នាងប៉ារីស ហ៊ីលតុន ត្រូវបានចាប់ខ្លួនទៀតពីបទមានថ្នាំញៀន
ដោយ ៖ ប្រុសកោះ
ថ្ងៃអាទិត្យ ទី២៩ ខែសីហា ឆ្នាំ២០១០ ម៉ោង ០៩:៤៧
គេហទំព័របរទេស
នាងប៉ារីសហ៊ីលតុន
នាងប៉ារីស ហ៊ីលតុន ជាតារាភាពយន្តហូលីវូដដែលទទួលបានកេរមរតកមហាសាល ពេលនេះបានប្រឈមមុខនឹងបញ្ហាផ្ទាល់ខ្លួនធ្ងន់ធ្ងរជាថ្មីម្តងទៀត ដោយនាងត្រូវបានចាប់ខ្លួនពីបទមានថ្នាំញៀនកូកាអ៊ីន ។ តាមប្រភពព័ត៌មានឱ្យដឹងថា នាងប៉ារីស ហ៊ីលតុន ត្រូវបានចាប់ខ្លួនកាលពីយប់ថ្ងៃទី២៨ សីហា កន្លងមក នៅពេលនាងកំពុងបើករថយន្តនៅតាមផ្លូវមួយក្នុងទីក្រុងឡាស់វ៉េហ្គាស ។ ប្រភពព័ត៌មានដដែលបានឱ្យដឹងទៀតថា នៅពេលនាងហ៊ីលតុន កំពុងបើកបររថយន្ត ប៉ូលិសបានបញ្ឈប់រថយន្តរបស់នាង ក្រោយពីមានការផ្តល់តំរុយថា ក្នុងរថយន្តរបស់នាងហ៊ីលតុន អាចមានផ្ទុកថ្នាំញៀន ។ នៅពេលឆែកឆេរក្នុងរថយន្តនោះ ប៉ូលិសបានរកឃើញថ្នាំញៀនប្រភេទកូកាអ៊ីន ហើយក៏ចាប់ខ្លួននាងហ៊ីលតុន តែម្តង ។
ពេលនេះនាងហ៊ីលតុន ត្រូវបានឃុំខ្លួននៅមន្ទីរឃុំខ្លួនក្នុងសង្កាត់ Clark Country ។ ប៉ុន្តែទោះបីជាបែបណា ក្រោយមកនាងហ៊ីលតុន ត្រូវបានដោះលែងវិញ ហើយប៉ូលិសមិនបានឱ្យដឹងថា នាងហ៊ីលតុន នឹងត្រូវប្រឈមមុខនឹងសវនាការអំពីទោសកំហុសរបស់នាងនៅពេលណានោះទេ ។ អ្នកនាំពាក្យប៉ូលិសនិយាយថា រថយន្តនោះមិនមែននាងហ៊ីលតុន ជាអ្នកបើកបរទេ គឺមិត្តភក្តិរបស់នាងជាអ្នកបើក ។ នាងប៉ារីស ហ៊ីលតុន វ័យ២៩ឆ្នាំ ជាតារាភាពយន្តហូលីវូដល្បីឈ្មោះ និងសិចស៊ី ហើយមានរឿងអាស្រូវច្រើនបំផុតទាក់ទងទៅនឹងការប្រើប្រាស់ថ្នាំញៀន ហើយនាងត្រូវបានប៉ូលិសចាប់ខ្លួនជាច្រើនលើកច្រើនសារួចមកហើយ ពីបទមានថ្នាំញៀន ។ កាលពី២ខែមុន នាងត្រូវបានឃាត់ខ្លួននៅអាហ្វ្រិកខាងត្បូងពីបទមានថ្នាំញៀននៅក្នុងអំឡុងពេលនាងទស្សនាការប្រកួតកីឡាបាល់ទាត់ពិភពលោកឆ្នាំ២០១០ ។ កាលពីឆ្នាំ២០០៧កន្លងមក នាងត្រូវបានតុលាការកាត់ទោសដាក់ពន្ធនាគាររយៈពេល៤៥ថ្ងៃពីបទបំពានច្បាប់បើកបរ ៕
