រាជធានីភ្នំពេញ ៖ យុវជនសុខ អួចឧត្តម អាយុ១៧ឆ្នាំ ជាសិស្សនៅវិទ្យាល័យទួលទំពូង មាននិស្ស័យស្រឡាញ់សៀករហស្សកម្មដូច ឪពុកឈ្មោះសុខ សំអុល ហៅនាយសូឡូ និងម្តាយឈ្មោះអួច ផល្លា ដែរ ។ ឧត្តមសព្វថ្ងៃកំពុងរស់នៅក្នុងភូមិសន្សំកុសល៤ សង្កាត់បឹងទំពុន ខណ្ឌមានជ័យ មានបងប្អូន២នាក់ គឺរូបគេនិងបងប្រុសម្នាក់ទៀត ។
យុវជនសុខ អួចឧត្តមឱ្យដឹងថា ដោយសារឪពុកម្តាយជាអ្នកសិល្បៈសៀក នៅពេលគេមានអាយុ៤ឆ្នាំមាននិស្ស័យស្រឡាញ់សិល្បៈនេះ តាមឪពុកម្តាយ ដែរ ។ នៅអាយុ៨ឆ្នាំ គេបានហ្វឹកហាត់ជាមួយឪពុកម្តាយ ដោយយកចិត្តទុកដាក់ បំផុត។ ដំបូងឡើយគេហាត់ជិះកង់មួយអត់តួនិងហាត់បោះកូនបាល់ច្រើន រួមទាំងហាត់បោះចាន បោះមួកជាដើម ។
ក្រោយពីហ្វឹតហាត់ជាមួយឪពុកម្តាយ និងមិត្តភក្តិមួយចំនួនដែលមកហាត់ជាមួយឪពុកម្តាយរយៈពេល៤ឆ្នាំ មក ឧត្តម បានចេញសម្តែងជូនប្រិយមិត្តទស្សនានៅលើឆាកប្រគំតន្ត្រីផ្សេងៗតាមស្ថានីយទូរទស្សន៍និងនៅតាមកម្មវិធីមហោស្រពជាតិ និងបុណ្យជាតិផ្សេងៗនៅក្នុងរាជធានីភ្នំពេញ និងនៅតាមបណ្តាខេត្តនានា ។
យុវជនឧត្តម ឱ្យដឹងថា កន្លងមកគេធ្លាប់ឡើងសម្តែងបង្ហាញទេពកោសល្យនៅលើឆាកប្រគំតន្ត្រីតាមស្ថានីយទូរទស្សន៍នានាគ្រប់កម្មវិធីគ្រប់បុ៉ស្តិ៍ទាំងអស់ ។ ជាក់ស្តែងកាលពីថ្ងៃអាទិត្យទី៨ មករា និងកាលពីថ្ងៃសៅរ៍ទី១៤ មករា ឆ្នាំ២០១២ គេបានសម្តែងជូនប្រិយមិត្តទស្សនិកជនទស្សនានៅលើឆាកប្រគំតន្ត្រីនៃស្ថានីយទូរទស្សន៍អប្សរាប៉ុស្តិ៍លេខ១១ និងស្ថានីយទូរទស្សន៍ CTN ។
សព្វថ្ងៃក្រៅពីខិតខំសិក្សារៀនសូត្រចំណេះទូទៅនៅសាលា ពេលទំនេរឧត្តមបានបន្តហ្វឹកហាត់សម្តែងសៀករហស្សកម្មប្រាថ្នាបន្តវេនពីឪពុកម្តាយ ដែលកំពុងបើកក្លឹបបង្ហាត់កុមារកំព្រានូវវិជ្ជាថ្ពឹនភ្នែក ឬហៅថាសៀករហស្សកម្មរហ័សដៃនិងល្បិចផ្សេងៗដូចជាសម្តែងរៀបបៀ សម្តែងជបផ្កា សម្តែងជបសត្វព្រាប និងវគ្គផ្សេងៗ ទៀតដែលឪពុកម្តាយធ្លាប់ហ្វឹតហាត់រៀននៅប្រទេសរុស្ស៊ី ។ ពេលនេះ ឪពុកម្តាយរបស់គេកំពុងតែចែករំលែកចំណេះឱ្យកុមារកំព្រាក្រីក្រ និងរូបគេជាកូន ដើម្បីបន្តថែរក្សាសិល្បៈសៀកកុំឱ្យបាត់បង់ ។ យុវជនឧត្តម ក៏ចេះសម្តែងសៀកបែបកំប្លែងផងដែរ ដូច្នេះហើយគេរំពឹងថា នឹងអាចបន្តវេនពីឪពុកម្តាយបាន ៕
ចែករំលែកព័តមាននេះ