រាជធានីភ្នំពេញ ៖ ដើមឆ្នាំ២០១២ នេះអ្នកយកព័ត៌មានកោះសន្តិភាពបានឮពាក្យចចាអារ៉ាមថា តារាចម្រៀងប្រចាំផលិតកម្មសាន់ដេ ខេមរៈ សិរីមន្ត លួចរៀបការស្ងាត់ៗរយៈពេល៣ឆ្នាំមកហើយ និងមានកូនម្នាក់ ។ យើងបានទូរស័ព្ទទៅជួបលោកខេមរៈ ភារុណ ជាអ្នកនិពន្ធបទចម្រៀងឱ្យប្អូនប្រុស គឺលោកខេមរៈ សិរីមន្ត ច្រៀងទាក់ទិនពាក្យចចាមអារ៉ាមនោះ ។ លោកខេមរៈ ភារុណ ឆ្លើយយ៉ាងខ្លីថា «សិរីមន្ត មិនទាន់មានប្រពន្ធ ឬកូនទេ» ។ មហាជនតែងតែឆ្ងល់ថា តើហេតុអ្វីបានជាតារាចម្រៀងមានប្រពន្ធ កូន ឬមានប្តី និងកូន បែរជាលាក់ទស្សនិកជនទៅវិញ ? តើគេខ្លាចបាត់បង់អាជីព ឬបាត់បង់ប្រជាប្រិយភាព ? ចុះតារាចម្រៀងជើងចាស់ដូចជា លោកសុខ សាខន លោកហួរ ឡាវី លោកណូយ វ៉ាន់ណេត អ្នកនាងម៉េង កែវពេជ្ជតា អ្នកស្រីហ៊ឹម ស៊ីវន ជាដើមសុទ្ធសឹង តែមានប្រពន្ធមានប្តី និងកូន ហេតុអ្វីពួកគាត់មិនលាក់បាំង ហើយនៅតែល្បីឈ្មោះ ។
ពាក្យចចាមអារ៉ាមទាក់ទិនលោកខេមរៈ សិរីមន្ត ថា ក្រោយពីលោករៀបការ កាលពីឆ្នាំ២០០៩ ដោយស្ងៀមស្ងាត់មក គឺលោករស់នៅក្នុងភូមិគ្រឹះដ៏ធំស្កឹមស្កៃមួយនៅខាងលិចវត្តសំរោងអណ្តែតទល់មុខសួនកម្សាន្តចម្ការព្រីង ហើយក្រោយពីថតភាពយន្តរឿង «ព្រាយដែកគោល» ចប់ពេលកំពុងដាក់បញ្ចាំងកាលពីចុងឆ្នាំ២០១១ ប្រពន្ធរបស់លោកឆ្លងទន្លេបានកូនមួយ ប៉ុន្តែពុំដឹងថា កូនប្រុស ឬក៏ស្រីទេ ។ ទោះជាយ៉ាងណាក្តី លោកខេមរៈ ភារុណ ជាបងប្រុសបដិសេធថា «ខេមរៈ សិរីមន្ត គ្មានប្រពន្ធ ឬកូននោះទេ» ។
លោកខេមរៈ សិរីមន្ត ដែលឆ្នាំនេះមានអាយុ២៧ឆ្នាំ ដំបូងប្រឡងជាប់ក្នុងកម្មវិធីណេសត្លេនៅស្ថានីយទូរទស្សន៍ប៉ុស្តិ៍លេខ៣ ជាប់ចំណាត់ថ្នាក់លេខ១ ។ ក្រោយមកនៅឆ្នាំ២០០៤ ដដែលលោកទៅសុំផលិតកម្មយូធូច្រៀង តែថៅកែមិនឱ្យទេ ព្រោះពុំទាន់មានទឹកដមសំឡេងល្អ ។ ពេលនោះអ្នកកាសែត ដែលជាអ្នកជិតស្និទ្ធនឹងថៅកែយូធូ មានការអាណិតអាសូរសិរីមន្ត ក៏ជួយសុំថៅកែឱ្យបានហ្វឹកហាត់រៀន និងធ្វើការនៅយូធូ ។ រហូតដល់ពេលល្បីគេចាកចេញពីយូធូ ទៅកាន់សាន់ដេ ហើយតែងតែមិនឱ្យអ្នកកាសែតសម្ភាសផ្ទាល់ទេ គឺឱ្យជួបតែបងប្រុស
ខេមរៈ ភារុណ ។ កាលពីសិរីមន្ត មិនទាន់ល្បីសុំឱ្យអ្នកកាសែតជួយនោះ គេមិនដែលឃើញមុខលោកខេមរៈ ភារុណ ទេ ។
គេថា រឿងអាថ៌កំបាំងផ្ទាល់ខ្លួនលាក់គេបាន តែមិនអាចលាក់ខ្លួនឯងបានទេ ហើយមុននិងក្រោយគង់តែគេដឹង ដូច្នេះបើលោកខេមរៈ សិរីមន្តមានប្រពន្ធ និងកូនមែន ហើយចង់លាក់មហាជននោះ យូរ និងឆាប់គង់តែបែកធ្លាយមិនខាន ម្យ៉ាងទំនងជាលាក់អ្នកជិតខាងមិនបានទេ ៕
ចែករំលែកព័តមាននេះ