ខេត្តរតនគិរី ៖ កម្លាំងសមត្ថកិច្ចចម្រុះខេត្តបានចុះបង្ក្រាបទីតាំងរោងសិប្បកម្មកែច្នៃឈើប្រណីតមួយកន្លែងកាលពីវេលាម៉ោង៣រសៀល ថ្ងៃទី៣០ មិថុនា ២០១៥ ស្ថិតនៅភូមិថ្មី សង្កាត់ឡាបានសៀក ក្រុងបានលុង ដោយរឹបអូសបានឈើប្រណីតចំនួន៣រ៉ឺម៉ក និងម៉ាស៊ីនច្រៀកឈើចំនួន២គ្រឿង ។
សមត្ថកិច្ចបានឱ្យដឹងថា ម្ចាស់សិប្បកម្មកែច្នៃឈើដែលត្រូវបានបង្ក្រាបមានម្ចាស់ឈ្មោះម៉ូក ផល្លា ភេទប្រុស អាយុ៤៨ឆ្នាំ ។
ប្រតិបត្តិការបង្ក្រាបនេះដឹកនាំដោយលោកប៉ម វណ្ណដា ព្រះរាជអាជ្ញារងសាលាដំបូងខេត្ត និងមានការចូលរួមពីមន្ត្រីជំនាញរដ្ឋបាលព្រៃឈើលំផាត់ រដ្ឋបាលព្រៃឈើខណ្ឌ រដ្ឋបាលព្រៃឈើខេត្ត ប៉ូលិសសេដ្ឋកិច្ចខេត្ត និងប៉េអឹមក្រុងបានលុង ។
ទាក់ទិនករណីខាងលើត្រូវមន្ត្រីជំនាញមេព្រៃដែលចុះទៅផ្ទាល់បានឱ្យដឹងថា នៅពេលថ្មីៗនេះ ចំនួនឈើដែលរឹបអូសបានមិនទាន់ដឹងចំនួនពិតប្រាកដទេ គ្រាន់តែដឹងថា រឹបអូសបានឈើចម្រុះចំនួន៣រ៉ឺម៉ក និងម៉ាស៊ីនច្រៀកឈើចំនួន២គ្រឿង ដោយឡែកម្ចាស់ផ្ទះត្រូវបានផាកពិន័យមួយគុណនឹង៣ ។
ពេលនេះវត្ថុតាងដែលរឹបអូសទាំងអស់បានយកទៅរក្សាទុកនៅខណ្ឌរដ្ឋបាលព្រៃឈើខេត្ត ដើម្បីចាត់ការតាមផ្លូវច្បាប់ ៕
ចែករំលែកព័តមាននេះ