ខេត្តកំពង់ឆ្នាំង ៖ ប្រជាពលរដ្ឋជាច្រើនគ្រួសាររស់នៅជាប់មាត់ទន្លេ ក្នុងភូមិចុងកោះ សង្កាត់ផ្សារឆ្នាំង ក្រុងកំពង់ឆ្នាំង បានសម្តែងនូវក្តីបារម្ភជាខ្លាំង ដោយបានលើកគ្នាមកតវ៉ាជាមួយលោកមេភូមិ នៅសាលាបុណ្យក្នុងភូមិចុងកោះ កាលពីរសៀលថ្ងៃទី០២ កក្កដា ២០១៥ ដើម្បីទាមទារសុំយកស្នាមមេដៃរបស់ពួកគាត់ត្រឡប់មកវិញ បន្ទាប់ពីមានលេចឮថា ការផ្តិតយកស្នាមមេដៃពួកគាត់ដែលគ្មានសរសេរពីបំណងឱ្យបានច្បាស់លាស់កាលពី២ថ្ងៃមុននេះ គឺជាការព្រមព្រៀងរុះរើលំនៅឋានដែលកំពុងរស់នៅឱ្យចេញពីមាត់ទន្លេ ប៉ុន្តែត្រូវអាជ្ញាធរភូមិបានអះអាងថា ស្នាមមេដៃទាំងនោះត្រូវខ្យល់ប៉ើងចេញពីម៉ូតូបាត់ទៅហើយ ។
ពលរដ្ឋម្នាក់ឈ្មោះនៅ ភាព អាយុ៥២ឆ្នាំ បាននិយាយថា ពួកគាត់លើកគ្នាមកនេះ គឺសុំតវ៉ាយកស្នាមមេដៃដែលបានផ្តិតកាលពីថ្ងៃទី២៩ និង៣០ មិថុនា ត្រឡប់មកវិញ ព្រោះពេលផ្តិតមិនបានបញ្ជាក់ថា ធ្វើអ្វីទេ តែលោកអនុភូមិបានបង្ខំថា ចេះតែផ្តិតទៅ មិនដែលគេឱ្យទៅងាប់នោះទេ ។
បុរសម្នាក់ឈ្មោះម៉ូវ លីម បានលើកឡើងថា ពួកខ្ញុំមកនេះ គឺសំណូមពរសុំមេដៃត្រឡប់មកវិញព្រោះថា ប្រធានភូមិ និងលោកមេឃុំឆបោកពួកខ្ញុំ ព្រោះពេលផ្តិតមេដៃម្តងថា បើកអំណោយ ម្តងថាផ្តិតដើម្បីជំរឿន និងពេលខ្លះទៀតថា ផ្តិតៗទៅគេមិនឱ្យយើងទៅងាប់នោះទេ ជួនកាលកត់ឈ្មោះប្តីយកប្រពន្ធមកផ្តិត ។
ពួកគាត់ភ័យព្រួយខ្លាចផ្តិតមេដៃដេញផ្ទះសម្បែងពួកគាត់ និងណាមួយខ្លាចយកស្នាមតដៃទៅកឹបជាប់ជាមួយនិងពាក្យដែលគេរុះរើ ថា ជាស្នាមមេដៃប្រជាពលរដ្ឋ ព្រមរុះរើផ្ទះសម្បែងចេញដោយខ្លួនឯងផង ។
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ