ខេត្តកោះកុង ៖ ចាប់ពីម៉ោង៩និង៣០នាទីព្រឹកថ្ងៃទី២ កញ្ញា សមត្ថកិច្ចនគរបាល និងកងរាជអាវុធហត្ថខេត្ត បានចាត់វិធានការបំបែកក្រុមប្រជាពលរដ្ឋដែលមកតវ៉ាអស់រយៈពេលជាងកន្លះខែ ចាប់តាំងពីថ្ងៃទី១៩ សីហា រហូតមកដល់ពេលនេះ នៅសាលាដំបូងខេត្ត ដើម្បីសុំឱ្យដោះលែងសកម្មជនរបស់អង្គការមាតាធម្មជាតិចំនួន៣នាក់ ។
ការបំបែកក្រុមអ្នកតវ៉ាខាងលើនេះ ក្រោមការដឹកនាំរបស់លោក ប៊ូ ប៊ុនហាង ព្រះរាជអាជ្ញាអមសាលាដំបូងខេត្ត និងមានការចូលរួមពី លោក ផុន លីវីរៈ អភិបាលរងខេត្ត លោក គង់ មាន ស្នងការនគរបាលស្តីទីខេត្តផងដែរ ។
មុនឈានទៅបំបែកក្រុមអ្នកតវ៉ានេះ សមត្ថកិច្ចបានឃាត់ខ្លួនបុគ្គលិករបស់អង្គការសង្គមស៊ីវិលចំនួន១៧នាក់ជាមុនសិន បន្ទាប់មកទើបសមត្ថកិច្ចចាប់ផ្តើមបំបែកក្រុមអ្នកតវ៉ាប្រមាណជា៥០នាក់ទៀត ។
ចំណែកអ្នកទាំង១៧នាក់ដែលសមត្ថកិច្ចចាប់ឃាត់ខ្លួនខាងលើនេះ ត្រូវបានបញ្ជូនទៅការិយាល័យព្រហ្មទណ្ឌខេត្តដើម្បីសាកសួរ និងមិនទាន់អនុញ្ញាតឱ្យចេញមកវិញនៅឡើយទេ នៅរសៀលថ្ងៃដដែលនេះ ៕
ចែករំលែកព័តមាននេះ