រាជធានីភ្នំពេញ ៖ តារាសម្តែងកាយវិការខារ៉ាអូខេ និងភាពយន្ត គន់ រៀមរតនៈ ហៅវិហ្សា ក្នុងវ័យ២៥ឆ្នាំ មានស្រុកកំណើតនៅស្រុកស៊ីធរកណ្តាល ខេត្តព្រៃវែង ។ តារាសម្តែងរូបនេះជាកូនកំព្រាឪពុកម្តាយ ហើយខិតខំប្រឹងប្រែងរកប្រាក់ផ្គត់ផ្គង់ក្នុងការរស់នៅ និងបន្តការសិក្សាភាសាអង់គ្លេស និងភាសាចិន ។
តារាសម្តែងខ្ពស់ស្រឡះ១,៧៥ម៉ែត្រ លេងខ្លួនបែបតារាភាពយន្តកូរ៉េជាជាងបែបជាតិខ្មែរខ្លួនឯងរូបនេះ មានបងប្អូន៦នាក់ សុទ្ធតែប្រុសទាំងអស់ ហើយលោកជាកូនទី៥ ។ ក្រោយពីឪពុកម្តាយស្លាប់ចោលអស់នាឆ្នាំ១៩៩៦ វីហ្សា ចាកចេញពីបងប្អូន ពីស្រុកកំណើតមកតស៊ូរស់នៅក្នុងរាជធានីភ្នំពេញ ដោយរកការងារធ្វើផង សិក្សារៀនសូត្រផង ។ នៅឆ្នាំ២០០៤ ដោយសារមាននិស្ស័យស្រលាញ់សិល្បៈសម្តែង និងឃើញវិស័យសិល្បៈសម្តែងមានការរីកចម្រើន លោកបានឆ្លៀតពេលវេលាដ៏មានតម្លៃមួយចំនួនទៅហាត់រៀនសម្តែងនៅក្នុងក្លឹបសិល្បៈមួយរយៈហើយបានចេញសម្តែងកាយវិការខារ៉ាអូខេ ឱ្យផលិតកម្មក្នុងនិងក្រៅប្រទេសជាច្រើន ដូចជាផលិតកម្មសាន់ដេ រៃមាស តោមាស បុប្ផា ម៉ៃសាម៉េត និងពន្លឺនាគហោះជាដើម ។
តារាលេងខ្លួនតាមតារាបរទេសរូបនេះឱ្យដឹងថា ចាប់តាំងពីឆ្នាំ២០០៤ មក ក្រៅពីសម្តែងកាយវិការខារ៉ាអូខេ លោកធ្លាប់ចូលរួមសម្តែងក្នុងខ្សែរឿងខ្លីៗអប់រំមួយចំនួនឱ្យកម្មវិធីកម្មលោកីយ៍នៃស្ថានីយទូរទស្សន៍ ប៉ុស្តិ៍លេខ៥ ដូចជារឿងតំណក់ចុងក្រោយ និងរឿងធ្វើល្អបានល្អ ជាដើម ដោយលោកសម្តែងជាតួឯក ។ ក្រៅពីនេះវីហ្សាធ្លាប់មានកិត្តិយសឡើងច្រៀងនៅលើឆាកប្រគំតន្ត្រីចុងសប្តាហ៍តាមស្ថានីយទូរទស្សន៍មួយចំនួន ។ ការឡើងច្រៀងនោះលោកជ្រើសរើសយកបទចម្រៀងរបស់លោកណុប បាយ៉ារិទ្ធិ មកច្រៀងដូចជាបទ«កុំភ្លេចខ្ញុំ» បទ«ត្រីកោណស្នេហ៍» និងបទចម្រៀងរបស់លោកនីកូល ផងដែរ ។
គន់ រៀមរតនៈ ហៅវីហ្សា ប្រាប់ថា សព្វថ្ងៃពេលទំនេរពីការសម្តែង លោកសិក្សាភាសាអង់គ្លេស និងភាសាចិន ហើយពេលយប់ធ្វើការនៅក្នុងក្លឹបរាត្រីមួយនៅក្បែរមជ្ឈមណ្ឌលម៉ុងឌីយ៉ាល់ ជាមេការ ។ ដោយសារខ្លួននៅក្មេងកំពុងបន្តការសិក្សា ដូច្នេះវីហ្សា អះអាងថា មិនទាន់គិតរឿងស្នេហាទេ គឺខិតខំសិក្សារៀនសូត្រ និងធ្វើការរកប្រាក់បន្តិចសិន ៕
ចែករំលែកព័តមាននេះ