រាជធានីភ្នំពេញ ៖ ជាការពិតណាស់ថា តារាថ្មីៗជាសិល្បការិនីដែលទើបបោះជំហានចូលប្រឡូកក្នុងសង្គមសិល្បៈសម្តែង ភាគច្រើនសុទ្ធតែមានមហិច្ឆតារៀងៗខ្លួន ។ កញ្ញា ហេង សុកញ្ញា ក្នុងវ័យ១៩ឆ្នាំ មានស្រុកកំណើតនៅស្រុកកៀនស្វាយ ខេត្តកណ្តាល និងមានឪពុកម្តាយជាអាជីករ តែកញ្ញាមាននិស្ស័យស្រឡាញ់សិល្បៈតាំងពីក្មេង។ សព្វថ្ងៃ ក្រៅពីខិតខំប្រឹងប្រែងសិក្សារៀនសូត្រនៅសាកលវិទ្យាល័យន័រតុន ឆ្នាំទី៣ ផ្នែកធនាគារនិងហិរញ្ញវត្ថុ កញ្ញាក៏បានឆ្លៀតឱកាសចូលប្រឡូកក្នុងសង្គមសិល្បៈសម្តែង ថតកាយវិការខារ៉ាអូខេ ថតភាពយន្ត រួមទាំងដើរបង្ហាញម៉ូដផងដែរតាំងពីឆ្នាំ ២០១០ ។
កញ្ញា ហេង សុកញ្ញា បានប្រាប់អ្នកយកព័ត៌មានយើងថា ក្នុងរយៈពេល២ឆ្នាំកន្លងមកនេះ ដែលនាងបានចូលប្រឡូកក្នុងវិស័យសិល្បៈសម្តែង ក្រៅពីថតកាយវិការខារ៉ាអូខេឱ្យផលិតកម្មក្រៅប្រទេសជាច្រើន នាងក៏មានឱកាសបានចូលរួមសម្តែងភាពយន្តភាគបានមួួយរឿង គឺរឿង«សម្រស់ជីវិត» ដែលបានចាក់ផ្សាយតាមកញ្ចក់ទូរទស្សន៍កន្លងមក ។ ក្នុងរឿង«សម្រស់ជីវិត»នោះ អ្នកដឹកនាំរឿងតម្រូវឱ្យនាងសម្តែងជាតួកាចឆ្នាស ឈ្មោះ នាងសម្ផស្ស ។
កញ្ញាហេង សុកញ្ញា ថ្វីបើជាតារាថ្មីទើបនឹងរះក៏ពិតមែន តែដោយសារនាងមានរូបសម្ផស្សស្រស់ស្អាត និងមានទេពកោសល្យសម្តែងបានល្អទៀតនោះ ទើបនាងមិនសូវមានពេលទំនេរទេ គឺមានការងារសិល្បៈមមាញឹកគ្រាន់បើ ហើយក្នុងឆ្នាំ២០១២នេះ នាងសម្តែងឱ្យផលិតកម្មរៃមាស តោមាស នាគហោះ និងសម្តែងក្នុងកម្មវិធីសម្រាប់ចាក់ផ្សាយតាមកញ្ចក់ទូរទស្សន៍ជាតិកម្ពុជាសម្រាប់ថ្ងៃបុណ្យចូលឆ្នាំថ្មីផងដែរ ។
កញ្ញា ហេង សុកញ្ញា បានប្រាប់ថា ការចូលប្រឡូកក្នុងវិស័យសិល្បៈសម្តែងនេះ នាងមិនបានចូលហ្វឹកហាត់នៅក្នុងសាលា ឬក្លឹបសិល្បៈណាមួយទេ គឺហ្វឹកហាត់តាមការទស្សនាតាមវីដេអូ និងតាមទូរទស្សន៍នៅផ្ទះ ហើយក៏អភិវឌ្ឍដោយខ្លួនឯង ។ សព្វថ្ងៃ ដោយចង់បង្ហាញមុខតាមកញ្ចក់ទូរទស្សន៍ឱ្យបានច្រើននោះ ពេលទំនេរនាងក៏ហ្វឹកហាត់ច្រៀង និងហ្វឹតហាត់ធ្វើជាពិធីការិនី ដើម្បីទៅថ្ងៃអនាគតក្លាយជាតារាសម្តែង និងជាតារាចម្រៀង រួមជាពិធីការិនី មានកេរ្តិ៍ឈ្មោះល្បីផងដែរ ។ ទោះបីជាយ៉ាងណា កញ្ញា ហេង សុកញ្ញា ចង់ចាប់អាជីពធ្វើការមួយទៅតាមជំនាញដែលនាងសិក្សារៀនសូត្រ គឺផ្នែក ធនាគារនិងហិរញ្ញវត្ថុ រួមទាំងសិល្បៈឱ្យដើរទន្ទឹមគ្នាផងដែរ ព្រោះនាងយល់ថា សិល្បៈនិងចំណេះដឹងផ្សេងៗ បើដើរទន្ទឹមគ្នាគឺរឹតតែល្អប្រសើរ ។
ទាក់ទិននឹងជីវិតផ្ទាល់ខ្លួន កញ្ញាហេង សុកញ្ញា បង្ហើបប្រាប់ថា នាងមិនទាន់មានសង្សារ ឬគូស្នេហ៍ប្រចាំចិត្តនៅឡើយទេ ព្រោះនាងមិនទាន់គិត ហើយក៏កំពុងតែខិតខំសិក្សារៀនសូត្រ បើគិតរឿងស្នេហារៀនមិនចូលទេ ហើយក៏មិនទៅសម្តែងបានដែរ ។ បើមានសង្សារ ឬគូស្នេហ៍ហើយ មិនអាចថតកើតទេ ខ្លាចគេប្រចណ្ឌ ដូច្នេះចាំអាយុច្រើនបន្តិច ចាស់ចិត្តចាស់គំនិតបន្តិចសិនសឹមគិតគូររឿងស្នេហា ៕
ចែករំលែកព័តមាននេះ