ខេត្តកំពង់ឆ្នាំង ៖ នៅចុងខែកក្កដា ២០១៥នេះ ជម្ងឺគ្រុនឈាមបានកើតឡើងលើកុមារ និងយុវជន តាមតំបន់មួយចំនួនក្នុងខេត្តកំពង់ឆ្នាំង ដែលធ្វើឱ្យប្រជាពលរដ្ឋនៅក្នុងភូមិឃុំឆ្ងាយៗមានការព្រួយបារម្ភជាខ្លាំង ចំពោះកូនចៅរបស់ខ្លួន។
លោក ប៊ុន អេងគ្រុយ អនុប្រធានកម្មវិធីគ្រុនចាញ់ និងគ្រុនឈាមនៃមន្ទីរសុខាភិបាលខេត្តកំពង់ឆ្នាំងបានឱ្យដឹងថា បើគិតរយៈពេលដូចគ្នានៅចុងខែកក្កដានេះ កុមារ និងយុវជនកើតជំងឺគ្រុនឈាមទាំងសំរាកនៅមន្ទីរពេទ្យខេត្តកំពង់ឆ្នាំង ឆ្នាំ២០១៤ មានតែចំនួន២៤ករណីប៉ុណ្ណោះ តែឆ្នាំ២០១៥នេះមានចំនួន១៣០ករណី ដែលបានកើតឡើងរាយប៉ាយគ្រប់ស្រុក ក្រុង ក្នុងខេត្ត ហើយស្រុកដែលច្រើនជាងគេ គឺស្រុកសាមគ្គីមានជ័យ និងស្រុករលាប្អៀរ ប៉ុន្តែមកដល់ពេលនេះមិនទាន់មានអ្នកណាម្នាក់ស្លាប់នោះទេ។
លោកបានបន្តថា ទិសដៅរបស់មន្ទីរសុខាភិបាលខេត្តកំពង់ឆ្នាំងត្រូវចុះអន្តរាគមន៍នៅគ្រប់តំបន់ដែលមានជំងឺគ្រុនឈាមកើតឡើង ដោយជំរុញការចែកថ្នាំបាណកឃាដទៅតាម ភូមិ ឃុំ សង្កាត់ ក្រុង ស្រុកដែលមានដង់ស៊ីតេប្រជាជនខ្ពស់ និងតំបន់មានកើតករណីគ្រុនឈាមច្រើនជាងគេ។
បន្តអង្កេតតាមដាន និងស្រាវជ្រាវផ្ទាល់ក្នុងសហគមន៍ដើម្បីស្វែងយល់ពីដំណើរវិវត្តន៍នៃជំងឺគ្រុនឈាមនេះនិងចុះអប់រំ ផ្សព្វផ្សាយអំពិវិធានការការពារជំងឺគ្រុនឈាម និងចែកខិតប័ណ្ណសារអប់រំដល់ប្រជាពលរដ្ឋ និងតាមទីប្រជុំជននានាទូទាំងខេត្ត៕
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ