រាជធានីភ្នំពេញ ៖ ដើម្បីធ្វើឱ្យទីក្រុងកោះពេជ្រកាន់តែពេញនិយមលើផ្នែកទេសចរណ៍ សិល្បៈ វប្បធម៌កម្រិតអន្តរជាតិ លោកឧកញ៉ា ពុង ឃាវសែ អគ្គនាយកធនាគារកាណាឌីយ៉ាបានសម្រេចចិត្តបង្កើតឱ្យមានក្រុមសិល្បៈដ៏ធំមួយដែលមានគ្នាចំនួនជាង១០០នាក់រាប់ទាំងអ្នកបច្ចេកទេសផងនោះ ទុកសម្រាប់សម្តែងសិល្បៈរៀងរាល់ថ្ងៃសៅរ៍ និងអាទិត្យនៅរោងមហោស្រពកោះពេជ្រ ចាប់ពីថ្ងៃទី៣១ មីនា តទៅ ។
នៅក្នុងសន្និសីទកាសែតមួយដែលរៀបចំឡើងនៅកោះពេជ្រកាលពីថ្ងៃទី២៤ មីនា លោកឧកញ៉ាពុង ឃាវសែ មានប្រសាសន៍ឱ្យដឹងថា រោងមហោស្រពកោះពេជ្រមានកៅអីទទួលទស្សនិកជនចំនួន ៣ពាន់កៅអីជារោងមហោស្រពខ្នាតយក្សមិនធ្លាប់មាននៅក្នុងព្រះរាជាណាចក្រកម្ពុជា និងមានឆាកសម្តែងខ្នាតធំ ជម្រៅទទឹងជាង៣០ម៉ែត្រ ហើយលោកសង្ឃឹមថា ឆាកសម្តែងដ៏ធំនេះវានឹងជួយបង្កើតអារម្មណ៍ដ៏អស្ចារ្យដល់ទស្សនិកជនក្នុងពេលទស្សនា ឱ្យលង់លក់នៅក្នុងពិភពសម្តែងមួយដែលពោរពេញទៅដោយការរំភើប និងកោតស្ញប់ស្ញែង ។
លោកឧកញ៉ាពុង ឃាវសែ បន្តថា ឥឡូវនេះក្រុមសិល្បៈដែលបង្កើតឡើងដោយកោះពេជ្របានលេចចេញជារូបរាងហើយ ពួកគេទទួលការបណ្តុះបណ្តាលត្រឹមត្រូវ មានប្រាក់ខែត្រឹមត្រូវ ហើយសម្តែងបើកឆាកសាកល្បងលើកដំបូងនៅថ្ងៃទី២៤ មីនា គឺសម្តែងរឿងព្រះបាទជ័យវរ្ម័នទី៧ ជារឿងប្រវត្តិសាស្រ្តបង្ហាញពីភាពអស្ចារ្យរបស់កំពូលវីរក្សត្រខ្មែរសម័យអង្គររុងរឿង ។ ការសម្តែងសាកល្បងនេះលោករង់ចាំការរិះគន់កែលម្អអំពីមហាជន ដើម្បីធ្វើការកែប្រែចំណុចខ្វះខាតមួយចំនួនដែលលោកឧកញ៉ាសង្ឃឹមថា ប្រហែលពិតជាមានការខ្វះចន្លោះជាក់ជាមិនខានឡើយ ។ បន្ទាប់ពីធ្វើការកែលម្អបណ្តើរ សម្តែងជូនទស្សនិកជនកម្សាន្តបណ្តើរផងនោះ ក្រុមសិល្បៈនេះនឹងបង្កើតរឿងសម្តែងផ្សេងៗជាច្រើនទៀត ពីព្រោះថា ការសម្តែងសិល្បៈនៅរោងមហោស្រពកោះពេជ្រមិនមែនសម្រាប់តែប្រជាជនក្នុងស្រុកប៉ុណ្ណោះទេ ជនបរទេសដែលកំពុងប្រកបការងារប្រចាំថ្ងៃនៅក្នុងប្រទេសកម្ពុជា និងទេសចរបរទេសក៏អាចចូលរួមទស្សនាផងដែរ ដោយសំបុត្រមានដាក់លក់មុខរោងមហោស្រព និងតាមក្រុមហ៊ុនទេសចរណ៍នានាហើយការសម្តែងសិល្បៈរឿងព្រះបាទជ័យវរ្ម័នទី៧ ក្នុងថ្ងៃសាកល្បងនេះ ក្រុមហ៊ុនទេសចរណ៍ទាំងនោះក៏ត្រូវបានអញ្ជើញឱ្យចូលរួមទស្សនាផងដែរ ដើម្បីឱ្យពួកគេបានឃើញដោយផ្ទាល់ភ្នែកអំពីភាពអស្ចារ្យនៃការសម្តែងដែលគេធ្វើឱ្យឃើញមនុស្សហោះពិតៗ ។
លោកឧកញ៉ាពុង ឃាវសែ បានបញ្ជាក់ថា លោកមិនទាន់សម្រេចចិត្តដាក់ឈ្មោះក្រុមសិល្បៈនេះថាយ៉ាងមេ៉ចនៅឡើយទេ រង់ចាំពេលខាងមុខទៀតថាតើត្រូវហៅថាក្រុមសិល្បៈកោះពេជ្រ ឬយ៉ាងណា ។
លោកនុត សាមុនី អតីតសាស្ត្រាចារ្យសាកលវិទ្យាល័យភូមិន្ទវិចិត្រសិល្បៈ ដែលជាអ្នកមើលការខុសត្រូវលើក្រុមសិល្បៈទើបបង្កើតថ្មីនេះបានមានប្រសាសន៍ថា សិល្បៈសម្តែងរឿងព្រះបាទជ័យវរ្ម័នទី៧នេះមានកេរ្តិ៍ឈ្មោះល្បីល្បាញនៅខេត្តសៀមរាប គឺមានការចូលរួមទស្សនាទាំងប្រជាជនខ្មែរ និងជនបរទេស ហើយបានកោតសរសើរគ្រប់គ្នា ។ ឥឡូវនេះអ្នកសម្តែងនៅសៀមរាបមួយចំនួនត្រូវបានដកយកមកសម្តែងនៅកោះពេជ្រ បូកបញ្ចូលជាមួយសិល្បករខ្លះដែលទើបនឹងរើសថ្មី បង្កើតជាក្រុមសិល្បៈថ្មីមួយទៀត បន្ទាប់ពីក្រុមសិល្បៈនៅខេត្តសៀមរាប ដើម្បីសម្តែងសិល្បៈនៅកោះពេជ្រ ហើយលោកសង្ឃឹមថា ការសម្តែងសិល្បៈរឿងព្រះបាទជ័យវរ្ម័នទី៧នៅកោះពេជ្រ នឹងទទួលបានការគាំទ្រដូចជាការសម្តែងនៅសៀមរាបដែរ ៕
ចែករំលែកព័តមាននេះ