ប្រកបដោយរូបសម្ផស្សស្រស់ស្អាតទ្រលុកទ្រលន់សាច់សខ្ចីសម្តីផ្អែមស្រទន់ដែលគេស្គាល់តាមរយៈកម្មវិធីប្រគំតន្ត្រីចុងសប្តាហ៍នៅស្ថានីយទូរទស្សន៍នានាថា ជាតារាចម្រៀងមនោសញ្ចេតនា និងប្រជាប្រិយ គឺកញ្ញាសុខ លីលី ។ ក្នុងទឹកមុខញញឹមដ៏ស្រស់ចូលចិត្តស្លៀកពាក់បែបប្រពៃណីខ្មែរអាវប៉ាក់សំពត់ហូល ផាមួង មើលទៅសមជាកូនខ្មែរ តារាចម្រៀងប្រជាប្រិយ និងមនោសញ្ចេតនារូបនេះបានឱ្យដឹងថា នាងកំពុងតែច្រៀងបង្ហើរសំឡេងនៅភោជនីយដ្ឋាន «ហ្សង់លីហ្សេ» រាល់រាត្រី ។
ទោះបីលីលីនិយមស្លៀកពាក់បែបប្រពៃណីខ្មែរនៅលើឆាកប្រគំតន្ត្រីតាមកម្មវិធីទូរទស្សន៍នានាក៏ដោយតែពេលច្រៀងនៅក្នុងភោជនីយដ្ឋាន និងកម្មវិធីនៅតាមបណ្តាខេត្តក្រុង នាងគឺជាតារាដែលស្លៀកពាក់ទាន់សម័យយុវវ័យផងដែរ។ កញ្ញាសុខ លីលី ត្រូវជាប្អូនបង្កើតតារាចម្រៀងសុខ ស្រីពេជ្រ ។ លីលី មាននិស្ស័យស្រឡាញ់សិល្បៈចម្រៀង និងចង់ដើរតាមគន្លងបងស្រី។ នៅឆ្នាំ២០០៦ នាងបានចូលរួមប្រឡងក្នុងកម្មវិធីយុវតារានៃស្ថានីយទូរទស្សន៍បាយ័នដោយជាប់ជាតារាសម្តែង ។ ក្រោយមកលីលីក៏បានចូលរួមសម្តែងថតកាយវិការខារ៉ាអូខេឱ្យផលិតកម្មក្រៅប្រទេសមួយចំនួន ហើយនៅឆ្នាំ ២០០៧ ដោយសារការងារសម្តែងថតកាយវិការខារ៉ាអូខេ និងច្រៀងក្នុងភោជនីយដ្ឋានមានការមមាញឹកនោះ លីលីក៏បានឈប់សម្រាកពីការសិក្សាត្រឹមថ្នាក់ទី១២ ។
ក្នុងឆ្នាំ២០១២ នេះ លីលីកំពុងខំកសាងកេរ្តិ៍ឈ្មោះឱ្យល្បីដូចបងស្រីតាមរយៈការឡើងច្រៀងនៅលើឆាកប្រគំតន្ត្រីចុងសប្តាហ៍តាមស្ថានីយទូរទស្សន៍នានាគ្រប់កម្មវិធីគ្រប់ប៉ុស្តិ៍ដូចជាប៉ុស្តិ៍បាយ័ន អប្សរា ប៉ុស្តិ៍លេខ៣ ប៉ុស្តិ៍លេខ៥ ហើយជាពិសេសនិងញឹកញាប់ផងគេនោះ គឺច្រៀងជាកិត្តិយសក្នុងកម្មវិធីមន្តស្នេហ៍សំនៀងរបស់ស្ថានីយទូរទស្សន៍ CTN ។ កញ្ញាលីលី ក្រៅពីអាជីពលក់សំឡេងនៅក្នុងភោជនីយដ្ឋាន និងនៅតាមកម្មវិធីប្រគំតន្ត្រីបែបទេសចរណ៍នៅតាមបណ្តាខេត្តក្រុងនានា និងតាមកម្មវិធីទូរទស្សន៍នានានោះនាងកំពុងតែធ្វើការនៅក្នុងក្រុមហ៊ុនមួយរបស់បងស្រីនាងផងដែរ ។
ក្នុងទឹកមុខដ៏ស្រស់បំព្រងតារារូបនេះបានអះអាងថា បេះដូងនាងនៅក្រពុំព្រហ្មចារីល្អស្អាតបរិសុទ្ធមិនទាន់មានពាក់ព័ន្ធស្នេហាជាមួយបុរសណាម្នាក់នៅឡើយទេ ។ ពេលនេះនាងសូមប្រកាសបើកបេះដូង តែបើកជូនតែបុរសនៅទំនេរ ឯអ្នកមានប្រពន្ធកូន មានគូស្នេហ៍ ជាកម្មសិទ្ធិរបស់គេនោះនាងមិនទទួលយកទេ ។ កញ្ញាលីលី និយាយថា កន្លងមកមានបុរសជាច្រើនតាមញ៉ែសុំស្នេហ៍ពីនាង តែនាងបដិសេធមិនទទួលយក ព្រោះបុរសទាំងនោះសុទ្ធតែជារបស់គេ ។
កញ្ញាសុខ លីលី មានស្រុកកំណើតនៅស្រុកពារាំង ខេត្តព្រៃវែង នាងមានបងប្អូន៤នាក់ ស្រី៣ ប្រុសម្នាក់ នាងជាកូនទី៣ ។ គ្រួសាររបស់នាងមករស់នៅក្នុងទីក្រុងភ្នំពេញ តាំងពីនាងនៅកុមារភាពមកម៉្លេះក្នុងសង្កាត់ទន្លេបាសាក់ ខណ្ឌចំការមន ៕
ចែករំលែកព័តមាននេះ