ក្រោយពីមានព័ត៌មានរសើបលេចលឺថា តារាសម្តែងពូកែវោហារ ប៉ែន ចំរ៉ុង លួចលាក់ស្នេហាក្រៅឆាកជាមួយកូនស្រីម្ចាស់ផលិតកម្មមហាហង្សកញ្ញា ភិន សុដាលីស នៅពេលថ្មីៗនេះ លោកអ៊ិន សុភិន ចាងហ្វាងផលិតកម្មមហាហង្ស បានធ្វើសន្និសីទកាសែតកាលពីព្រឹកថ្ងៃព្រហស្បតិ៍ ទី២៧ សីហា ២០១៥ នៅទីស្នាក់ការក្រុមហ៊ុនមហាហង្ស ស្ថិតក្នុងសង្កាត់បឹងកក់២ ខណ្ឌទួលគោក រាជធានីភ្នំពេញ ប្រកាសសង្គ្រាមជាមួយតារាសម្តែងប៉ែន ចំរ៉ុង ដោយបើកចំហ និងផ្ទាល់ដៃលោកតែម្តង ។
ថ្លែងក្នុងសន្និសីទកាសែតលោកអ៊ិន សុភិន បានប្រាប់ថា មូលហេតុដែលធ្វើឱ្យលោកសម្រេចចិត្តប្រកាសសង្គ្រាមនេះ ដោយសារលោកចំរ៉ុង មិនដែលឱ្យតម្លៃលោក និងក្រុមគ្រួសារលោកទាំងរឿងការងារ និងរឿងផ្ទាល់ខ្លួន ។ លោកបានរៀបរាប់ដំណើរដើមទងថា «គាត់ (ចំរ៉ុង) ជាអ្នកបង្កើតរឿងមុន យើងមិនមែនស្អប់គាត់ទេ ពីមុនខ្ញុំធ្លាប់ប្រាប់កូនខ្ញុំថា ខ្ញុំចូលចិត្តចំរ៉ុងដែរដំបូង ប៉ុន្តែសង្កេតឃើញចរិករបស់គាត់យូរទៅ គឺគាត់មិនមានអ្វីឱ្យយើងចូលចិត្តទៀត ដោយសារគាត់ទាញផលប្រយោជន៍ពីយើងច្រើនជ្រុលពេក ហើយយើងអត់មានបានប្រយោជន៍ពីគាត់សោះ ។ សូម្បីតែការថត ក៏យើងឱ្យតម្លៃ តែគាត់ក្រឡាស់ពាក្យសម្តីសព្វគ្រប់បែបយ៉ាង ពេលវេលាម្តងបានម្តងអត់ ដូចគាត់ណាត់ថាអាទិត្យនឹងគាត់ឱ្យយើងពីរថ្ងៃ ឬមួយថ្ងៃ ជិតដល់ថ្ងៃថត គាត់ថា គាត់រវល់ សុំទោសគាត់ភ្លេច តាមពិតគាត់ជាប់ការងារគេ, អញ្ចឹងយើងត្រូវរំសាយការងារចោល ដូចគាត់មិនឱ្យតម្លៃ ។ ខុសពីមនុស្សប្រុសដទៃ បើគេស្រឡាញ់មនុស្សស្រីស្មោះ គេតស៊ូ គេយកចិត្តទុកដាក់នឹងក្រុមគ្រួសារខាងស្រីណាស់ គេលះបង់គ្រប់យ៉ាង មិនបានលះបង់លុយកាក់ ក៏លះបង់ពេលវេលា លះបង់កម្លាំង លះបង់អ្វីមួយដែលថា មើលទៅឱ្យឃើញថា យើងស្រឡាញ់កូនគេ ប៉ុន្តែមើលទៅមិនឃើញលះបង់អ្វីទាំងអស់ មានតែឃើញទាញយកផលប្រយោជន៍ពីយើងយកទៅ» ។
លោកអ៊ិន សុភិន ក៏បានប្រកាសផងដែរថា គ្រប់ស្ថានីយទូរទស្សន៍មានចំរ៉ុងឡាយបន្តផ្ទាល់នៅកន្លែងណា នឹងមានរូបលោកនៅទីនោះ លោកនឹងធ្វើឱ្យចំរ៉ុងបាក់ក្រាបដល់ដីវិញ ដូចដែលចំរ៉ុងធ្វើឱ្យលោកអាម៉ាសដូចគ្នា ដោយធ្វើដោយដៃរបស់លោកផ្ទាល់តែម្តង។ ឆ្លើយតបនឹងសំនួររបស់អ្នកសារព័ត៌មានថា តើមានដំណោះស្រាយអ្វីចំពោះបញ្ហានេះ ចាងហ្វាងរូបនេះបន្តទៀតថា «រឿងនឹងអាចចប់បាន ពេលដែលគាត់ធ្វើអ្វីដែលគាត់និយាយជាមួយខ្ញុំពីមុនមក, បញ្ឈប់ពាក់ព័ន្ធជាមួយកូនខ្ញុំ និងក្រុមគ្រួសារខ្ញុំ ។ បើគាត់បញ្ចប់ ខ្ញុំនឹងបញ្ចប់ តែបើគាត់បន្ត គាត់នឹងមានបញ្ហាជាមួយខ្ញុំរហូត» ។
យ៉ាងណាមិញ យើងរង់ចាំភាគីលោកប៉ែន ចំរ៉ុង មកធ្វើការបកស្រាយចំពោះការលើកឡើងរបស់លោកអ៊ិន សុភិន ខាងលើនេះ។
ចែករំលែកព័តមាននេះ