រាជធានីភ្នំពេញ ៖ យុវជនម្នាក់បានរងរបួសយ៉ាងធ្ងន់ធ្ងរបាក់ជើងខាងឆ្វេងពីរកំណាត់និងដាច់រលាត់មុខ សន្លប់បាត់ស្មារតីដេកដួលនៅលើចិញ្ចើមផ្លូវ ត្រូវប្រជាពលរដ្ឋដែលធ្វើដំណើរឆ្លងកាត់ផ្លូវនោះប្រទះឃើញហៅរថយន្តពេទ្យដឹកទៅសង្គ្រោះ ដែលមុនដំបូងគេនឹកស្មានថា យុវជននោះរងរបួសដោយគ្រោះថ្នាក់ចរាចរណ៍ ប៉ុន្តែក្រោយពេល
រាជធានីភ្នំពេញ ៖ យុវជនម្នាក់បានរងរបួសយ៉ាងធ្ងន់ធ្ងរបាក់ជើងខាងឆ្វេងពីរកំណាត់និងដាច់រលាត់មុខ សន្លប់បាត់ស្មារតីដេកដួលនៅលើចិញ្ចើមផ្លូវ ត្រូវប្រជាពលរដ្ឋដែលធ្វើដំណើរឆ្លងកាត់ផ្លូវនោះប្រទះឃើញហៅរថយន្តពេទ្យដឹកទៅសង្គ្រោះ ដែលមុនដំបូងគេនឹកស្មានថា យុវជននោះរងរបួសដោយគ្រោះថ្នាក់ចរាចរណ៍ ប៉ុន្តែក្រោយពេលក្រុមគ្រូពេទ្យសង្គ្រោះឱ្យដឹងខ្លួនយុវជននោះប្រាប់ថា រូបគេត្រូវក្រុមចោរប្លន់មានគ្នា៣នាក់ប្រដាប់ដោយដំបងដែកជិះម៉ូតូដេញតាមស្ទាក់វាយប្លន់យកម៉ូតូ១គ្រឿង ខណៈពេលរូបគេកំពុងជិះម៉ូតូចេញពីភោជនីយដ្ឋានសែនរីករាយត្រឡប់ទៅផ្ទះជួល ។
ប្រជាពលរដ្ឋបានប្រទះឃើញយុវជននោះដេកដួលនៅតាមចិញ្ចើមផ្លូវលេខ២០០៤ កែងមហាវិថីសហព័ន្ធរុស្ស៊ី ភូមប៉ប្រកខាងត្បូង សង្កាត់កាកាប ខណ្ឌពោធិ៍សែនជ័យ កាលពីវេលាម៉ោង៣និង៣០នាទីទៀបភ្លឺថ្ងៃទី៥ មេសា ។ យុវជនរងគ្រោះដោយក្រុមចោរវាយប្លន់នោះឈ្មោះ ខេង ពឿន អាយុ១៩ឆ្នាំ ជាអ្នករត់តុនៅក្នុងភោជនីយដ្ឋានសែនរីករាយ ដែលមានទីតាំងស្ថិតនៅតាមបណ្តោយផ្លូវលេខ២០០៤ ភូមិត្រពាំងណូ សង្កាត់កាកាប មានស្រុកកំណើតនៅម្តុំផ្សារទូកមាស ឃុំទូកមាស ស្រុកបន្ទាយមាស ខេត្តកំពត បាត់បង់ម៉ូតូមួយគ្រឿងម៉ាកហុងដាសេ១២៥ សេ៊រីឆ្នាំ២០១០ ពណ៌ខ្មៅ អត់ស្លាកលេខ ចំណែកឯក្រុមចោរប្លន់មានគ្នា៣នាក់ប្រដាប់ដោយដំបងដែក ជិះម៉ូតូ១គ្រឿងម៉ាកហុងដាសេ១២៥សេ៊រីឆ្នាំ២០១២ ពណ៌ខ្មៅ ។ ក្រោយវាយជនរងគ្រោះឱ្យរងរបួសបាក់ជើងឆ្វេងពីរកំណាត់ និងដួលរលាត់មុខសន្លប់បាត់ស្មារតី ហើយពួកចោរបានគេចខ្លួនទៅបាត់ស្រមោល ។
យុវជនរូបនោះបានប្រាប់គេឯងនៅក្នុងមន្ទីរព្យាបាល និងសម្ភពចោមចៅថា នៅវេលាម៉ោង១២និង២០នាទីរំលងអធ្រាត្ររូបគេជិះម៉ូតូចេញពីកន្លែងធ្វើការនៅភោជនីយដ្ឋានសែនរីករាយ ក្នុងបំណងទៅផ្ទះជួលដែលខ្លួនស្នាក់នៅ ប៉ុន្តែរូបគេមិនបានប្រាប់ថាផ្ទះជួលនោះនៅម្តុំណាទេ ។ ពេលជិះម៉ូតូផុតពីហាងបន្តិច ស្រាប់តែមានជនសង្ស័យ៣នាក់ជិះម៉ូតូដេញតាមពីក្រោយរួចកៀរផ្តួលបន្ទាប់មកក៏បានប្រើដំបងដែកវាយសំពងមកលើរូបគេបណ្តាលឱ្យរងរបួសបែបនេះ រួចក៏យកម៉ូតូជិះទៅបាត់ស្រមោលតែម្តង។ ទោះបីជាបែបណា ហេតុការណ៍នេះមិនបានធ្វើឱ្យមានការភ្ញាក់ផ្អើលនោះទេ ហើយគេពុំដឹងថា តើយុវជននេះត្រូវក្រុមចោរវាយប្លន់យកម៉ូតូបណ្តាលឱ្យរបួសបែបនេះមែន ឬយ៉ាងណានោះឡើយ ហើយការនិយាយរៀបរាប់ខាងលើហាក់ដូចជាស្ថិតក្នុងស្ថានភាពរវើរវាយ ។
គេនៅមានមន្ទិលសង្ស័យខ្លះៗ ប្រសិនបើមានហេតុការណ៍ប្លន់បែបនេះមែនហេតុអ្វីបានជាមិនមានការភ្ញាក់ផ្អើល ហើយសមត្ថកិច្ចមិនដឹង ឬក៏ក្រុមចោរប្លន់ធ្វើសកម្មភាពវាយយុវជននោះ ។ ប៉ុន្តែប្រសិនបើករណីគ្រោះថ្នាក់ចរាចរណ៍ក៏គួរតែម៉ូតូរបស់គេស្ថិតនៅក្បែរកន្លែងកើតហេតុ ឬមានកម្ទេចកម្ទីម៉ូតូដែលបែកជ្រុះនៅ លើថ្នលតែតាមការអះអាងថា គេឃើញតែជនរងគ្រោះដេកសន្លប់ប៉ុណ្ណោះ មិនឃើញម៉ូតូឡើយ ៕
ចែករំលែកព័តមាននេះ