ខេត្តឧត្តរមានជ័យ ៖ សិស្សថ្នាក់ទី១២ នៃវិទ្យាល័យហ៊ុន សែនឧត្តរមានជ័យចំនួន១៦៦នាក់ក្នុងចំណោមសិស្ស២២៤នាក់បានចូលរៀនបំប៉នដោយឥតគឹតថ្លៃពីលោកគ្រូ-អ្នកគ្រូមានរយៈពេល៣ខែចាប់ពីចុងខែឧសភា ដើម្បីត្រៀមប្រឡងសញ្ញាបត្រមធ្យមសិក្សាទុតិយភូមិនាពេលខាងមុខនេះ ដែលការបង្រៀននេះពុំទាន់ទទួលបានការជួយឧបត្ថម្ភគាំទ្រពីស្ថាប័នណារនៅឡើយទេ ។
ទាក់ទិននឹងវគ្គបំប៉ននេះ លោកប្លុង កូយ នាយករងវិទ្យាល័យហ៊ុន សែន ឧត្តរមានជ័យ បានឲ្យដឹងថា សិស្សដែលមកដាក់ពាក្យសុំចូលរៀនវគ្គបំប៉នចំណេះដឹងដល់សិស្សថ្នាក់ទី១២នេះ ភាគច្រើនសុទ្ធសឹងជាសិស្សខ្សោយមុខវិជ្ជាសំខាន់ៗ ដែលគម្រោងសម្រាប់បំប៉ននេះមានមុខវិជ្ជាដូចជា ទី១-គណិតវិទ្យា ទី២-គីមីវិទ្យា ទី៣-រូបវិទ្យា ទី៤-ជីវវិទ្យា និងទី៥-ភាសារខ្មែរ ។
លោកនាយករងបានបន្តទៀតថា សម្រាប់មុខវិជ្ជាសំខាន់ទាំង៥នេះ គឺគណិតវិទ្យាត្រូវបង្រៀនមួយអាទិត្យ៤ម៉ោង រីឯគីមីវិទ្យា រូបវិទ្យា ជីវវិទ្យា និងភាសារខ្មែរ ក្នុងមួយអាទិត្យត្រូវបង្រៀន២ម៉ោងដូចៗគ្នា ។ លោកនាយករងបន្ថែមថា នៅក្នុងវិទ្យាល័យហ៊ុន សែនឧត្តរមានជ័យ មានសិស្សរៀនថ្នាក់ទី១២សរុប២២៤នាក់ ហើយសិស្សដែលស្ម័គ្រចិត្តចូលរៀនវគ្គបំប៉ននេះមានចំនួន១៦៦នាក់ ក្រៅពីនេះសុទ្ធសឹងជាសិស្សដែលរៀនពូកែគួរសមហើយ ។
ជាមួយនឹងការប្រឡងនាពេលខាងមុខនេះ លោកនាយករងសង្ឃឹមថាសិស្សអាចជាប់ច្រើន ព្រោះមានកម្មវិធីបង្រៀនវគ្គបំប៉ននេះ គឺតាំងពីកម្រិតទាបទៅខ្ពស់ ដែលសិស្សអាចបន្ថែមចំណេះដឹងច្រើនទៀតពីក្នុងម៉ោងសិក្សា ពិសេសជាងនេះទៅទៀតមុខវិជ្ជាដែលបង្រៀននៅក្នុងវគ្គបំប៉ននេះ គឺសុទ្ធតែជាមុខវិជ្ជាតម្រូវការរបស់សិស្សចង់បំពេញបន្ថែមសម្រាប់ការប្រឡងនាពេលខាងមុខ ដូច្នេះទើបលោកសង្ឃឹមថាសិស្សនឹងជាប់ច្រើនសម្រាប់កាប្រឡងឆ្នាំនេះ ។
លោកពៅ សាវឿត ប្រធានការិយាល័យមធ្យមសិក្សាចំណេះទូទៅ មន្ទីរអប់រុំយុវជន និងកីឡាខេត្តឧត្តរមានជ័យបានមានប្រសាសន៍ឲ្យ«កោះសន្តិភាព»ដឹងថា មន្ទីរអប់រំខេត្តមានគម្រោងបើកវគ្គបំប៉នសិស្សខ្សោយចំពោះមុខវិជ្ជាសំខាន់ៗ៥ ដែលមានរយៈពេល៣ខែ ចាប់ពីខែឧសភា ២០១៥ ដើម្បីត្រៀមប្រឡងបាក់ឌុបសម្រាប់ឆ្នាំនេះ ។ លោកបានបញ្ចាក់ថា ក្នុងការបំប៉នដល់សិស្សថ្នាក់ទី១២គឺពុំទាន់មានជួយឧបត្ថម្ភគាំទ្រពីស្ថាប័នណាមួយនៅឡើយទេ គឺលោកគ្រូ-អ្នកគ្រូមានទឹកចិត្តក្នុងការបំប៉នដល់សិស្សតែម្តង ។
តែទោះជាបែបណា លោកប្រធានការិល័យក៏បានសូមអំពាវនាវដល់ស្ថាប័នរដ្ឋនៅក្នុងខេត្ត និងនៅក្រៅខេត្ត មេត្តាជួយឧបត្ថម្ភគាំទ្រជួយជាថវិកាផងសម្រាប់លោកគ្រូ-អ្នកគ្រូដែលបានចំណាយពេលវេលាដ៏មានតម្លៃរបស់គាត់មកបង្ហាត់បង្រៀនសិស្សបំប៉នបន្ថែមនេះផង ៕
ចែករំលែកព័តមាននេះ