ខេត្តសៀមរាប ៖ ស្រី្តខ្មែរ២នាក់ មានស្រុកកំណើតនៅខេត្តព្រៃវែង ដែលត្រូវបានមេខ្យល់នាំយកទៅរៀបការជាមួយបុរសជនជាតិចិននៅខេត្តក្វាងចូវ ប្រទេសចិន ត្រូវបានបញ្ជូនត្រឡប់មកដល់អាកាសយានដ្ឋានអន្តរជាតិសៀមរាបកាលពីវេលាម៉ោង២ និង៥០នាទីរសៀល ថ្ងៃទី២៨ ខែកក្កដា ឆ្នាំ២០១៥ ។
ស្ត្រីរងគ្រោះទាំង២នាក់ត្រូវបានសមត្ថកិច្ចនគរបាលការិយាល័យប្រឆាំងការជួញដូរមនុស្ស និងការពារអនីតិជន នៃស្នងការដ្ឋាននគរបាលខេត្តសៀមរាប ទៅទទួលយកចេញពីក្នុងព្រលានយន្តហោះអន្តរជាតិសៀមរាប រួចនាំមកកាន់ការិយាល័យដើម្បីសាកសួរ និងបញ្ជូនទៅមន្ទីរសង្គមកិច្ច អតីតយុទ្ធជន និងយុវនីតសម្បទាខេត្តដើម្បីបញ្ជូនបន្តឱ្យគ្រួសារជនរងគ្រោះមកទទួលយកទៅជួបជុំក្រុមគ្រួសារវិញ ។
សមត្ថកិច្ចបានឱ្យដឹងថា ស្ត្រីរងគ្រោះដែលបានវិលត្រឡប់មកកាន់មាតុប្រទេសវិញទាំង២នាក់មានឈ្មោះ វង្ស ស្រីតូច អាយុ២០ឆ្នាំ ជាអតីតកម្មកររោងចក្រនៅភ្នំពេញ មានស្រុកកំណើតនៅខេត្តព្រៃវែង និងម្នាក់ទៀតឈ្មោះ ស្រុន ម៉ុម អាយុ២១ឆ្នាំ ជាអតីតកម្មកររោងចក្រនៅភ្នំពេញ មានស្រុកកំណើតភូមិសំបួរ ឃុំកំពង់ប្រាំង ស្រុកពារាំង ខេត្តព្រៃវែង ។
សូមបញ្ជាក់ផងដែរថា សមត្ថកិច្ចនគរបាលប្រឆាំងការជួញដូរមនុស្ស និងការពារអនីតិជន នៃស្នងការដ្ឋាននគរបាលខេត្តបានទំនាក់ទំនងទៅមន្ទីរសង្គមកិច្ច អតីតយុទ្ធជន និងយុវនីតិសម្បទាខេត្តដើម្បីបញ្ជូនស្ត្រីរងគ្រោះទាំង២នាក់ទៅ តែនៅរសៀលថ្ងៃទី២៨ កក្កដានេះទូរស័ព្ទរបស់លោកនៅក្រៅតំបន់សេវារហូត ទើបសមត្ថកិច្ចនគរបាលប្រឆាំងការជួញដូរមនុស្ស និងការពារអនីតិជន បានទំនាក់ទំនងតាមទូរស័ព្ទទៅអង្គការអាស់ហ្វីស៊ីប(AFESIP) នៅរសៀលថ្ងៃដដែរដើម្បីផ្ញើស្ត្រីរងគ្រោះទាំង២នាក់១យប់ រហូតស្អែកឡើងព្រឹកថ្ងៃទី២៩ កក្កដា ទើបបញ្ជូនឲ្យទៅជួបជាមួយក្រុមគ្រួសារវិញ ៕
ចែករំលែកព័តមាននេះ