រាជធានីភ្នំពេញ ៖ កំណើនវិស័យកសិកម្មធ្លាក់ចុះ ខណៈពេលដែលយន្តការក្នុងការបង្កើនទិន្នផលស្រូវនៅយឺត ព្រមទាំងតម្លៃកសិផលធ្លាក់ចុះ។ តាមរបាយការណ៍របស់ធនាគារពិភពលោកដែលចេញផ្សាយនៅថ្ងៃទី៥ តុលា ឆ្នាំ២០១៥ បានបង្កាញថា កំណើនវិស័យកសិកម្មមានការធ្លាក់ចុះពី៤,៣ភាគរយក្នុង២០១២ មកត្រឹម០,៣ភាគរយក្នុងឆ្នាំ២០១៤ ហើយរំពឹងថាកំណើននេះនឹងត្រឡប់មកវិញត្រឹម១ភាគរយក្នុងឆ្នាំ២០១៥ ។
ខណៈពេលវិស័យកសិកម្មមានកំណើន៤,៣ភាគរយ សេដ្ឋកិច្ចមានកំណើន៧,៣ភាគរយក្នុងឆ្នាំ២០១២ ហើយនៅពេលកំណើនកសិកម្មធ្លាក់ចុះមកត្រឹម០,៣ភាគរយ កំណើនសេដ្ឋកិច្ចធ្លាក់ចុះត្រឹម៧,១ភាគរយក្នុង២០១៤ ។
របាយការណ៍បញ្ជាក់ថា « ទិន្នផលកសិកម្មនៅប្រទេសកម្ពុជាដែលចុះទាបជាងមុន កំពុងតែធ្វើឲ្យប៉ះពាល់ដល់សេដ្ឋកិច្ចរបស់ខ្លួន ទោះបីជាកំណើននេះនៅរក្សាបានក្នុងកម្រិត៦,៩ភាគរយដដែលក៏ដោយក្នុងឆ្នាំ២០១៥ » ។
លោក លី សូដេត អ្នកសេដ្ឋកិច្ចរបស់ធនាគារពិភពលោកប្រចាំកម្ពុជាមានប្រសាសន៍ថា ក្នុងវិស័យកសិកម្មមានការថមថយ ដោយសារកម្ពុជានៅតែពឹងផ្អែកលើទឹកភ្លៀវច្រើន ហើយនៅពេលដែលភ្លៀងមិនទៀងទាត់ វាធ្វើឲ្យផលិតផលកសិកម្ម ពិសេសគឺស្រូវ មានទិន្នផលធ្លាក់ចុះ និងការដាំដុះមានការលំបាក ។
ក្នុងឆ្នាំ២០១៥នេះ ការប្រមូលផលត្រូវបានពន្យារពេល ដោយសារការធ្លាក់ទឹកភ្លៀងយឺតយ៉ាវ ហើយទិន្នផលក្នុងរដូវវស្សាបានធ្លាក់ចុះ៣,៨ភាគរយ ដល់២,៨១តោនក្នុងមួយហិកតា ដែលធ្វើឲ្យផលិតភាពធ្លាក់ចុះពី៧,២៤លានតោន មកនៅត្រឹម៧,១៤លានតោនក្នុងឆ្នាំ២០១៤ ។
តាមរបាយការណ៍ប្រចាំឆ្នាំពីក្រសួងកសិកម្ម រុក្ខាប្រមាញ់ និងនេសាទ ទិន្នផលស្រូវកាលពីឆ្នាំមុនបានថយចុះ២,៦៧ភាគរយពី៣,១តោនក្នុងមួយហិកតាកាលពីឆ្នាំ២០១៣ មកនៅត្រឹម ៣,០៧តោនក្នុងមួយហិកតាដែលធ្វើការប្រមូលផលស្រូវសរុបបាន៩,៣២លានតោនថយចុះ ០,៧ភាគរយ ធៀបនឹង៩៣៨លានតោនកាលពីឆ្នាំ២០១៣ ។
លោក លី សូដេត បានមានប្រសាសន៍ថា ៖ « កសិកម្មមានការគិតគូរច្រើន ទោះបីយ៉ាងណាកម្ពុជានៅតែមានបញ្ហាគ្រាប់ពូជជាដើម ដែលមិនទាន់មានគ្រាប់ពូជល្អ ផ្តល់ឲ្យកសិករដាំដុះឲ្យបានទិន្នផលខ្ពស់នៅឡើយ » ។
រឿងធារាសាស្ត្រ យើងមិនទាន់បានជាទូលំទូលាយ ព្រោះកសិកម្មនៅតែពឹងពាក់លើភ្លៀងច្រើន ទោះបីជាមានការភ្ជួររាស់ដោយម៉ាស៊ីនច្រើន មិនប្រើសត្វដូចមុនក៏ដោយ ប៉ុន្តែរឿងទឹក យើងមិនទាន់មានម្ចាស់ការនៅឡើយ » ។
លោក Raza Mahmood Farrukh អ្នកឯកទេសខាងធនធានទឹកនៃនាយកដ្ឋានតំបន់អាស៊ីអាគ្នេយ៍នៃធនាគារអភិវឌ្ឍន៍អាស៊ីបានលើកឡើងកាលពីពេលថ្មីៗនេះថា ផលិតភាពកសិកម្មទាបគឺជាបញ្ហាធ្ងន់ធ្ងរមួយសម្រាប់កសិករខ្មែរ ដែលពឹងលើប្រព័ន្ធធារាសាស្ត្រ និងមិនសូវទទួលបានការថែទាំសម្រាប់បង្កបង្កើនផលស្រូវរបស់ខ្លួន ។
លោក នេត្រ ភក្ដ្រា អ្នកនាំពាក្យនៃក្រសួងធនធានទឹក និងឧតុនិយម បានឲ្យដឹងថា ផ្ទៃដីនៅប្រទេសកម្ពុជាមាន២,៤លានហិកតាផ្ទៃដីបង្កបង្កើនផល ប្រព័ន្ធធារាសាស្ត្រគ្របដណ្តប់ប្រមាណ៥២ភាគរយ។ ក្រសួងបាននិងកំពុងតែបន្តក្នុងការដោះស្រាយទឹកសម្រាប់ការបង្កបង្កើតផលដល់ប្រជាកសិករ ជាក់ស្តែងក្រសួងបានធ្វើទាន់អាងទឹកមួយនៅចង្កេះភ្នំឱរ៉ាល់ ស្រុកឱរ៉ាល់ដែលអាចស្តុកទឹក៦០លានម៉ែត្រគូប និងបន្តយកទឹកពីកំពង់ស្ពឺជួយខេត្តតាកែវ នៅទន្លេបាទី ព្រមទាំងបង្កើតត្រពាំងធំៗដូចជាខាងព្រៃវែង និងស្វាយរៀង ដែលមិនដែលមានត្រពាំងធំៗពីមុន ។
ដោយឡែក បើយោងតាមរបាយការណ៍ពីក្រសួងកសិកម្ម រុក្ខាប្រមាញ់ និងនេសាទ ចេញផ្សាយកាលពីចុងខែកញ្ញាបានបង្ហាញថា ស្ថានភាពប៉ះពាល់ និងខូចខាតដោយគ្រោះធម្មជាតិ មានគ្រោះខ្វះទឹកប៉ះពាល់លើផ្ទៃដីសរុប ចំនួនជាង២៣,៤ម៉ឺនហិកតា ក្នុងនោះមានសំណាបសរុបចំនួនជាង២ពាន់ហិកតា និងសន្ទូងពង្រោះសរុបចំនួនជាង២៣,២ម៉ឺុនហិកតា ៕
ចែករំលែកព័តមាននេះ