ខេត្តក្រចេះ ៖ មន្ត្រីកងរាជអាវុធហត្ថស្រុកស្នួលបានអះអាងថា ទាហានពីរនាក់ដែលបង្កជម្លោះឈានដល់ការផ្ទុះអាវុធនៅក្នុងហាងខារ៉ាអូខេ និងសណ្ឋាគារមួយកន្លែង នៅស្រុកស្នួល ត្រូវបានចាត់បញ្ជូនមកទីបញ្ជាការខេត្ត នៅរសៀលថ្ងៃទី៣១ កក្កដា នេះហើយ ក្រោយពីកើតមានជម្លោះ និងក៏ត្រូវបានឃាត់ខ្លួនរួចមក។
មន្ត្រីកងរាជអាវុធហត្ថស្រុកស្នួលបានឲ្យដឹងថា ហេតុការណ៍ផ្ទុះអាវុធបានកើតឡើងកាលពីវេលាយប់ថ្ងៃទី៣០ កក្កដា ខណៈដែលមានការឈ្លោះប្រកែកគ្នារវាងយោធា និងយោធាពីរនាក់នៅអង្គភាពផ្សេងគ្នា ហើយឈានដល់ការផ្ទុះអាវុធចំនួន២គ្រាប់បណ្តាលឲ្យមានការភ្ញាក់ផ្អើលក្នុងហាងខារ៉ាអូខេ និងសណ្ឋាគាធំមួយយីហោ ហេងលី។
បុរសជាយោធាទាំងពីរនាក់ក៏ត្រូវកម្លាំងអាវុធហត្ថស្រុកចុះឃាត់ខ្លួនភ្លាមៗ បន្ទាប់ពីបង្កហេតុរួច។ មន្ត្រីយោធាទាំងពីរនាក់ត្រូវបានគេស្គាល់ថា ម្នាក់ឈ្មោះ យី ចិន្តា ឋានៈអនុសេនីយ៍ឯក ជាយោធាបម្រើការងារនៅអង្គភាពបញ្ជាការដ្ឋានទ័ពរថក្រោះ ជាម្ចាស់កាំភ្លើងខ្លី និងបានបាញ់ចំនួនពីរគ្រាប់។ រីឯមន្ត្រីយោធាមួយរូបទៀតឈ្មោះបញ្ញា ឋានៈព្រិន្ទបាលឯក ជាយោធាបម្រើការងារនៅទីបញ្ជាការវរៈព្រំដែន២០៤ ឈរជើងនៅស្រុកស្នួល។
ដើមចមដែលបង្កឲ្យឈានដល់ជម្លោះ គឺត្រូវបានប្រភពព័ត៌មានរាយការណ៍ថា នៅយប់ថ្ងៃកើតហេតុ នៅពេលដែលបុរសយោធាឈ្មោះ យី ចិន្តា បានចូលទៅក្នុងសណ្ឋាគាររកបន្ទប់ដេកបានជួបជាមួយបុរសមេយោធាម្នាក់នៃទីបញ្ជារវរៈ២០៤ ហើយបានឈរជជែកគ្នាឆ្កាដៃជើង។
ភ្លាមៗនោះដែរ ខណៈពេលបុរសយោធាឈ្មោះ បញ្ញា ចេញពីហាងខារ៉ាអូខេនៅក្បែរនោះក្នុងសភាពស្រវឹងជោគ ឃើញយោធាឈ្មោះយី ចិន្តា កំពុងតែឆ្កាដៃជើង នឹកស្មានថា បុរសរូបនេះបំរុងរករឿងមេខ្លួនក៏លបទៅវាយលើបុរសរូបនេះពីក្រោយធ្វើឱ្យកើតជាជម្លោះក្តៅគគុកឈានឲ្យបុរសយោធាឈ្មោះ យី ចិន្តា ដកកាំភ្លើងពីចង្កេះបាញ់ភ្ញច់ដី២គ្រាប់ទើបរំសាយវិញ។
លោកអនុសេនីយ៍ឯក ម៉ៅ សុផុន មេបញ្ជាការងកងរាជអាវុធហត្ថស្រុកស្នួលបានឲ្យដឹងថា កាំភ្លើងដែលយោធារូបនេះបាញ់ គឺមានលិខិតស្នាមប្រើប្រាស់ត្រឹមត្រូវ៕
ចែករំលែកព័តមាននេះ