រាជធានីភ្នំពេញ ៖ ក្នុងរយៈពេល៣ថ្ងៃ គិតចាប់ពីថ្ងៃទី២៤ ដល់ថ្ងៃទី២៦ វិច្ឆិកា ២០១៥ នៃព្រះរាជពិធីបុណ្យអុំទូក បណ្ដែតប្រទីប សំពះព្រះខែ និងអកអំបុក នៅរាជធានីភ្នំពេញ បានបញ្ចប់ប្រកបដោយភាពជោគជ័យ
រាជធានីភ្នំពេញ ៖ ក្នុងរយៈពេល៣ថ្ងៃ គិតចាប់ពីថ្ងៃទី២៤ ដល់ថ្ងៃទី២៦ វិច្ឆិកា ២០១៥ នៃព្រះរាជពិធីបុណ្យអុំទូក បណ្ដែតប្រទីប សំពះព្រះខែ និងអកអំបុក នៅរាជធានីភ្នំពេញ បានបញ្ចប់ប្រកបដោយភាពជោគជ័យ មានន័យថា មិនមានគ្រោះថ្នាក់ ឬឧបទ្ទវហេតុអ្វីកើតឡើងជាធំដុំដែលគួរឲ្យកត់សំគាល់នោះទេ ក្នុងពេលមានប្រជាពលរដ្ឋចូលរួមរាប់ម៉ឺននាក់ ប៉ុន្តែអ្វីដែលជាការកត់សម្គាល់នោះគឺបញ្ហាកកស្ទះចរាចរណ៍ និងការខូចខាតសួនច្បារនៅតាមកន្លែងសប្បាយភាពនានា ដូចជា សួន ស្មៅ ផ្កា និងការ៉ូឡា តែមិនធ្ងន់ធ្ងរនោះទេ ដែលបញ្ហានេះសាលារាជធានីភ្នំពេញកំពុងជំរុញការងារជួសជុលថែទាំ ដោយសន្យាថា រយៈពេលមួយសប្តាហ៍នឹងរៀបចំឲ្យមានសភាពដូចដើមវិញហើយ ។
លោក សាំ ពិសិដ្ឋ នាយកមន្ទីរសាធារណការ និងដឹកជញ្ជូនរាជធានីភ្នំពេញបានឲ្យដឹងថា រយៈពេល៣ថ្ងៃនៃព្រះរាជពិធីបុណ្យអុំទូក បណ្ដែតប្រទីព សំពះព្រះខែ និងអកអំបុក នៅរាជធានីភ្នំពេញ បានបញ្ចប់ប្រកបដោយភាពជោគជ័យ តែមានការខូចខាតខ្លះ ដូចជាសួន ស្មៅ ត្រូវបានប្រជាពលរដ្ឋដែលចូលរួមជាន់ ជាពិសេសនៅយប់ថ្ងៃបុណ្យអុំទូកទី២ដែលមានភ្លៀង ធ្វើឲ្យស្មៅ និងផ្កា ប្រឡាក់ភក់ ចំណែកឯការ៉ូឡាវិញ ប្រឡាក់ទៅដោយខ្លាញ់ ប្រេងឆា និងស្កកៅស៊ូជាដើម ប៉ុន្តែទោះជាយ៉ាងណា ក្រុមកម្មកររបស់មន្ទីរសាធារណការបាននិងកំពុងខិតខំធ្វើការបោសសំអាតភ្លាមៗ និងបន្តជួសជុល ថែទាំ សួនស្មៅ និងផ្កា ក្នុងរយៈពេលមួយសប្តាហ៍ទៀតនឹងមានសភាពដូចដើមវិញហើយ ។
លោកបានបញ្ជាក់ថា ក្រោយពីបព្ចាប់ព្រះរាជពិធី បានពិនិត្យឃើញតាមទីតាំងសប្បាយនានាមានសំរាមគរពាសពេញសួនច្បារច្រើនជាងថ្ងៃទី១ និងថ្ងៃទី២ ដោយសារមានប្រជាពលរដ្ឋចូលរួមកាន់តែច្រើន ដោយមានការចូលរួមពីក្រុមយុវជនស្ម័គ្រចិត្ត រួមជាមួយកម្មកររបស់ក្រុមហ៊ុន ស៊ិនទ្រី បានដើររើសសម្រាម និងបោសសំអាតរួចរាល់នៅវេលាម៉ោង៩ព្រឹកថ្ងៃទី២៧ វិច្ឆិកានេះ ៕
ចែករំលែកព័តមាននេះ