ខេត្តមណ្ឌលគិរី ៖ ប្រជាកសិករនៅឃុំពូជ្រៃ ស្រុកពេជ្រាដា ដែលប្រកបរបរដាំដំណាំសណ្ដែកបាយកំពុងសប្បាយរីករាយនឹងការប្រមូលផលសណ្ដែករបស់ខ្លួន ខណៈតម្លៃនៅលើទីផ្សារឆ្នាំនេះហាក់ដូចជាបានថ្លៃជាងឆ្នាំមុន។ ដំណាំសណ្ដែកបាយនៅឆ្នាំនេះ ត្រូវបានអ្នកបង្កបង្កើនផលនិយាយថា ទទួលបានផលខ្ពស់ជាងរាល់ឆ្នាំ រីឯតម្លៃក៏បានសមរម្យផងដែរ ។
លោក ជីម សុះ កសិករចំណាក់ស្រុកមកពីខេត្តកំពង់ធំ ដែលដាំដំណាំសណ្ដែកបាយនៅភូមិពូតាន់ ឃុំពូជ្រៃ ស្រុកពេជ្រាដា បានរៀបរាប់ថា គាត់និងក្រុមគ្រួសារបានមកជួលដីគេដាំសណ្ដែកបាយនៅទីនេះអស់រយៈពេល២ទៅ៣ឆ្នាំហើយ ដោយជួលដីទំហំ៩ហិកតា ក្នុង១ហិកតា តម្លៃ២០០ដុល្លារសម្រាប់រយៈពេល១ឆ្នាំ ។ ការធ្វើចំណាក់ស្រុកមកប្រកបរបរកសិកម្មនៅទីនេះបានធ្វើឲ្យជីវភាពក្រុមគ្រួសាររបស់គាត់ល្អប្រសើរបន្តិចផងដែរ ។ គាត់បន្ដថា ទិន្នផលសណ្តែកបាយឆ្នាំនេះ ក្នុង១ហិកតាទទួលបានពី១,៣តោនទៅ ១,៥តោន និងបានលក់ចេញនៅក្នុងខែកក្កដានេះ បានតម្លៃ៤.៥៥០រៀល ក្នុង១គីឡូក្រាម គឺថ្លៃជាងឆ្នាំមុនៗបន្ដិច ដែលមានតម្លៃត្រឹមតែជាង៣.០០០រៀលប៉ុណ្ណោះ ក្នុង១គីឡូក្រាម ។
លោក សុង ឃាង ប្រធានមន្ទីរកសិកម្មខេត្ត បានឲ្យដឹងថា សម្រាប់ការបង្កបង្កើនផលដំណាំសណ្ដែកបាយក្នុងឆ្នាំ២០១៥នេះ បើគិតតាមផែន ការដាំដុះគឺមានផ្ទៃដីប្រមាណ៣.៣៦១ហិកតា។ ចំណែកប្រធានមន្ទីរពាណិជ្ជកម្មខេត្តលោក សុខ សិរី ក៏បានឲ្យដឹងដែរថា ចំពោះតម្លៃសណ្ដែកបាយក្នុងឆ្នាំ២០១៥នេះ ឃើញថា បានថ្លៃជាងឆ្នាំមុនៗ ។ លោកថា តម្លៃសណ្ដែកបាយនៅខេត្តមណ្ឌលគិរីក្នុងឆ្នាំនេះ ជាមធ្យមគឺ៤.៥០០រៀល ក្នុង១គីឡូក្រាម ហើយតម្លៃនៅឆ្នាំនេះថ្លៃជាងឆ្នាំមុនៗគឺត្រឹមតែ៣.២០០រៀលប៉ុណ្ណោះ ៕
ចែករំលែកព័តមាននេះ