រាជធានីភ្នំពេញ ៖ កម្ពុជាជាប់ចំណាត់ថ្នាក់លេខ៣ បន្ទាប់ពីប្រទេសម៉ាឡេស៊ី និងប្រទេសសិង្ហបុរី ខាងប្រើប្រាស់ទូរស័ព្ទដៃ និងស៊ីមកាតដែលមានចំនួនជាង២០លានគ្រឿង ខណៈចំនួនប្រជាជនសរុបមានប្រមាណជាង១៥លាននាក់ប៉ុណ្ណោះ ។
រាជធានីភ្នំពេញ ៖ កម្ពុជាជាប់ចំណាត់ថ្នាក់លេខ៣ បន្ទាប់ពីប្រទេសម៉ាឡេស៊ី និងប្រទេសសិង្ហបុរី ខាងប្រើប្រាស់ទូរស័ព្ទដៃ និងស៊ីមកាតដែលមានចំនួនជាង២០លានគ្រឿង ខណៈចំនួនប្រជាជនសរុបមានប្រមាណជាង១៥លាននាក់ប៉ុណ្ណោះ ។ ចំនួនអ្នកប្រើប្រាស់ទូរស័ព្ទច្រើនជាងចំនួនប្រជាជន សរុប នោះ ដោយសារតែអ្នកខ្លះប្រើប្រាស់ទូរស័ព្ទលើសពីមួយគ្រឿង ដែលអត្រាស្មើនឹង១៣៩%នៃអ្នកប្រើប្រាស់ ធៀបនឹងបណ្តាប្រទេសជាសមាជិកអាស៊ាន ។
តាមការសិក្សាមួយរបស់ USAID បង្ហាញថា បច្ចុប្បន្នប្រជាពលរដ្ឋកម្ពុជាប្រមាណ៩៤% មានទូរស័ព្ទប្រើប្រាស់ផ្ទាល់ខ្លួន ហើយក៏អាចបង្ហាញថាទីផ្សារទូរស័ព្ទនៅកម្ពុជា អាចនឹងចង្អៀត ។ មិនតែប៉ុណ្ណោះ ក្នុងរយៈពេលប៉ុន្មានឆ្នាំចុងក្រោយនេះ អ្នកប្រកបរបរខាងបម្រើសេវាកម្មទូរស័ព្ទសាធារណៈ ក៏មានការបាត់បង់ទៅហើយដែរ ដោយសារអ្នកប្រើប្រាស់ទូរស័ព្ទដៃផ្ទាល់ខ្លួនកើនឡើង ស្របពេលតម្លៃហៅចេញរបស់ក្រុមហ៊ុនទូរស័ព្ទនានាបានធ្លាក់ចុះ ។
លទ្ធផលនៃការសិក្សាដដែលក៏បានបង្ហាញដែរថា ទូរស័ព្ទដែលពលរដ្ឋកម្ពុជាប្រើប្រាស់ផ្ទាល់ខ្លួនចំនួន៦៣,៣% អាចសរសេរជាភាសាខ្មែរបាន ។ ការប្រើប្រាស់ទូរស័ព្ទសព្វថ្ងៃគឺមានគ្រប់វ័យ ក្នុងនោះមាន៦៧,៦%ជាបុរស និង៤៩%ជាស្ត្រី ។ ម្យ៉ាងទៀត ក្នុងចំណោមអ្នកប្រើប្រាស់ទូរស័ព្ទនៅទូទាំងប្រទេស គឺនៅទីក្រុង និងទីប្រជុំជន មានរហូតដល់៦៧% ហើយនៅជនបទមានជាង៦១,៧% ។
តាមរបាយការណ៍ដដែលបង្ហាញទៀតថា ក្នុងចំណោមអ្នកប្រើប្រាស់ទូរស័ព្ទចំនួន៣៩,៥% យ៉ាងតិចណាស់ ក៏មានទូរស័ព្ទ ស្មាតហ្វូនមួយគ្រឿងផងដែរ ។ ទូរស័ព្ទ
ស្មាតហ្វូនមានសមត្ថភាពអាចប្រើប្រាស់ជាភាសាខ្មែរប្រមាណ៧៨% ច្រើនជាង ទូរស័ព្ទដែលមិនអាចប្រើប្រាស់ខ្មែរបាន ដែលមានត្រឹមតែ៥៦,៣%ប៉ុណ្ណោះ ។
ទាក់ទងនឹងបច្ចេកវិទ្យាទូរស័ព្ទនេះដែរ គេរកឃើញថា ស្ទើរត១ភាគ៣នៃពលរដ្ឋកម្ពុជាទៅហើយដែលប្រើប្រាស់ទូរស័ព្ទភ្ជាប់ជាមួយប្រព័ន្ធអីុនធើរណេតដូចជា ហ្វេសប៊ុក ដែលជាបណ្ដាញសង្គមដ៏ល្បីមួយនៅលើពិភពលោក និងបណ្តាញសង្គមផ្សេងៗទៀត ។ ពលរដ្ឋកម្ពុជាភាគច្រើនដែលបានប្រើប្រាស់បណ្ដាញសង្គមនេះ គឺមានគណនីផ្ទាល់ខ្លួនក្នុងការផ្ដល់ និងទទួលព័ត៌មាន។ ចំណែកការប្រើបណ្ដាញសង្គមហ្វេសប៊ុកនេះ មានតែ៣%ប៉ុណ្ណោះ ដែលប្រើប្រាស់តាមកុំព្យូទ័រ ខណៈ៨០%ទៀតប្រើតាមទូរស័ព្ទដៃតែម្តង ។
បច្ចុប្បន្ន ការប្រើប្រាស់ប្រព័ន្ធអីុនធើរណេតបានក្លាយជាបណ្ដាញព័ត៌មានសំខាន់បំផុតទី២របស់កម្ពុជា បន្ទាប់ពីទូរទស្សន៍ ។ នៅក្នុងឆ្នាំ២០១៥នេះ ការប្រើទូរទស្សន៍មានចំនួន៣០%, អីុនធើរណេត២៤% និងវិទ្យុ២០% ហើយការប្រើប្រព័ន្ធអីុនធើរណេត នឹងអាចដណ្ដើមទីផ្សារទៀតនៅឆ្នាំបន្តបន្ទាប់ ។
តាមរយៈក្រុមហ៊ុនទូរស័ព្ទដែលទទួលស្គាល់ដោយរាជរដ្ឋាភិបាលនោះ បានរាយខ្សែកាបអុបទិកទៅតាមបណ្តាខេត្តនានាមានចំនួនជាង២ម៉ឺនគីឡូម៉ែត្រ ដែលជាឆ្អឹងខ្នងសម្រាប់តភ្ជាប់ប្រព័ន្ធអីុនធើរណេត ពីតំបន់មួយទៅតំបន់មួយ។ នេះបើតាមការលើកឡើងពីលោក ស៊ិន រ៉ាពីដ ប្រធានមជ្ឈមណ្ឌលស្រាវជ្រាវជាតិប្រៃសណីយ៍ និងទូរគមនាគមន៍ ។
គួរបញ្ជាក់ថា តាមរបាយការណ៍របស់ក្រសួងប្រៃសណីយ៍ និងទូរគមនាគមន៍ គិតត្រឹមខែកញ្ញា ឆ្នាំ២០១៥នេះ មានក្រុមហ៊ុនទូរស័ព្ទចល័តចំនួន៩ បានមកចុះបញ្ជីផ្គត់ផ្គង់សេវាទូរសព្ទ័ចល័តនៅក្នុងព្រះរាជាណាចក្រកម្ពុជា ហើយក្រុមហ៊ុនទាំងនោះបានពង្រីកសេវារបស់ខ្លួនឱ្យទូលាយ ដើម្បីឱ្យអ្នកប្រើប្រាស់សេវាទូរស័ព្ទកាន់តែមានភាពងាយស្រួលនៅគ្រប់ទីកន្លែងទូទាំងប្រទេស ។
គិតត្រឹមខែកញ្ញា ២០១៥ ការប្រើប្រាស់ទូរស័ព្ទចល័តមានចំនួន២១.៦៥២.៣៧៧គ្រឿង ខណៈទូរស័ព្ទអចល័តមានចំនួន២៨៣.៨៦២ គ្រឿង ។ ដោយឡែក ក្នុងរយៈពេលដូចគ្នានេះ អ្នកប្រើអីុនធើរណេតចល័តមានចំនួន ៦.១៧៩.០២៩នាក់ និងអីុនធើរណេតអចល័តមានចំនួន៧៧.៣៥៩នាក់ ៕
ចែករំលែកព័តមាននេះ