រាជធានីភ្នំពេញ ៖ ប្រទេសកម្ពុជា និងបារាំងបានចាប់ផ្តើមមានទំនាក់ទំនងជាមួយគ្នា ទាំងផ្នែកការទូត សេដ្ឋកិច្ច និងវប្បធម៌ ជាយូរលង់ណាស់មកហើយ ។ ក្រោយកិច្ចព្រមព្រៀងសន្តិភាពទីក្រុងប៉ារីស
រាជធានីភ្នំពេញ ៖ ប្រទេសកម្ពុជា និងបារាំងបានចាប់ផ្តើមមានទំនាក់ទំនងជាមួយគ្នា ទាំងផ្នែកការទូត សេដ្ឋកិច្ច និងវប្បធម៌ ជាយូរលង់ណាស់មកហើយ ។ ក្រោយកិច្ចព្រមព្រៀងសន្តិភាពទីក្រុងប៉ារីស បារាំងបានដើរតួនាទីយ៉ាងសំខាន់ក្នុងកសាង និងស្តារប្រទេសកម្ពុជាឡើងវិញតាមរយ:ការផ្តល់ជំនួយអភិវឌ្ឍន៍យ៉ាងច្រើនសន្ធឹកសន្ធាប់ និងការវិនិយោគផ្សេងៗ ។ ការផ្លាស់ប្តូរពាណិជ្ជកម្មវិញ ក៏មានការកើនឡើងជាប្រចាំផងដែរពីមួយឆ្នាំទៅមួយឆ្នាំ ។
ក្នុងនោះដែរ ការផ្លាស់ប្តូរពាណិជ្ជកម្មរវាងកម្ពុជា និងបារាំង ក៏មានការកើនឡើងជាលំដាប់រហូតដល់៤៦៥លានអឺរ៉ូ (ប្រហែល៥០០លានដុល្លារ) នៅឆ្នាំ២០១៤ ហើយនៅក្នុងឆមាសទី១ នៃឆ្នាំ២០១៥ ការនាំចេញពីកម្ពុជាទៅបារាំងបានកើនឡើងរហូតដល់៦០ភាគរយ (ស្មើនឹង៣២៧លានអឺរ៉ូ) រីឯការនាំចូលមកកម្ពុជាវិញកើនឡើងចំនួន៣២ភាគរយ (ស្មើនឹង៥១លានអឺរ៉ូ) បើធៀបនឹងរយ:ពេលដូចគ្នាកាលពីឆ្នាំមុន ។
ចំណែកឱនភាពសេដ្ឋកិច្ច ត្រូវបានលោកឯកអគ្គរដ្ឋទូតបារាំងពន្យល់ថា បណ្តាលមកពីការនាំចេញផលិតផលសម្លៀកបំពាក់ និងស្បែកជើងជាច្រើនសន្ធឹកសន្ធាប់ពីប្រទេសកម្ពុជាទៅកាន់ប្រទេសបារាំង ហើយប្រទេសបារាំងក៏ជាទីផ្សារដ៏ធំជាងគេនៅអឺរ៉ុបសម្រាប់អង្ករកម្ពុជាផងដែរ ដោយបាននាំចូលអង្ករចំនួន៧ម៉ឺនតោនក្នុងឆ្នាំ២០១៤ ។
លោក Jean-Claude POIMBOEUF ឯកអគ្គរដ្ឋទូតបារាំងប្រចាំកម្ពុជា បានមានប្រសាសន៍អ្នកយកព័ត៌មានផ្នែកសេដ្ឋកិច្ច(KB)របស់កោះសន្តិភាពថា ៖ «ពាណិជ្ជកម្មបានដើរតួនាទីយ៉ាងសំខាន់ក្នុងទំនាក់ទំនងទ្វេភាគីបារាំង-កម្ពុជា ព្រោះបានរួមចំណែកក្នុងការរីកចម្រើនសេដ្ឋកិច្ចរបស់ប្រទេសទាំងពីរ» ។
លោកបញ្ជាក់ថា ៖ «មានសាខាក្រុមហ៊ុនបារាំងធំៗចំនួន៤០ កំពុងតែដំណើរការក្នុងប្រទេសកម្ពុជា ។ ក្រៅពីនេះ មានក្រុមហ៊ុនចំនួន១៤០ទៀតត្រូវបានបង្កើតឡើងដោយពាណិជ្ជករបារាំង-ខ្មែរ ហើយបានចុះបញ្ជីនៅសភាពាណិជ្ជកម្មបារាំង-កម្ពុជា នៅភ្នំពេញ» ។
យោងតាមលោកឯកអគ្គរដ្ឋទូត ក្រុមហ៊ុនបារាំងល្បីៗទាំងនោះបានវិនិយោគទុនច្រើនលើផ្នែកហេដ្ឋារចនាសម្ព័ន្ធ ដូចជា ព្រលានយន្តហោះ (ក្រុមហ៊ុន VINCI) វិស័យថាមពល ដូចជា ក្រុមហ៊ុនប្រេងឥន្ធនៈ TOTAL ដែលមានស្ថានីយប្រេងឥន្ធនៈសរុបជាង៥០កន្លែងក្នុងប្រទេស ហើយកំពុងបើកជាបន្តបន្ទាប់ជារៀងរាល់ឆ្នាំ ។ ក្រុមហ៊ុនដទៃទៀតក៏កំពុងវិនិយោគលើផ្នែកឱសថ ក្នុងនោះមានក្រុមហ៊ុន Sanofi និង Servier ជាដើម ។ វិស័យទេសចរណ៍ សណ្ឋាគារ និងភោជនីយដ្ឋាន ក៏អាចទាក់ទាញការបណ្តាក់ទុនរបស់ក្រុមហ៊ុនបារាំងផងដែរ មានជាអាទិ សណ្ឋាគារ Sofitel នៅរាជធានីភ្នំពេញ និងខេត្តសៀមរាប ។ ក្រៅពីផ្នែកហេដ្ឋារចនាសម្ព័ន្ធ និងទេសចរណ៍ ប្រទេសបារាំងក៏ចាប់អារម្មណ៍លើការវិនិយោគក្នុងវិស័យព័ត៌មានវិទ្យា បច្ចេកវិទ្យាកុំព្យូទ័រ និងការបណ្តុះបណ្តាលធនធានមនុស្សផងដែរ ។
លោក សូរស្មី កែប៊ិន ប្រធានក្រុមហ៊ុន Confluences មានប្រសាសន៍ថា ៖ «នៅពេលដំបូង វាមិនមែនជាការងាយស្រួលទេ ដែលកម្ពុជាដាក់គោលដៅលក់អាជីវកម្មមួយរបស់ខ្លួន ប៉ុន្តែវាមានភាពប្រសើរជាងមុន ។ យើងកំពុងអភិវឌ្ឍន៍បណ្តាញយ៉ាងខ្លាំងនៃភាពជាដៃគូជាមួយភ្នាក់ងារអាជីវកម្មស្ថាប័ន ឬឯកជននៅប្រទេសបារាំង និងអឺរ៉ុបដែលសំដៅដល់អតិថិជនរបស់ខ្លួនទាំងអស់ដែលមានផលប្រយោជន៍សម្រាប់ប្រទេសកម្ពុជា» ។
ក្រុមហ៊ុន Confluences ជាទីភ្នាក់ងារប្រឹក្សាយោបល់មួយបង្កើតឡើងដោយសហគ្រិនសម្រាប់សហគ្រិន ក្នុងការដឹកនាំអ្នកវិនិយោគថ្មីដើម្បីមកធ្វើអាជីវកម្មនៅកម្ពុជា ។
លោក សូរស្មី កែប៊ិន បញ្ជាក់ថា ៖ «សម្រាប់រយៈពេល១២ខែនៃដំណើរការរបស់ក្រុមហ៊ុន យើងធ្លាប់បានទាក់ទងចំនួន៣៥ក្រុមហ៊ុនកន្លងមក រួមនឹងគម្រោងភាគច្រើនជាក្រុមហ៊ុនបារាំង ហើយយើងកំពុងធ្វើការជាមួយក្រុមហ៊ុនចំនួន២៥ ក្នុងពេលបច្ចុប្បន្ននេះ» ។
ការវិនិយោគទុនរបស់ប្រទេសបារាំងមកកាន់ប្រទេសកម្ពុជាមានការកើនឡើង និងដំណើរការល្អ ដោយធ្វើឲ្យការប្រើប្រាស់ភាសាបារាំងក្នុងមុខរបរអាជីវកម្ម និងការងារ ក៏មានការកើនឡើង និងត្រូវប្រើប្រាស់ជាចាំបាច់ផងដែរ ។
លោក Franck Touch អ្នកជំនួញខ្មែរ-បារាំងម្នាក់ ដែលកំពុងគ្រប់គ្រងបុគ្គលិកប្រមាណជា១០០នាក់ក្នុងក្រុមហ៊ុនចំនួន៤ រួមមាន KhmerDev, K-Digidata, Vecteur IT និង O3D Asia ដែលបណ្តុះបណ្តាលលើជំនាញក្រាហ្វីកនៅកម្ពុជា ឲ្យដឹងថា ៖ «ក្នុងក្រុមហ៊ុនទាំងបួននេះមានបុគ្គលិកចំនួន១៦នាក់អាចនិយាយភាសាបារាំងបាន ។ បុគ្គលិកដែលនិយាយភាសាបារាំងបាន តែងមានប្រៀបជាងអ្នកដែលមិនចេះភាសាបារាំង ដោយសារតែអតិថិជនភាគច្រើនជាជនជាតិបារាំង ។ វាជាការចាំបាច់សម្រាប់បុគ្គលិកក្នុងតួនាទីគ្រប់គ្រងអាចនិយាយភាសាបារាំងបាន ដូច្នេះពួកគេអាចប្រាស្រ័យទាក់ទងគ្នាបានយ៉ាងងាយស្រួលជាមួយនឹងអតិថិជន» ។
លោកបន្ថែមថា ៖ «ដោយសារភាសាបារាំងជាភាសាមួយលំបាករៀន តែងតែជាបន្ទុកបន្ថែមសម្រាប់បុគ្គលិកដែលអាចនិយាយភាសាបារាំងបានក្នុងក្រុមហ៊ុន ។ ជាមួយគ្នានេះដែរ វាបង្ហាញពីសក្តានុពលនៅនៃបុគ្គលិកម្នាក់នោះថា គាត់អាចដោះស្រាយបញ្ហាជាមួយអតិថិជនដែលមកពីប្រទេសផ្សេងគ្នាបាន» ។
ទោះបីជាប្រទេសបារាំងមានទំនាក់ទំនងល្អជាមួយប្រទេសកម្ពុជាលើវិស័យជំនួញយ៉ាងណាក្តី ក៏ការធ្វើអាជីវកម្មនៅមានពេញបរិបូរណ៍ក្នុងការនាំចេញ និងការនាំចូលនៅឡើយ ។
លោកឯកអគ្គរដ្ឋទូតបារាំងបានបង្ហាញនូវការនាំចូលផលិតផលពីប្រទេសបារាំងមកប្រទេសកម្ពុជាថា ៖ «នៅមានភាពតិចតួចស្តួចស្តើង ដោយសារផលិតផលសំខាន់មានប្រមាណត្រឹមតែ១ភាគ៣នៃផលិតផលសសរុបប៉ុណ្ណោះ ។
លោក Jean-Claude POIMBOEUF បញ្ជាក់បន្ថែមថា ៖ «បើយើងធ្វើការប្រៀបធៀបវិញឃើញថា ការនាំចេញពីបារាំងមកកាន់កម្ពុជានៅមានកម្រិតទាបនៅឡើយ ។ ផលិតផលនាំចេញភាគច្រើនជាឱសថ ស្មើនឹងជាង១ភាគ៣នៃទំហំផលិតផលនាំចេញមកម្ពុជាទាំងអស់ ។ ក្រៅពីនោះ ជាផលិតផលចំណីអាហារមានប្រមាណ១ភាគ៣ និងគ្រឿងបរិក្ខារផ្សេងៗ» ។
លោកបានសន្យាផងដែរក្នុងការផ្សព្វផ្សាយទីផ្សារកម្ពុជាទៅកាន់ក្រុមហ៊ុនបារាំងនានា ជាពិសេសតាមរយ:ការិយាល័យពាណិជ្ជកម្មរបស់ស្ថានទូត ដើម្បីបង្កើនការវិនិយោគរបស់បារាំងនៅកម្ពុជា ។ លោកក៏បានសម្តែងនូវសុទិដ្ឋិនិយមយ៉ាងខ្លាំងចំពោះការរីកចម្រើននៃការផ្លាស់ប្តូរពាណិជ្ជកម្មទ្វេភាគីនាពេលអនាគត ដោយសារប្រទេសកម្ពុជាមានភាពទាក់ទាញ និងទទួលបានកំណើនសេដ្ឋកិច្ចខ្ពស់ក្នុងរង្វង់ជាមធ្យម៧ភាគរយក្នុងមួយឆ្នាំ អស់រយ:ពេលជាច្រើនឆ្នាំមកហើយ ៕
ចែករំលែកព័តមាននេះ