ខេត្តកំពង់ធំ ៖ បន្ទាប់ពីពពោះគំរប់៩ខែ និង១០ថ្ងៃ ស្រី្តជាម្ដាយឈ្មោះសំណាង គង្គា អាយុ២៩ឆ្នាំ ក៏បានឆ្លងទន្លេកើតបានកូនភ្លោះប្រុស៣នាក់ ដោយសុវត្ថិភាព កាលពីថ្ងៃទី០១ កក្ដដា ២០១៥ នៅក្នុងមន្ទីរពេទ្យគន្ធបុប្ផាសៀមរាប បន្ទាប់ពីបុរសជាប្ដីឈ្មោះ ឈឹម ខួច អាយុ៣១ឆ្នាំ បាននាំយកទៅសំរាករង់ចាំអស់រយៈពេល២-៣ថ្ងៃមកនោះ ។
លំនៅឋានតូចចង្អៀត ដែលមានកំពស់ជាងកន្លះម៉ែត្រផុតពីដី ស្ថិតក្នុងភូមិត្រាច ឃុំកំពង់ចិនជើង ស្រុកស្ទោង កាលពីថ្ងៃទី០៣ កក្ដដា ២០១៥ ប្រជាពលរដ្ឋដែលមានលំនៅឋានជិតគ្នាបានឭសំលេងទារកតូចៗបីនាក់បន្ថែមទៀត ខណៈដែលគ្រួសាររបស់បុរសឈ្មោះ ឈឹម ខួច និងភរិយាឈ្មោះសំណាង គង្គា មានកូនប្រុសក្នុងបន្ទុក២នាក់រួចមកហើយ ។
នៅចំពោះមុខលោក អ៊ុត សំអន អភិបាលខេត្ត និងលោកជំទាវ ព្រមទាំងក្រុមការងារសាខាកាកបាទក្រហមខេត្តកំពង់ធំ កាលពីថ្ងៃទី០៣ កក្កដា ស្ត្រីជាម្ដាយឈ្មោះ សំណាង គង្គា អាយុ២៩ឆ្នាំ បានរៀបរាប់ថា បន្ទាប់ពីរៀបអាពាហ៍ពិពាហ៍ជាមួយប្ដីរួចមក គាត់ក៏បានសង់លំនៅឋានតូចមួយ ព្រមទាំងបង្កើតបានកូនប្រុស២នាក់ ដោយប្ដីប្រកបមុខរបធ្វើស្រែចិញ្ចឹមជីវិតគ្រួសារ ។
ដោយចង់បានកូនស្រី គាត់ក៏ចាប់ផ្ដើមពពោះលើកទី៣ទៀត ក្នុងពេលកំពុងពពោះគាត់ធ្លាប់បានទៅមណ្ឌលសុខភាពពិនិត្យសុខភាពដែរ ហើយពេទ្យបានប្រាប់គាត់ថា កូនក្នុងផ្ទៃពោះគាត់ជាកូនភ្លោះ៣នាក់ និងបានណែនាំឲ្យគាត់ទៅសំរាលនៅមន្ទីរពេទ្យខេត្តសៀមរាប ។
សូមបញ្ជាក់ថា កូនភ្លោះប្រុសទាំងបី ១-ឈ្មោះ ខួច សំ, ២-ឈ្មោះខួច សុខ និង៣-ឈ្មោះ ខួច សាន ។ ដោយឡែកនៅចំពោះមុខនោះផងដែរ លោកអភិបាលខេត្ត និងក្រុមការងារក៏បានប្រគល់ជូននូវអំណោយ ជាសម្ភារៈ និងថវិកាមួយចំនួនដល់ស្ត្រីជាម្ដាយទើបសំរាលកូន ព្រមទាំងទារកទាំង៣ផងដែរ ៕
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ