ខេត្តកំពង់ស្ពឺ ៖ ក្រុមចោរប្រដាប់ដោយកាំភ្លើងអាកាគ្រប់ដៃបានសម្រុកចូលរើកកាយរបស់របរនៅក្នុងផ្ទះរបស់ប្រធានពន្ធដាខេត្តកណ្តាល និងជាជាងកាត់សក់ឱ្យសម្តេចនាយករដ្ឋមន្ត្រី យកបានកាំភ្លើង១ដើមរត់គេច
ខេត្តកំពង់ស្ពឺ ៖ ក្រុមចោរប្រដាប់ដោយកាំភ្លើងAKគ្រប់ដៃបានសម្រុកចូលរើ.កកាយរបស់របរនៅក្នុងផ្ទះរបស់ប្រធានពន្ធដារខេត្តកណ្តាល និងជាជាងកាត់សក់ឱ្យសម្តេចនាយករដ្ឋមន្ត្រី យកបានកាំភ្លើង១ដើមរត់គេចខ្លួនបាត់ស្រមោល កាលពីវេលាម៉ោង៦ និង៤០នាទីល្ងាច ថ្ងៃទី២៨ វិច្ឆិកា ២០១៥ ស្ថិតនៅក្នុងភូមិព្រៃរកា ឃុំរកាកោះ ស្រុកគងពិសី ។
សមត្ថកិច្ចខេត្តកំពង់ស្ពឺបានឱ្យដឹងថា មុនពេលកើតហេតុ ផ្ទះរបស់ជនរងគ្រោះខាងលើមិនមានអ្នកណានៅឡើយ ហើយកូនប្រុសម្នាក់ឈ្មោះ អ៊ុំ សំរេច អាយុ១៧ឆ្នាំ បានត្រឡប់មកពីរៀនវិញក៏ចាក់សោទ្វាររួចបានដើរចូលក្នុងផ្ទះខាងក្រោម ស្រាប់តែបានឮសំលេងនៅខាងលើក៏បានទូរសព្ទ័ទៅបងស្រីរបស់គេថា មានចោររើ.កកាយនៅក្នុងផ្ទះ ។
ភ្លាមៗនោះបងស្រីរបស់គេបានទូរសព្ទ័ទៅប្តឹងសមត្ថកិច្ចគ្រប់ជាន់ថ្នាក់ដើម្បីចុះមកជួយអន្តរាគមន៍ដែលមានវត្តមានដូចជាលោកឧត្តមសេនីយ៍ទោ សុខ ខេមរិន ប្រធាននាយកដ្ឋាននគរបាលព្រហ្មទណ្ឌក្រសួងមហាផ្ទៃ លោកវរសេនីយ៍ឯក គង់ សត្ថារិន អាវុធហត្ថក្រុងភ្នំពេញ សមត្ថកិច្ចនគរបាល និងអាវុធហត្ថស្រុកអង្គស្នួល នគរបាលស្រុកគងពិសី អាវុធហត្ថស្រុកគងពិសី នគរបាលស្រុកសំរោងទង អាវុធហត្ថស្រុកសំរោងទង នគរបាលខេត្តកំពង់ស្ពឺ ព្រមទាំងកំលាំងអាវុធហត្ថខេត្តកំពង់ស្ពឺដែលដឹកនាំដោយលោកវរសេនីយ៍ឯក សៅ ពន្លឺ មេបញ្ជាការរងកងរាជអាវុធហត្ថខេត្តកំពង់ស្ពឺ ក្រោមបញ្ជារបស់លោកជូ សារុន មេបញ្ជាការកងរាជអាវុធហត្ថខេត្តបានចុះទៅដល់ធ្វើការឡោមពទ្ធ័ រួចប្រើយុទ្ធសាស្ត្រចូលរំដោះបានកូនប្រុសម្ចាស់ផ្ទះបានមិនមានរងរបួសឡើយ។
ប្រភពបានបន្តទៀតថា បន្ទាប់ពីរំដោះបានកូនម្ចាស់ផ្ទះហើយ កំលាំងចម្រុះបានសម្រុកចូលក្នុងផ្ទះជាន់ខាងលើដែលក្រុមចោរធ្វើសកម្មភាពនោះ ជាលទ្ធផលមិនឃើញមានអ្វីទាល់តែសោះ គ្រាន់តែឃើញមានស្នាមកាត់ចំរឹងបង្អួចខាងក្រោយផ្នែកខាងត្បូង និងរើកកាយសម្ភារមួយចំនួន ព្រមទាំងបានយកកាំភ្លើងខ្លី១ដើមម៉ាក ប៉េរ៉េតាទៅបាត់ផងដែរ។
ម្ចាស់ផ្ទះត្រូវបានស្គាល់មានឈ្មោះ ទាវ សាវឿន ភេទប្រុស អាយុជាង៦០ឆ្នាំ ជាប្រធានពន្ធដារខេត្តកណ្តាល និងជាជាងកាត់សក់ឱ្យសម្តេចនាយករដ្ឋមន្ត្រីផងដែរ។
ក្រោយកើតហេតុដោយមិនឃើញមានក្រុមជនសង្ស័យនោះ សមត្ថកិច្ចជំនាញបានធ្វើការសាកសួរកូនប្រុសម្ចាស់ផ្ទះដើម្បីកំណត់មុខសញ្ញា។
បើតាមប្រភពបានបង្ហើបឱ្យដឹងថា ក្រុមជនសង្ស័យមានគ្នាប្រហែល៦នាក់ប្រដាប់ដោយអាវុធគ្រប់ដៃ ស្លៀកពាក់ប៉ារ៉ា ព្រមទាំងមានពាក់ម៉ាស់ទៀតផង។ សមត្ថកិច្ចបានសន្និដ្ឋានថា ក្រុមចោរទាំងនេះអាចជាក្រុមតែមួយដែលប្លន់ផ្ទះថៅកែសំណង់នៅភូមិអង្គមេត្រី ឃុំរលាំងគ្រើល កាលពីវេលាម៉ោង០៧យប់ ថ្ងៃទី១៣ វិច្ឆិកា កន្លងទៅ៕
ព័ត៌មានលម្អិតនឹងផ្សាយជូនលើទំព័រកាសែតកោះសន្តិភាព
ចែករំលែកព័តមាននេះ