រាជធានីភ្នំពេញ ៖ រដ្ឋសភានៃព្រះរាជាណាចក្រកម្ពុជា បានកំណត់យកថ្ងៃទី៦ កក្កដា ២០១៥ ដើម្បីប្រជុំអនុម័តលើសេចក្តីព្រាងច្បាប់ ស្តីពី ភតិសន្យាពិសេស ហៅច្បាប់ ការជួលផ្ទះ
រាជធានីភ្នំពេញ ៖ រដ្ឋសភានៃព្រះរាជាណាចក្រកម្ពុជា បានកំណត់យកថ្ងៃទី៦ កក្កដា ២០១៥ ដើម្បីប្រជុំអនុម័តលើសេចក្តីព្រាងច្បាប់ ស្តីពី ភតិសន្យាពិសេស ហៅច្បាប់ ការជួលផ្ទះ បន្ទាប់ពីគណៈកម្មាធិការអចិន្ត្រៃយ៍សម្រេចដាក់បញ្ចូលទៅក្នុងរបៀបវារៈរួចហើយ នៅថ្ងៃទី៣ កក្កដា ២០១៥ ។
យោងតាមវ៉េបសាយរដ្ឋសភា បានឲ្យដឹងថា លោក ប៉ែន បញ្ញា ប្រធានគណៈកម្មការនីតិកម្ម និងយុត្តិធម៌នៃរដ្ឋសភា បានធ្វើការពិនិត្យសិក្សា និងរៀបចំតាក់តែងសេចក្តីស្នើច្បាប់ស្តីពី ភតិសន្យាពិសេស កាលពីថ្ងៃទី២ កក្កដា និងបានលើកឡើងថា ស្របតាមស្មារតីរដ្ឋធម្មនុញ្ញនៃព្រះរាជាណាចក្រកម្ពុជា ពិសេសសិទ្ធិមានលំនៅឋាន សំដៅរួមចំណែកដោះស្រាយបញ្ហាសង្គម រួមមាន ការលំបាក និងសំណូមពររបស់កម្មករ សិស្ស និស្សិត ដែលស្នាក់នៅក្នុងបន្ទប់ជួល ក៏ដូចជាម្ចាស់អចលនទ្រព្យ ហើយក៏ជាការឆ្លើយតបទៅនឹងការពង្រឹងនីតិរដ្ឋ ដើម្បីសុវត្ថិភាព ក្នុងជីវភាពរស់នៅរបស់ពលរដ្ឋ សណ្តាប់ធ្នាប់ របៀបរៀបរយសាធារណៈ និងផ្អែកទៅលើស្ថានភាពជាក់ស្តែងផងដែរ ។
លោក ប៉ែន បញ្ញា បានបញ្ជាក់ថា សេចក្តីស្នើច្បាប់នេះ មានគោលបំណងគ្រប់គ្រងបន្ទប់ជួល រវាងកម្មករ សិស្ស និស្សិត ជាមួយនឹងម្ចាស់ផ្ទះដែលមានបន្ទប់ជួលស្នាក់នៅ ឱ្យមានលក្ខណៈរៀបរយ ព្រមទាំងជួយដោះស្រាយសំណូមពររបស់ កម្មករ សិស្ស និស្សិត ទាក់ទងនឹងតម្លៃបន្ទប់ជួល សមស្របនឹងប្រាក់កម្រៃគោលប្រចាំខែទាប ដែលកម្រិតកំណត់ដោយអនុក្រឹត្យ និងការពារផលប្រយោជន៍ស្របច្បាប់របស់ភតិបតី (ម្ចាស់ផ្ទះដែលមានបន្ទប់ជួល) ។
លោកបានសង្កត់ធ្ងន់ថា សេចក្តីស្នើច្បាប់ស្ដីពីភតិសន្យាពិសេសនេះ ជាមូលដ្ឋានគតិយុត្តជាក់លាក់មួយនៅក្នុងប្រព័ន្ធនីតិរបស់កម្ពុជា បន្ថែមលើក្រមរដ្ឋប្បវេណីស្តីពីភតិសន្យា ដែលត្រូវយកមកអនុវត្តនៅក្នុងករណីនៃកិច្ចសន្យាជួល ។ សេចក្តីស្នើច្បាប់ភតិសន្យាពិសេស មាន៤ជំពូក ចែកចេញជា១១មាត្រា ។
គួរបញ្ជាក់ថា សម្រាប់អង្គប្រជុំសភានៅថ្ងៃទី៦ កក្កដា ខាងមុខនេះ ក្រៅពីរបៀបវារៈ ពិភាក្សាអនុម័តលើសេចក្តីព្រាងច្បាប់ ស្តីពីភតិសន្យាពិសេសនោះ នៅមានរបៀបវារៈមួយចំនួនទៀត គឺ
១-សំណើប្រកាសទទួលស្គាល់លោក កែវ ពិសិដ្ឋ ជាតំណាងរាស្ត្រថ្មីមណ្ឌលកំពង់ចាមជំនួស លោកស្រី ចែម សាវ៉ៃ ដែលបានលាលែង ។ ការប្រកាសសុពពភាពអាណត្តិរបស់លោក កែវ ពិសិដ្ឋ ជាសមាជិកសភានីតិកាលទី៥ នឹងធ្វើឡើងក្នុងសម័យប្រជុំសភាថ្ងៃទី៦ កក្កដា ។ និងលើកសំណើសុំជ្រើសរើសលោក កែវ ពិសិដ្ឋ ជាសមាជិកគណៈកម្មការនីតិកម្ម និងយុត្តិធម៌ នៃរដ្ឋសភា ។
២-សំណើសុំប្រកាសទទួលស្គាល់លោក ងួន ប៊ៀន ជាតំណាងរាស្ត្រថ្មីនៃមណ្ឌលតាកែវ ជំនូស លោក អាន ហេ ដែលបានលាលែង ។ ការប្រកាសសុពលភាពនៃអាណត្តិ របស់លោក ងួន ប៊ៀន ជាសមាជិករដ្ឋសភា នីតិកាលទី៥ នឹងធ្វើឡើងក្នុងសម័យប្រជុំរដ្ឋសភាថ្ងៃទី៦ កក្កដា ៕
ចែករំលែកព័តមាននេះ