រាជធានីភ្នំពេញ ៖ តារាសម្តែងជើងចាស់ប្រកបដោយទេពកោសល្យមិនចេះរីងស្ងួតលោកទេព រិនដារ៉ូ បានបង្ហាញការគាំទ្ររបស់ខ្លួនចំពោះបណ្តាញសារព័ត៌មានដែលបានចូលរួមយ៉ាងសកម្មនូវការផ្សព្វផ្សាយអំពីវិស័យសិល្បៈវប្បធម៌ ។ លោកចាត់ទុកការចុះផ្សាយទាំងនោះមិនគ្រាន់តែជាកាផ្សព្វផ្សាយដើម្បីឱ្យសាធារណជន យុវវ័យជំនាន់ក្រោយបានយល់ដឹងអំពីសិល្បៈវប្បធម៌កម្ពុជាប៉ុណ្ណោះទេ ប៉ុន្តែថែមទាំងបានជួយលើកកម្ពស់ និងប្រមូលការគាំទ្រពីសាធារណជនចំពោះវិស័យសិល្បៈវប្បធម៌ ។
លោកទេព រិនដារ៉ូ បានលើកឡើងថា តាមការកត់សម្គាល់សព្វថ្ងៃនេះសារព័ត៌មាននៅកម្ពុជា សំខាន់កាសែតកោះសន្តិភាពបានចុះផ្សាយយ៉ាងច្រើនអំពីសកម្មភាពនិងការរីកចម្រើននៃវិស័យសិល្បៈវប្បធម៌នៅកម្ពុជា ដែលលោកគិតថា តាមរយៈនៃការចុះផ្សាយ នោះអាចនឹងធ្វើឱ្យមហាជនកាន់តែយល់ដឹងអំពីខ្លឹមសារ និងសារសំខាន់នៃវិស័យនេះ ពិសេសវិស័យភាពយន្តដែលរាល់គ្នាគិតថាកំពុងប្រឈមនឹងការធ្លាក់ចុះ ។
ពាក់ព័ន្ធនឹងវិស័យភាពយន្តលោកទេព រិនដារ៉ូ បានសម្តែងក្តីសង្ឈឹមថា អនាគតខាងមុខឆាប់ៗនេះ វិស័យសិល្បៈភាពយន្តនឹងមានសន្ទុះខ្លាំងឡើងវិញមិនខាន ហើយការងើបឡើងវិញនៃវិស័យភាពយន្តនេះគឺផ្តើមចេញពីការរួមចំណែករបស់វិស័យសារព័ត៌មានផងដែរ ។
ទន្ទឹមនឹងការទទួលស្គាល់ថា វិស័យភាពយន្តនៅកម្ពុជាមានលក្ខណៈអន់ខ្សោយជាងខ្សែភាពយន្តបរទេសនោះលោកទេព រិនដារ៉ូ បានផ្តល់ជាគំនិតខ្លះៗ លើការកសាងភាពយន្តនៅកម្ពុជា ដើម្បីឱ្យវិស័យនេះអាចនឹងមានសន្ទុះឡើងវិញនាពេលខាងមុខនេះ ។
តារាសម្តែងរូបនោះបានលើកឡើងថា ភាពយន្តខ្នាតធំដែលដាក់បញ្ចាំងនៅតាមរោងភាពយន្តគឺមានលក្ខណៈខុសគ្នាពីខ្សែវីដេអូភាគ ដែលបញ្ចាំងតាមស្ថានីយទូរទស្សន៍។ ដូច្នេះទាំងការដឹកនាំរឿង បច្ចេកទេសថត រួមទាំងឈុតឆាកសម្តែងក៏មានលក្ខណៈមិនដូចគ្នាដែរ។ លោកបញ្ជាក់ថា នៅបរទេសគេបែងចែកគ្នាដាច់ស្រឡះរវាងតារាសម្តែងភាពយន្ត និងតារាសម្តែងវីដេអូភាគ ចំណែកលក្ខណៈនៃរឿងភាគដែលដាក់បញ្ចាំងនៅក្នុងស្ថានីយទូរទស្សន៍ខ្មែរយើងសព្វថ្ងៃនេះ គឺមានលក្ខណៈវែងអន្លាយពេក ហើយបើរឿងនោះនិយាយអំពីស្នេហា គឺស្នេហាពេញមួយខ្សែរឿងតែម្តង ខុសពីខ្សែវីដេអូភាគបរទេស ដែលគេនិពន្ធមានគ្រប់រសជាតិទាំងអស់។ ដូច្នេះហើយបានជាគេអាចទាក់ទាញអារម្មណ៍អ្នកទស្សនាបាន ទាំងនេះលោកមិនទាន់និយាយដល់បច្ចេកទេសថត និងទេពកោសល្យតួសម្តែងផង។
យោងតាមការលើកឡើងនេះលោកទេព រិនដារ៉ូ បានសន្និដ្ឋានថាអ្វីទាំងអស់នោះ ហើយទើបធ្វើឱ្យទស្សនិកជន ឬយុវវ័យខ្មែរយើងងាកទៅមើលភាពយន្តបរទេស។ ទោះជាយ៉ាងណាក៏ដោយតារាសម្តែងវ័យចំណាស់រូបនេះនៅតែមានក្តីសង្ឃឹមថា ភាពយន្តខ្មែរនឹងមានសន្ទុះឡើងវិញនាពេលខាងមុខ ព្រោះថាយើងមានធនធានមនុស្សកាន់តែច្រើនប្រកបដោយទេពកោសល្យរួមទាំងការជួយជ្រោមជ្រែងពីបណ្តាញសារព័ត៌មានដែលបានផ្សព្វផ្សាយបន្តបន្ទាប់នូវវិស័យសិល្បៈវប្បធម៌ដែលជាដួងព្រលឹងរបស់ជាតិយើង ។
លោកទេព រិនដារ៉ូ ក្នុងវ័យ៤៩ឆ្នាំ បានចំណាយពេលវេលាស្ទើរតែពាក់កណ្តាលជីវិតចូលរួមក្នុងវិស័យសិល្បៈ ខណៈពេលដែលកេរ្តិ៍ឈ្មោះ របស់លោកក៏កំពុងបន្តល្បីរន្ទឺ និងទទួលបានការគាំទ្រពីទស្សនិកជនគ្រប់វ័យ ។ ស្ថិតជាតារាឈានមុខគេទេព រិនដារ៉ូ បានចូលប្រឡូកក្នុងវិស័យសិល្បៈ សំខាន់ការសម្តែងភាពយន្តនៅឆ្នាំ១៩៨៩ ហើយភាពយន្តដែលលោកសម្តែងជាលើកដំបូងនោះ គឺរឿងទឹកភ្នែកសម្ងាត់ និងរឿងរាត្រីពណ៌ស្វាយ ។ លោកមានស្រុកកំណើតនៅខេត្តបាត់ដំបង។ អ្វីជាលក្ខណៈពិសេសរបស់លោកទេព រិនដារ៉ូ នោះគឺការរក្សាភាពទំនេរជាមួយនឹងអាថ៌កំបាំងបន្ទាប់ពីការលែងលះជាមួយភរិយាតាំងពីចុងទសវត្សឆ្នាំ៨០ មក ៕
ចែករំលែកព័តមាននេះ