រាជធានីភ្នំពេញ ៖ ស្ត្រីពាណិជ្ជករម្នាក់កាលពីថ្ងៃទី៤ តុលា ត្រូវសមត្ថកិច្ចកងរាជអាវុធហត្ថលើផ្ទៃប្រទេសនាំខ្លួនបញ្ជូនទៅកាន់សាលាដំបូងរាជធានី ពីបទចេញមូលប្បទានបត្រអត់សាច់ប្រាក់ ។ ទាក់ទិននឹងការនាំខ្លួនស្ត្រីពាណិជ្ជកររូបនេះត្រូវបានមន្ត្រីកងរាជអាវុធហត្ថលើផ្ទៃប្រទេសអះអាងថា ជាការអនុវត្តតាមដីកាបញ្ជាឱ្យចូលខ្លួនរបស់សាលាដំបូងរាជធានីភ្នំពេញ ដែលចុះហត្ថលេខាដោយលោកសុខ រឿន ព្រះរាជអាជ្ញារងអមសាលាដំបូងកាលពីថ្ងៃទី១៤ កញ្ញា កន្លងទៅ ។
ស្ត្រីដែលកម្លាំងកងរាជអាវុធហត្ថនាំខ្លួនតាមដីការបស់តំណាងអយ្យការនេះឈ្មោះខៀវ ផាន់មរកត ហៅខៀវ គិរីមរកត អាយុ៤០ឆ្នាំ ស្នាក់នៅផ្ទះលេខ៤៥Eo និង E1 ផ្លូវលេខ២៦១ ភូមិ៧ សង្កាត់ទឹកល្អក់ទី៣ ខណ្ឌទួលគោក ។ ប្រភពព័ត៌មាននៅសាលាដំបូងបានឱ្យដឹងថា ការឱ្យនាំខ្លួននេះ គឺយោងទៅតាមពាក្យបណ្តឹងមួយដែលចោទប្រកាន់អ្នកស្រីខៀវ ផាន់មរកត ថា បានខ្ចីប្រាក់គេចំនួន៩ម៉ឺនដុល្លារយកទៅប្រកបអាជីវកម្ម ។ ក្រោយមកម្ចាស់ប្រាក់បានទាមទារវិញ ហើយអ្នកស្រីខៀវ ផាន់មរកត បានសងរំលស់អស់មួយភាគធំហើយនៅសល់តែ៣ម៉ឺនដុល្លារប៉ុណ្ណោះ នេះបើតាមការបញ្ជាក់ពីមេធាវីការពារសិទ្ធិឱ្យអ្នកស្រីខៀវ ផាន់មរកត ។
ដោយប្រាក់នៅសល់៣មឺុនដុល្លារ ម្ចាស់គេទារញឹកញាប់ពេក អ្នកស្រីក៏បានចេញសែក (មូលប្បទានបត្រ) មួយឱ្យទៅបើកនៅធនាគារ លុះម្ចាស់ប្រាក់យកសែកនោះទៅបើកមានការឆ្លើយតបថា សែកនេះ គ្មានសាច់ប្រាក់ទេ ហេតុនេះម្ចាស់ប្រាក់ក៏ដាក់ពាក្យប្តឹងទៅតុលាការ ទើបបានជាតំណាងអយ្យការ គឺលោកព្រះរាជអាជ្ញារងសុខ រឿន ចេញដីកាឱ្យសមត្ថកិច្ចនាំខ្លួន ។ ប្រភពព័ត៌មានឱ្យដឹងទៀតថា បន្ទាប់ពីត្រូវសមត្ថកិច្ចនាំខ្លួនទៅតុលាការ អ្នកស្រីខៀវ ផាន់មរកត បានពឹងពាក់មេធាវីម្នាក់ឈ្មោះលី គឹមលន់ ទៅធ្វើកិច្ចសន្យាតម្កល់ប្រាក់ចំនួន១ម៉ឺនដុល្លារ ដើម្បីធានាអ្នកស្រីឱ្យបានរួចផុតពីការឃុំខ្លួន ។
ក្រោយពីបានធ្វើកិច្ចសន្យាហើយ អ្នកស្រីខៀវ ផាន់មរកត ត្រូវបានតំណាងអយ្យការឯកភាពអនុញ្ញាតឱ្យវិលទៅផ្ទះវិញ ។ ទោះបីជាយ៉ាងណា បើតាមគេដឹងប្រាក់១ម៉ឺនដុល្លារដែលថា បានតម្កល់នៅតុលាការនោះ គឺគ្មានទេ មានតែកិច្ចសន្យាប៉ុណ្ណោះ ហើយរឿងនេះទំនងជាតំណាងអយ្យការចេញដីកាឱ្យចូលខ្លួនម្តងទៀត ព្រោះដើមបណ្តឹងមិនសុខចិត្ត៕
ចែករំលែកព័តមាននេះ