ខេត្តកណ្តាល ៖ នៅព្រឹកថ្ងៃទី៤ សីហា ២០១៥ លោកម៉ក់ ពេជ្ជរិទ្ធ ប្រតិភូរាជរដ្ឋាភិបាលទទួលបន្ទុកអគ្គនាយក នៃអគ្គនាយកដ្ឋានកាំកុងត្រូល បានដឹកនាំមន្ត្រីក្រោមឱវាទ រួមនិងអាជ្ញាធរមូលដ្ឋាន ចុះពិនិត្យទំនិញ ម្ហូប ចំណីអាហារ គ្រឿងកំប៉ុង នៅក្នុងផ្សារគគីរ ស្ថិតក្នុងឃុំ គគីរ ស្រុកកៀនស្វាយ ខេត្តកណ្តាល ។
ក្នុងការចុះពិនិត្យទំនិញ ម្ហូប ចំណីអាហារ គ្រឿងកំប៉ុងនាពេលនោះ មន្ត្រីជំនាញក៏បានរកឃើញទំនិញ ម្ហូប ចំណីអាហារ គ្រឿងកំប៉ុងមួយចំនួនតូចដែលហួសសុពុលភាព និងមានសារធាតុគីមីផងដែរ ។
នាឱកាសនោះ លោក ម៉ក់ ពេជ្ជរិទ្ធ ក៏បានណែនាំពន្យល់ដល់បងប្អូនអាជីវករលក់ដូរពីរបៀបពិនិត្យពិសោធន៍លើចំណីអាហារ ដើម្បីយល់ដឹងថា ទំនិញ ម្ហូប ចំណីអាហារ គ្រឿងកំប៉ុងណាដែលមានជាតិគីមី ឬហួសសុពុលភាព ហើយបើហួសសុពុលភាព ឬមានសារធាតុគីមី សូមកុំយកមកដាក់តាំងលក់លើទីផ្សារទៀត នាំឱ្យប៉ះពាល់ដល់សុខភាពប្រជាពលរដ្ឋយើង ។ ចំពាះទំនិញ ម្ហូប ចំណីអាហារ គ្រឿងកំប៉ុង ដែលផុតកំណត់ ត្រូវបិតផ្ទាំងបាណូណែនាំគេបានដឹងផង ។
នៅថ្ងៃដដែលនោះដែរ លោក ម៉ក់ ពេជ្ជរិទ្ធ និងអាជ្ញាធរស្រុកក៏បានបន្តចុះទៅណែនាំដល់លោកគ្រូ អ្នកគ្រូ សិស្សានុសិស្សតាមសាលារៀនបឋមសិក្សាឃុំគគីរ និងឃុំដីឥដ្ឋ ដើម្បីឱ្យចេះពិសោធន៍លើចំណីអាហារដែលមានសារធាតុគីមី ឬហួសសុពុលភាព និងគ្មានអនាម័យល្អ កុំឱ្យទិញយកមកពិសារនាំឱ្យប៉ះពាល់ដល់សុខភាពសិស្សានុសិស្ស ៕
ចែករំលែកព័តមាននេះ