រាជធានីភ្នំពេញ ៖ បុរស៤នាក់ត្រូវបានសមត្ថកិច្ចឃាត់ខ្លួនក្រោយពីបាននាំគ្នាសម្ងំជក់គ្រឿងញៀននៅក្នុងបន្ទប់ជួលមួយកន្លែង បង្កការភ្ញាក់ផ្អើលកាលពីវេលាម៉ោង៣ទៀបភ្លឺថ្ងៃទី៧ តុលា ២០១៥ ស្ថិតក្នុងភូមិត្រពាំងក្រសាំង សង្កាត់ត្រពាំងក្រសាំង ខណ្ឌពោធិ៍សែនជ័យ ។
ជនសង្ស័យទាំង៤នាក់ខាងលើនេះ មាន ១-ឈ្មោះ ទិត្យ ថន អាយុ២៣ឆ្នាំ ជាកម្មករសំណង់ ស្នាក់នៅផ្ទះជួលភូមិត្រពាំងក្រសាំង សង្កាត់ត្រពាំងក្រសាំង ខណ្ឌពោធិ៍សែនជ័យ និងមានស្រុកកំណើតនៅក្នុងភូមិព្រៃក្តួច ឃុំត្រពាំងក្រញួង ស្រុកត្រាំកក់ ខេត្តតាកែវ ២-ឈ្មោះ ដា សុភ័ក្ត្រ អាយុ២៥ឆ្នាំ ជាកម្មករសំណង់ ស្នាក់នៅផ្ទះជួលភូមិត្រពាំងក្រសាំង សង្កាត់ត្រពាំងក្រសាំង ខណ្ឌពោធិ៍សែនជ័យ និងមានស្រុកកំណើតភូមិសុទិច ឃុំដងដាង ស្រុកស្ទឹងត្រង់ ខេត្តកំពង់ចាម ៣-ឈ្មោះ សុខ រស់ អាយុ២១ឆ្នាំ ជាអ្នកលក់មាន់ ស្នាក់នៅផ្ទះជួលភូមិត្រពាំងក្រសាំង សង្កាត់ត្រពាំងក្រសាំង ខណ្ឌពោធិ៍សែនជ័យ និងមានស្រុកកំណើតនៅក្នុងភូមិពាមព្រធ្នាស់ ឃុំមហាលាភ ស្រុកកោះសុទិន ខេត្តកំពង់ចាម និង៤-ឈ្មោះ យួង សំអូន អាយុ២១ឆ្នាំ ជាជាងដែក ស្នាក់នៅផ្ទះជួលក្នុងសង្កាត់ភ្នំពេញថ្មី ខណ្ឌសែនសុខ និងមានស្រុកកំណើតនៅក្នុងភូមិពាមព្រធ្នាស់ ឃុំមហាលាភ ស្រុកកោះសុទិន ខេត្តកំពង់ចាម ។ ចំណែកវត្ថុតាងដែលដកហូតបាន មាន ថ្នាំញៀន២កញ្ចប់តូច ឧបករណ៍ប្រើប្រាស់គ្រឿងញៀន ទូរស័ព្ទ ដែកកេះ និងប្រាក់ខ្មែរមួយចំនួន ។
បុរសសង្ស័យទាំង៤នាក់ រួមនឹងវត្ថុតាង ត្រូវបានសមត្ថកិច្ចកសាងសុំណុំរឿងបញ្ជួនទៅសាលាដំបូង ដើម្បីចាត់ការទៅតាមផ្លូវច្បាប់ ៕
ចែករំលែកព័តមាននេះ