យោងទៅតាមប្រភពព័ត៌មានដេលី ឈីលី ចេញផ្សាយកាលពីថ្ងៃពុធ ទី១៨ មករា ឆ្នាំ២០១២បានឱ្យដឹងថា រាជនីសម្រស់តារាចម្រៀងប៉ុបជប៉ុននាងអៃយូមី ហាម៉ាសាគី បានប្រកាសលែងលះស្វាមីរបស់នាង គឺលោកម៉ានូអែលដែលជាតួសម្តែងភាពយន្តរបស់ប្រទេសអូរទ្រីស បន្ទាប់ពីរៀបការបានរយៈពេលត្រឹមតែ១ឆ្នាំប៉ុណ្ណោះ ។ នាងអៃយូម៉ី វ័យ៣៣ឆ្នាំ បានរៀបការជាមួយលោកម៉ានូអែល អាយុ៣១ឆ្នាំ ដែលជាតួសម្តែងប្រុសជនជាតិអូទ្រីស បន្ទាប់ពីពួកគេបានជួបគ្នាកាលពីឆ្នាំ២០១០ ក្នុងរដ្ឋឡូសអេនចឺឡេស សហរដ្ឋអាមេរិកក្នុងពេលផ្សព្វផ្សាយបទចម្រៀងរបស់នាងដែលមានចំណងជើងថា «Virgin Road» ហើយក៏បានរៀបអាពាហ៍ពិពាហ៍នៅថ្ងៃទី១ មករា ឆ្នាំ២០១១ ។
ចំណែកឯប្រភពព័ត៌មានជប៉ុនក្យូដូ ក៏បានឱ្យដឹងផងដែរថា នាងហាម៉ាសាគីជាដើមចមក្នុងការដាក់ពាក្យបណ្តឹងលែងលះតាមរយៈមេធាវីរបស់នាង ។ មូលហេតុដែលនាំឱ្យមានការដាក់ពាក្យលែងលះនេះមិនត្រូវបាននាងអៃយូម៉ី ប្រាប់ឱ្យដឹងលំអិតនោះទេ ក៏ប៉ុន្តែមានហេតុផលមួយ គឺនាងមិនចង់ចាកចេញពីទឹកដីជប៉ុនទៅរស់នៅទឹកដីសហរដ្ឋអាមេរិកជួបជុំជាមួយប្តីរបស់នាងដែលរៀបការក្នុងព្រះវិហារនៅសហរដ្ឋអាមេរិក ។ ការផ្លាស់ប្តូរចិត្តរបស់នាងបានកើតក្រោយពីមានរលកយក្សស៊ូណាមីនៅក្នុងប្រទេសរបស់នាងកាលពីថ្ងៃទី១១ មីនា ឆ្នាំ២០១១ ៕
ចែករំលែកព័តមាននេះ