រាជធានីភ្នំពេញ ៖ នៅក្នុងខ្សែវីដេអូភាគដែលកំពុងចាក់ផ្សាយរាល់រាត្រីថ្ងៃចន្ទនិងថ្ងៃអង្គារ តាមកញ្ចក់ទូរទស្សន៍កងយោធពលខេមរភូមិន្ទប៉ុស្តិ៍លេខ៥ គេឃើញមានតារាសម្តែងស្រី វ័យក្មេងជាច្រើនរូបសម្តែងជាតួម្តាយកំពុងតែប្រជែងបង្ហាញទេពកោសល្យ សមត្ថភាពជូនប្រិយមិត្តអ្នកទស្សនាបានឃើញក្នុងរឿងសេដ្ឋីវ័យក្មេង។ នៅក្នុងចំណោមនោះ កញ្ញា ជួន ថាវរ៉ា ដែលជាតារាបង្ហាញម៉ូដ និងជាតារាសម្តែងកាយវិការខារ៉ាអូខេ និងភាពយន្តផងនោះ កន្លងមកធ្លាប់បានសម្តែងក្នុងរឿង «ឡានខ្មោច » រឿង «ទឹកចិត្តបងស្រី » រឿង «រលកសំឡេង» រឿង«អច្ឆរិយស្នេហ៍»រួមទាំងរឿងជាច្រើនទៀតប្រមាណជាង២០រឿងមកហើយ ដែលបានចាក់ផ្សាយតាមកញ្ចក់ទូរទស្សន៍នានាក្នុងរាជធានីភ្នំពេញ ហើយចុងក្រោយនេះ គឺរឿង«សេដ្ឋី វ័យក្មេង» នាងសម្តែងជាតួម្តាយ ។
កញ្ញា ជួន ថាវរ៉ា បានឱ្យដឹងថា នៅក្នុងឆ្នាំ២០១២នេះ ក្រៅពីដើរបង្ហាញម៉ូដតាមកម្មវិធីរបស់ក្រុមហ៊ុនផ្សេងៗដែលគេហៅនោះ នាងសម្តែងថតកាយវិការខារ៉ាអូខេឱ្យផលិតកម្មក្រៅប្រទេសជាច្រើន និងថតស្ប៉តពាណិជ្ជកម្ម និង
ស្ប៉តអប់រំផ្សេងៗជាច្រើនមិនសូវទំនេរទេ ។ ជាពិសេសនៅឆ្នាំ២០១២នេះ ក្រោយពីបានថតរឿង«សេដ្ឋីវ័យក្មេង»ចប់ភ្លាម ក៏មានស្ថានីយទូរទស្សន៍មួយផ្តល់ឱកាសឱ្យនាងបានចូលរួមថតភាពយន្តភាគបែបលើកទឹកចិត្ត និងផ្តល់កម្លាំងចិត្តដល់កងទ័ពជួរមុខគឺរឿង«ពន្លកស្នេហ៍ក្បែរជាយដែន» ដែលអ្នកដឹករឿងតម្រូវឱ្យនាងសម្តែងជាតួមិត្តភក្តិតួឯក ជាតួនារីក្លាហានចូលបម្រើទ័ព ហើយឆ្លងកាត់ការលំបាកក្នុងឈុតឆាកហ្វឹកហ្វឺនលោតឆត្រយោងពីយន្តហោះទៀតផង ។
កញ្ញា ជួន ថាវរ៉ា ដោយសាររូបសម្ជស្សស្រស់ស្អាត មានទេពកោសល្យសម្តែងមានកាយវិការល្អ ទោះបីជាពីតួឯកមកជាតួម្តាយក៏ដោយ ក៏នាងនៅតែឈរលើវិស័យសិល្បៈសម្តែងជាអាជីពជាប់ ហើយការងាររលូននិងមានកេរ្តិ៍ឈ្មោះល្បីគួរសមទៀតផង ។ ទន្ទឹមនឹងកញ្ញាជួន ថាវរ៉ា ក៏ជួបប្រទះនឹងរឿងរ៉់ាវច្រើនដែរ ដូចជាកន្លងមកឮថាមានអាណិកជនខ្មែររស់នៅ ប្រទេសអូស្ត្រាលីទិញរថយន្តកូរ៉ូឡាឱ្យជិះ តែនាងបានបដិសេធ ហើយថ្មីៗនេះទៀតឮថានាងមានជាប់ពាក់ព័ន្ធស្នេហាជាមួយបុរសចំណាស់ម្នាក់ជាអាណិកជនខ្មែរនៅប្រទេសបារាំង ។ នៅពេលអ្នកយកព័ត៌មានជួបសួរនាំ កញ្ញា ជួន ថាវរ៉ា បានបង្ហើបថា ជាការពិតនាងមានទំនាក់ទំនងជាមួយអាណិកជនខ្មែរនៅប្រទេសបារាំងមែន តែទើបស្គាល់គ្នាទេមិនទាន់មានស្នេហាស៊ីជម្រៅឡើយ។ ទោះបីជាយ៉ាងណាក៏ដោយ ក៏គេដឹងថា កញ្ញា ថាវរ៉ា និងអាណិកជនខ្មែរនៅប្រទេសបារាំងនោះតែងតែទូរស័ព្ទទាក់ទងជួបគ្នាស្ទើររាល់ថ្ងៃ ។
កញ្ញា ថាវរ៉ា បញ្ជាក់ថា នាងមិនទាន់សម្រេចចិត្តនោះទេរឿងស្នេហា ព្រោះសព្វថ្ងៃកំពុងតែជាប់រវល់លើវិស័យសិល្បៈច្រើន ។ ក្នុងវ័យ២៥ឆ្នាំកញ្ញាបញ្ជាក់ថា បេះដូងនាងមិនទាន់ជាកម្មសិទិ្ធរបស់អ្នកណាម្នាក់នៅឡើយទេ ៕
ចែករំលែកព័តមាននេះ