រាជធានីភ្នំពេញ ៖ ស្ដ្រីមានផ្ទៃពោះ៣ខែដើរឆ្លងផ្លូវត្រូវម៉ូតូដឹកហ្គាសបើកមកដល់បុកបណ្ដាលឱ្យដួលប៉ះពាល់ដល់ផ្ទៃពោះ កាលពីវេលាម៉ោង១០និង២០នាទីយប់ថ្ងៃទី៨ មីនា នៅតាមបណ្តោយវិថីសេនាប្រមុខគឹម អ៊ីលសុង កែងវិថីសហព័ន្ធរុស្ស៊ី ក្នុងសង្កាត់ទឹកល្អក់ទី១ ខណ្ឌទួលគោក ។ ស្ដ្រីរងគ្រោះឈ្មោះចាន់ គន្ធា អាយុ២២ឆ្នាំ មានផ្ទៃពោះ៣ខែ ជាកម្មការិនីរោងចក្រ ស្នាក់នៅបន្ទប់ជួលសង្កាត់ទឹកថ្លា ខណ្ឌសែនសុខ ត្រូវបុរសជាប្ដីបានឱ្យដឹងថា មុនពេលកើតហេតុគាត់បានជិះម៉ូតូសង់កូរ៉េ ពណ៌ក្រហម ឌុបប្រពន្ធទៅ លេងផ្ទះបងប្អូននៅទួលគោក ខណៈជិះមកដល់ស្តុបអំបាសាដឺ ម៉ូតូអស់សាំងគាត់បានបណ្ដើរម៉ូតូឆ្លងទៅចាក់សាំងនៅស្ថានីយ៍ប្រេងឥន្ធនៈតេលានៅទល់មុខស្តុបនោះ។
បុរសជាប្ដីបន្ដទៀតថា ចំណែកប្រពន្ធរបស់គាត់បានដើរសសៀរតាមរបងសាកលវិទ្យាល័យភូមិន្ទភ្នំពេញ ហើយមកដល់មុខស្លាកវិថីសេនាប្រមុខគឹម អ៊ីលសុង ក៏ដើរឆ្លងផ្លូវបានពាក់កណ្ដាល ស្រាប់តែមានម៉ូតូសង់កូរ៉េ ពណ៌ក្រហម ជាម៉ូតូសម្រាប់ដឹកធុងហ្គាស។ ប៉ុន្ដែពេលបើកនោះមិនមានដឹកធុងហ្គាសទេ បើកបរដោយយុវជន ម្នាក់មិនមានចង្កៀងសម្រាប់បំភ្លឺផ្លូវទេ លុះបើកមកដល់បានបុកស្ដ្រីរងគ្រោះ បណ្ដាលឱ្យដួលចុកក្នុងពោះ ។
ក្រោយពេលកើតហេតុម៉ូតូបង្កហេតុនោះប្រុងបើករត់គេច ប៉ុន្ដែត្រូវសមត្ថកិច្ចប្រចាំការនៅកន្លែងកើតហេតុឃាត់បាន ទើបភាគីទាំងពីរបានធ្វើការចរចាគ្នាដោយជនរងគ្រោះបានទាមទារទៅភាគីបង្កនោះចំនួន៦០ដុល្លារសំរាប់យកទៅពិនិត្យមើលផ្ទៃពោះ ៕
ចែករំលែកព័តមាននេះ